“Wo ji Jehova Da Ha Dia Uwẹ” Bhi Iẹnlẹn

1. Be Jehova man mhan nin mhan ha guanọ la nọn ha ghọn mhan? (Matiu 5:3)

JEHOVA lẹn emhin nin eria guanọ. Bhi ọsi ijiẹmhin, Ọle lẹnmhin ghe eria guanọ ebale, ukpọn, bi uwa nọn mhẹn nin ele ha dia i. Iẹnlẹn i da zẹwẹ lẹkhẹ nin mhan ahamiẹn mhan mhọn i ene emhin nan. Jehova man mhan nin ene emhin nan ha ghọn mhan. Emhin ọbhebhe yẹ ribhọ nin Jehova re mhan ọbhi ọkhọle nọn ha ghọn mhan. Ọne emhin hi, ọne ọkhọle nin mhan mhọn rẹ luẹ ẹmhọn ọlẹn, yẹ ji ọle da ha dia mhan. (Tie Matiu 5:3.) Ahamiẹn mhan gene guano nin mhan ha ghọnghọn bhi iẹnlẹn, ọkhẹke nin mhan len sẹbhọ ghe mhan guanọ adia nọnsi Osẹnobulua.

2. Be idia nọnsẹmhan rẹ diabe ọsi ọne okpea yẹ nọn bhii emhin khian bhi ughe?

² Ebi ene ẹmhọn nan zedu ọle diọbhi “ẹbho ne lẹn sẹ ghe ọkhẹke nin Osẹnobulua ha dia ele” mundia nan bhi urolo Grik hi, ẹbho ne bhii nan rẹkpa ele. Ọnan rẹ mhan ria ẹmhọn ọria nọn bhii emhin khian bhi ughe. Re ọkhọle ria ẹmhọn idia ọsi ọria nọn muno ukpọn ne gbitọn an yọ yẹ ha bhii emhin khian bhi ughe, ọle i miẹn ebale agbọn le. Ranmhude ọle i mhọn uwa, ọle i miẹn eji ọle da nẹko sade ovuẹn zẹ la amẹn rọlọ, ẹbho i sikẹ ọle, sẹyẹ, ọle i ghọnghọn. Ọne ọria nọn bhii emhin khian nan lẹn sẹbhọ ghe, nin ọle rẹ sabọ ha mhọn iẹnlẹn nọn mhẹn, ọkhẹke nan rẹkpa ọle. Iriọ yẹ nọn, ẹbho ne lẹn sẹ ghe ọkhẹke nin Osẹnobulua ha dia ele, lẹnmhin ghe ele guanọ urẹkpa nọnsi Jehova bhi iẹnlẹn. Bhiriọ, ene eria nan muegbe rẹ ha noo ene emhin kẹkẹ nin Jehova ze ele egbe dagbare nin eria ne hoẹmhọn ọlẹn.

3. Be mhan ha zilo nyan bhi ọne uhọnmhọn-ota nan?

³ Bhi ọne uhọnmhọn-ota nan, mhan dẹ ka zilo nyan ebi mhan ha sabọ miẹn luẹ bhi obọ ọne okhuo nọn yi obhokhian Finishia nọn dọ bhii Jesu nọn rẹkpa ọle. Okha ọsi ọne okhuo re ikpẹ ea kpataki man, nọn khẹkẹ nin eria ne guanọ nin Osẹnobulua ha dia ele bhi iẹnlẹn ha mhọnlẹn. Mhan dẹ yẹ zilo nyan ijiẹmhin esili nin Pita nin odibo, Pọl, bi Devid nin Ojie re ọbhọ otọ. Uwedẹ nin ene ikpea nan rẹ nyẹnlẹn rẹman ghe, ele lẹn sẹ ọkhẹke nin Osẹnobulua ha dia ele.

IKPẸ EA KPATAKI NE KHẸKE NIN MHAN HA MHỌNLẸN

4. Be ọne okhuo nọn yi obhokhan Finishia ha guanọ nin Jesu lu nanlẹn?

⁴ Ẹdọkpa, okhuo ọkpa nọn yi obhokhian Finishia da bu Jesu rẹ. “Ẹlinmhin-ebe wo manman ha kpokpo ọmokhuo [nọnsọle].” (Mat. 15:​21-28) Ọne okhuo da diguẹ ha bhii Jesu nọn rẹkpa ọle. Ọle wo re ikpẹ esili kẹkẹ man beji ọle bu Jesu re. Bha ji mhan zilo nyan eso bhọ.

5. Ikpẹ nela one okhuo nọn yi obhokhan Finishia rẹman? Be ọnan re Jesu lu? (Yẹ fẹ ifoto ghe.)

⁵ Ọne okhuo da wo rẹman ghe ọle mhọn idegbere. Bezẹle mhan ta iriọ? Ranmhude arẹmiẹn uwedẹ nin Jesu rẹ nanlẹn talọ diabe ghe, Jesu rẹ ọle khọkhọ ibhi awa nin ẹbho ne i yi ibhokhian Ju bẹ bhi uwa nọnsele, ẹkẹ bha ha khọ ọle. Sade uwẹ Jesu re nian ne talọ nọn, be uwẹ ha rẹ lu yẹ? Uwẹ ha be rẹ miẹn ohu, yẹ sibhi eji ọle ye re? Ọkpakinọn, ọne okhuo bha lu iriọ. Ọne okhuo nan wo gene ha mhọn idegbere. Emhin ọbhebhe yẹ wo ribhọ nin ọne okhuo lu. Ọle bha zobọ bhọ rẹ ha guanọ urẹkpa bhi obọ Jesu. Bezẹle nin ọle bha da ji egbe lọ ọle rẹ ha guanọ urẹkpa bhi obọ Jesu? Urẹọbhọ nin ọle mhọn da Jesu zẹle. Urẹọbhọ nin ọle ha mhọn da rẹso Jesu rẹ sẹbhọ ghe, ọle da lu emhin kpataki nanlẹn. Arẹmiẹn ghe Jesu ka taman ọlen ghe, “ihuan ne yulua bhi uwa ọsi Izrẹl” a je ọle bu, ọle da sẹyẹ rẹkpa ọne okhuo. Jesu da khu ọne ẹlinmhin nọn i mhẹn sibhi ọmọn nọnsọle bhi egbe re.

6. Be mhan miẹn luẹ bhi ọne okha ọsi one okhuo nọn yi obhokhan Finishia?

⁶ Ọkhẹke nin mhan ha mhọn ene ikpẹ nan sade mhan guanọ nin Osẹnobulua ha dia mhan bhi iẹnlẹn. Ọkhẹke nin mhan ha mhọn idegbere, bi urẹọbhọ nọn ziẹnlẹn, sẹyẹ, nin mhan hiẹ ji egbe lọ mhan. Ọria nọn mhọn idegbere ọkpa i ji egbe lọ ọle rẹ ha guanọ urẹkpa bhi obọ Osẹnobulua. Rẹ deba ọnin, ọkhẹke nin mhan ha mhọn urẹọbhọ nọn ziẹnlẹn da Jesu Kristi, bi eria nin ọle noo rẹ dia agbotu ẹlẹnan. (Mat. 24:​45-47) Ọ wo ti Jehova bi Ọmọn nọnsọle bhọ rẹ ha dia eria ne mhọn ikpẹ ne sẹnian, sẹyẹ, ọ ghọn ele rẹ ha rẹkpa ele. (Fẹ Jemis 1:​5-7 ghe.) Bhi ejayenan nian, bha ji mhan zilo nyan ebi Jehova rẹ gbega mhan yẹ, bi ebi ọle rẹ ne ene emhin nin mhan yẹ ne ha rẹkpa mhan rẹ sabọ ha ghọnghọn. Mhan dẹ yẹ zilo nyan ebi mhan ha sabọ miẹn luẹ bhi obọ Pita nin odibo, Pọl, bi Devid nin Ojie, rẹji ebi ọkhẹke nin mhan lu rẹ sabọ ha miẹn elele bhi ene emhin kẹkẹ nin Jehova ze ele egbe dagbere nin mhan.

RẸ EBGE KHỌKHỌ PITA BHI UWEDẸ NIN ỌLE RẸ HA LUẸ ỌTA NỌNSI OSẸNOBULUA

7. Be Jesu taman Pita nin ọle lu? Emhin ọbhebhe nela ọkhẹke nin ọle lu? (Hibru 5:14–6:1)

⁷ Bha ji mhan zilo nyan ijiẹmhin ọsi Pita. Ọle ọria ọhẹnhẹn bhi ẹwẹ ibhokhan Ju nọn lẹn ghe, Jesu hi ọne Mezaya. Ọle lẹnmhin ghe Jesu Jehova ha noo rẹ man ẹbho iman-emhin ne ha sabọ re ọria miẹn iẹnlẹn ẹdẹdẹmhẹndẹ. (Jọni 6:​66-68) Ọkuẹsẹ Jesu kpanọ ha khian okhun, ọle da taman Pita yọle: “Re ebale nin ibhi ihuan nesẹmhẹn le.” (Jọni 21:17) Pita wo miẹn ọne ẹson nan nin Jesu mun nanlẹn nọnsẹn. Sẹyẹ, Jehova da noo ọle rẹ gbẹn ilẹta eva ne ribhi Baibo. Ọkpakinọn, ọ yẹ wo khẹke nin Pita rẹ tobọle ha luẹ Ọta nọnsi Osẹnobulua. Bhi ọsi ijiẹmhin, Pita da manman luẹ ene ilẹta nin Pọl gbẹn ne ribhi Baibo. Ọle da yọle ghe, emhin eso nin Pọl gbẹn bhi ene ilẹta “bha lẹkhẹ nan rẹ lẹn otọ ọle.” (2 Pita 3:​15, 16) Ọrẹyiriọ, Pita bha ji egbe lọ ọle rẹ ha tie ene ebe. Ọle wo rẹọbhọ ghe, Jehova dẹ rẹkpa ọle rẹ sabọ lẹn otọ ene ẹmhọn nan ne ribhi ene ilẹta nin Pọl gbẹn, sẹyẹ, ọ dẹ rẹkpa ọle rẹ sabọ re obọ rẹkhan ọlẹn. —Tie Hibru 5:14–6:1.

8. Be Pita rẹ lu emhin yẹ bhi ẹghe nin ẹhi nọnsi Jehova rẹ taman ọlẹn nin ọle lu emhin nin ọle bha sẹ ka lu khẹ?

⁸ Pita da yẹ wo rẹman ghe, ọle mhọn urẹọbhọ da Jehova bhi uwedẹ nin ọle rẹ re obọ rẹkhan adia nan re nanlẹn. Bhi ọsi ijiẹmhin, ẹdọkpa beji Pita ribhi Jọpa, Osẹnobulua da re imianlo man ọlẹn. Bhi ọne imianlo, ẹhi ọkpa da taman ọlẹn nin ọle le elanmhẹn nin uhi nin Jehova na bhi obọ Mozis gbe yọle ghe ọ bha khia. Beji a miẹn obhokhan Ju Pita khin, ọle da ha riale emhin nọn bha gba ọne ẹhi taman ọlẹn nin ọle lu. Bhiriọ, Pita da taman ọne ẹhi yọle: “Eye Ebeanlẹn imẹn. Mẹn bha sẹ ka le emhin soso nọn bha khia khẹ.” Ọne ẹhi ki da taman Pita yọle: “Hẹi yẹ kie dọnmhẹn ọlẹn tie emhin nin Osẹnobulua kpe khia ebe bha khia.” (Iwẹn. 10:​9-15) Bhi ọne ẹghe nan, Pita ki da muegbe nin ọle rẹ fi iria eria nọnsọle denọ. Be mhan rẹ lẹn yẹ? Ọ bha bue gbe beji ọnan sunu fo, ikpea ea nin Kọniliọs je re da vae bhi eji Pita ye, yẹ taman ọlẹn nin ọle rẹkhan ele bu ebeanlẹn nọnsele. Ọkuẹsẹ ọne eghe nan, emhin i ribhọ nọn ha re Pita nabhi uwa ọsi ọria nọn i yi obhokhan Ju. Inian ibhokhan Ju ghe eria ne i yi ibhokhan Ju bii eria ne bha khia. (Iwẹn. 10:​28, 29) Ọkpakinọn, beji Jehova ki rẹman Pita ghe, ọle ki guanọ nin ọrebhe họn ọne ọta nọn mhẹn nian, Pita da wo jẹje fi uwedẹ nin ọle rẹ ha ria eria denọ, yẹ muegbe rẹ hẹnmhọn nin Jehova. (Prov. 4:18) Ọle da tẹmhọn Osẹnobulua man Kọniliọs bi ọrebhe ne ribhi azagba-uwa nọnsọle. Ọle da wo ha ghọnghọn rẹ daghe ọle ghe, ele miẹn ẹmhọanta ọbhi egbe, a re ẹlinmhin nọn khiale nin ele, sẹyẹ, ele mianmẹn.—Iwẹn. 10:​44-48.

9. Uwedẹ eva nela mhan rẹ miẹn elele sade ọ hu mhan bhi udu rẹ ha luẹ ene ẹmhọanta ne dinmhin ne ribhi Baibo?

⁹ Bọsi Pita, ọkhẹke nin mhan ha luẹ Ọta nọnsi Osẹnobulua ẹghe rebhe. Sẹyẹ, ọkhẹke nọn ha ti mhan bhọ rẹ ha luẹ ẹmhọanta ne dinmhin ne ribhi Ọta nọnsi Osẹnobulua. Ene emhọanta nan i da lẹkhẹ nin mhan rẹ re osukpa lẹn otọle. Ọkhẹke nin mhan re ẹghe ọbhi otọ rẹ ha luẹ Ọta nọnsi Osẹnobulua, yẹ dọnmhegbe rẹ lẹn otọ ebi mhan luẹ bhọ. Bezẹle? Ranmhude mhan dẹ miẹn elele bhọ. Bha ji mhan zilo nyan eva bhi elele nin mhan ha sabọ miẹn bhọ: Ọhẹnhẹn, mhan ki dọ luẹ emhin kẹkẹ rẹji Jehova ne ha rẹ mhan manman hoẹmhọn ọlẹn, yẹ ha mun ekpẹn nanlẹn. Ọzeva, beji mhan rẹ luẹ emhin ọgbọn kẹkẹ rẹji Aba mhan nin Jehova, ọ ki manman ha hu mhan bhi udu rẹ ha tẹmhọn ọlẹn man ẹbho. (Rom 11:33; Arẹm. 4:11) Emhin ọbhebhe yẹ wo ribhọ nin mhan luẹ bhi obọ Pita. Ọne emhin hi, ebi ọkhẹkẹ nin mhan lu sade a fi emhin denọ bhi uwedẹ nin mhan ka rẹ lẹn otọ ẹmhọanta ne ribhi Baibo. Ọnan ha sunu, ọkhẹke nin mhan fi iria-eria nọnsẹmhan denọ, yẹ re obọ rẹkhan ọne ufidenọ. Mhan ha lu iriọ, ọle ọkpa Jehova ha da sẹyẹ ha dia mhan, yẹ ha noo mhan.

BỌSI PỌL, DỌNMHEGBE HA RE IKPẸ ESILI MAN NE RE ẸMHỌN UWẸ HA TI OSẸNOBULUA BHỌ

10. Beji Kolose 3:​8-10 rẹman, be ọkhẹke nin mhan lu nin mhan da sabọ re Jehova ha ghọnghọn?

¹⁰ Ahamiẹn mhan guanọ nin mhan ha ghọnghọn, sẹyẹ, nin Jehova ha dia mhan, ọkhẹke nin mhan ha re ikpẹ esili man ne ha re ẹmhọn mhan ha ti Osẹnobulua bhọ. Pọl nin odibo da yọle ghe, nin mhan “kuọ unan ọria nin [mhan] rẹ ha khin” mhan ha yẹ “kiẹn unan ọria ọsọgbọn.” (Tie Kolose 3:​8-10.) Ọnan i wo ye emhin nọn lẹkhẹ nan rẹ lu. Bha ji mhan fẹ ijiẹmhin ọsi Pọl ghe. Rẹ na bhi egbe obhokhan ọle rẹ ha ho nin ọle ha lu emhin nọn ha re Osẹnobulua rẹ re ẹlo esili ha ghe ọle (Gal. 1:14; Filẹ. 3:​4, 5) Ọkpakinọn, ranmhude ọle bha ha mhọn ilẹnmhin nọn gbale nọnsi Osẹnobulua, ọle da ha lu ọle bhi uwedẹ nọn bha gba. Pọl bha lẹn iman-emhin nesi Jesu. Sẹyẹ, ranmhude ọle wo ha tẹngbemun, ọle da ha lu emhin ne i ti Osẹnobulua bhọ. Pọl da yọle ghe “ọria oya” ọle rẹ ka ha khin.—1 Tim. 1:13.

11. Emhin nela ọkhẹke nin Pọl fidenọ bhi iẹnlẹn nọnsọle? Re otọle man.

¹¹ Ọria nin ohu kẹ wo manman re Pọl ha khin ọkuẹsẹ ọle dọ kiẹn Kristiẹn. Ebe ọsi Iwẹnna ji mhan lẹn ghe, ẹkẹ ọsi edibo nọnsi Jesu da wo manman ha khọ Pọl rẹ sẹbhọ ghe, ọle da ha guanọ nin ọle gbono ele a. (Iwẹn. 9:1) Bhiriọ, beji Pọl dọ kiẹn Kristiẹn fo, Ọle da manman dọnmhegbe kaka rẹ fi uwedẹ nin ọle rẹ ka ha lu emhin denọ. (Ẹfẹ. 4:​22, 31) Ọrẹyiriọ, ẹghe yẹ wo ha ribhọ nin Pọl rẹ re ikpẹ nọn i mhẹn man. Ẹghe nin ọle bi Banabas bha rẹ ko ghe ẹmhọn bhi uwedẹ ọkpa, “ọnan da wo si ovan re bhi ẹwẹ ele.” (Iwẹn. 15:​37-39) Ọ da gbo diabe ghe, Pọl fikie dọ ha lu ọne emhin nin ọle dọnmhegbe rẹ rẹban, ọkpakinọn, ọle bha ji egbe lọ ọle. Ọle da sẹyẹ wo dọnmhegbe ha wẹnna bhi eji ọle da wẹghẹ, beji ẹmhọnlẹn ha da ha ti Jehova bhọ.—1 Kọr. 9:27

12. Be rẹkpa Pọl rẹ sabọ ha wẹnna ọbhi ije kẹkẹ nọn da khẹke nin ọle fidenọ?

¹² Pọl da sabọ fi uwedẹ nin ọle rẹ ka rẹ ha nyẹnlẹn denọ, ranmhude nin ọle bha rẹ mun udu nyan ahu nọnsọle. (Fil. 4:13) Bọsi Pita, Pọl da mun udu nyan Osẹnobulua nọn rẹkpa ọle rẹ sabọ fidenọ bhi ije kẹkẹ nọn da khẹke. (1 Pita 4:11) Ọrẹyiriọ, ẹghe sẹyẹ wo ha ribhọ nin Pọl rẹ dobọ. Ọnan ha sunu, egbe ki wo lọ ọle. Ọkpakinọn, ẹghe nọn hi ki rẹ khin nin egbe rẹ lọ ọle, ọle ki ria eria nyan emhin kẹkẹ nin Jehova sẹ lu nanlẹn. Ọnan ki re ahu nanlẹn rẹ sẹyẹ ha dọnmhegbe rẹ ha lu emhin ne ti Osẹnobulua bhọ.—Rom 7:​21-25.

13. Be mhan ha rẹ sabọ re egbe khọkhọ Pọl yẹ?

¹³ Aharẹmiẹn ọ reele nin mhan mhọn da ga Jehova, ọ sẹyẹ wo khẹke nin mhan dọnmhegbe ha fi unan ọria nin mhan khin denọ, sẹyẹ, nin mhan dọnmhegbe ha lu ebe ti Jehova bhọ beji Pọl nin odibo lu. Ẹgheso, ahamiẹn mhan dọ kere ghe mhan gbo dọ ha lu ene emhin nin mhan dọnmhegbe rẹ rẹban, bọsi nan rẹ ha ne ẹbho talọ bhi uwedẹ nọn bha gba, la kẹ ha re ohu, ọ bha khẹke nin mhan ha riale ghe ọsẹmhan wo fo, ghe mhan i da sabọ yẹ fidenọ. Sokpan ebi ọ khẹke nin mhan lu hi, nin mhan dọnmhegbe ha wẹnna ọbhi ije kẹkẹ nin mhan da wẹghẹ. (Rom 12:​1, 2; Ẹfẹ. 4:24) Beji mhan rẹ dọnmhegbe rẹ fi unan ọria nin mhan khin denọ, ọkhẹke nin mhan lẹn sẹbhọ ghe nin mhan rẹ sabọ lu ọle, ọ dẹ ha mhẹn nin mhan manman lẹn otọ ebi Jehova guanọ bhi obọ mhan yẹ ha re obọ rẹkhan ọlẹn.

BỌSI DEVID—JI JEHOVA DA HA GBEGA UWẸ

14-15. Uwedẹ nela Jehova rẹ gbega ẹbho nesọle ẹlẹnan? (Psalm 27:5) (Yẹ fẹ ifoto odalo ọle ghe.)

¹⁴ Emhin ọbhebhe nọn khẹke nin mhan lu rẹ sabọ ha mhọn eghọnghọn ọsaje hi, nin mhan rẹ ji Jehova da ha gbega mhan. Be Jehova rẹ gbega mhan yẹ? Sẹyẹ, be ọkhẹke nin mhan lu rẹ sabọ miẹn ugbega nọnsọle?

¹⁵ Devid nin Ojie wo tẹmhọn ebi Jehova rẹ gbega mhan yẹ. (Tie Psalm 27:5.) Be Jehova rẹ gbega ẹbho nesọle yẹ ẹlẹnan? Ọle gbega ele bhi obọ ẹbho bi emhin nọn hi ki rẹ khin nọn ho nọn wẹghẹ ele urẹọbhọ a. Ebi eria ki rẹ mhanmhan rẹ re mhan zobọ bhọ rẹ ha ga Jehova, Jehova i da ji ọle da wẹnna nin ele. (Ps. 34:7; Isa. 54:17) Arẹmiẹn Esu bi ẹlinmhin ne i mhẹn nesọle mhọn ahu, Jehova mhọn ahu gbera ele. Aharẹmiẹn ele si uu ji mhan, Jehova dẹ riọ mhan kpanọ bhi ẹghe odalo. (1 Kọr. 15:​55-57; Arẹm. 21:​3, 4) Jehova yẹ wo rẹkpa mhan beji mhan ha da yẹ sabọ ha ga ọle khian, Aharẹmiẹn emhin ribhọ ne re mhan ha kpokpo egbe. (Prov. 12:25; Mat. 6:​27-29) Sẹyẹ, Jehova ne ibhio mhan nin mhan bhi agbotu ne ha rẹkpa mhan, bi ene ewanlẹn ne noo Baibo rẹ ko mhan udu re. (Isa. 32:​1, 2) Rẹ deba ọnan, mhan ha yo ikolo oga, mhan luẹ emhin bhi uwedẹ kẹkẹ nin mhan ha rẹ sabọ ji Jehova da ha rẹkpa mhan yẹ gbega mhan.—Hib. 10:​24, 25.

16. Be Jehova rẹ gbega Devid yẹ?

¹⁶ Ẹghe nin Devid rẹ wo ha hẹnmhọn nin Jehova, Jehova da wo ha gbega ọle bhi okhẹnan nin eria ne i re obọ rẹkhan uhi nesọle miẹn. (Fẹ Proverbs 5:​1, 2 ghe.) Ọkpakinọn, ẹghe nin Devid bha rẹ hẹnmhọn nin Jehova, Jehova da re otọ nanlẹn rẹ loya nọn na bhi emhin nin ọle lu re. (2 Sam. 12:​9, 10) Ọkpakinọn, be Jehova rẹ lu emhin yẹ bhi ẹghe nin Devid rẹ ha loya ranmhude emhin nin ẹbho ebhebhe lu ọle le? Beji Devid viẹ bu Jehova bhi erọnmhọn, Jehova da ko ọle udu re. Jehova da ji Devid lẹn ghe ọle dẹ gbẹloghe ọle, sẹyẹ, ọle hoẹmhọn ọlẹn.—Ps. 23:​1-6.

17. Be mhan ha rẹ sabọ re egbe khọkhọ Devid yẹ?

¹⁷ Uwedẹ ọkpa nin mhan ha rẹ sabọ re egbe khọkhọ Devid hi, nin mhan rẹ ha guanọ adia bhi obọ Jehova sade mhan ho nin mhan zẹ ebi mhan ha lu. Sẹyẹ bọsi Devid, ahamiẹn mhan loya ẹgheso, ọkhẹke nin mhan lẹn sẹbhọ ghe, ọ i yi ranmhude Jehova bha yẹ gbega mhan zẹle, sokpan, emhin nọn bha gba nin mhan zẹ rẹ lu zẹle. (Gal. 6:​7, 8) Rẹ deba ọnan, ahamiẹn mhan kuẹlo da ọkakale ranmhude emhin nin ẹbho ebhebhe lu mhan le, mhan ki bu Jehova bhi erọnmhọn, taman ọlẹn ebi emhin dia mhan yẹ bhi egbe, yẹ ha mhọnlẹn bhi ọkhọle ghe ọle dẹ rẹkpa mhan yẹ ko mhan udu re.—Fil. 4:​6, 7.

WO JI JEHOVA DA HA DIA UWẸ BHI IẸNLẸN

18. Uwedẹ nela ẹbho ne bunbun bhi ọne agbọn nan ẹlẹnan rẹ ria eria? Ahamiẹn mhan ho nin Jehova wo ha dia mhan, be ọkhẹke nin mhan lu? (Yẹ fẹ ene ifoto ghe.)

¹⁸ Uhọnmhọn-ọta ọsi ukpe 2026 yọle ghe: “Eghọnghọn hi ọsi ẹbho ne lẹn ghe, ọkhẹke nin Osẹnobulua ha dia ele bhi iẹnlẹn.” Ọ manman wo khẹke nin mhan ji Jehova da ha dia mhan ẹlẹnan nian gbera ọnikhẹ. Bezẹle? Ranmhude ẹbho ne bunbun ne nẹga mhan ẹlẹnan bha rẹọbhọ ghe ọkhẹke nin Osẹnobulua ha dia ele bhi iẹnlẹn. Eso rẹọbhi Osẹnobulua, sokpan, uwedẹ nọn ghọn ele, ele ho nin ele rẹ ha ga ọle. Sẹyẹ, eso dọ ha guanọ adia bhi obọ eria, nin ele rẹ lẹn ebe khẹke nin ele lu. Ọnan zẹle nin ele i da ghọnghọn. Ọ bha khẹke nin mhan dọ ha re egbe khọkhọ ele. Nin mhan rẹ sabọ rẹban iria-eria nọn sẹnian nin ẹbho bhi ọne agbọn nan ẹlẹnan mhọn, ọkhẹke nin mhan ha tie Ọta nọnsi Osẹnobulua ẹghe rebhe. Nin mhan dọnmhegbe ha re ikpẹ esili man ne ha re ẹmhọn mhan ha ti Osẹnobulua bhọ, bi nin mhan ha hẹnmhọn nin Jehova yẹ ji ọle da ha gbega mhan.