LUẸ ỌNAN
Emhin Ne Ha Sabọ Rẹkpa Uwẹ Rẹ Ha Tie Baibo Ẹdẹdẹ
Emhin ne bunbun ribhọ nin mhan lu bhi iẹnlẹn. Ọnan be re ọle nọghọ uwẹ rẹ ha re obọ rẹkhan emhanmhan nin uwẹ re ọbhi otọ rẹ ha tie Baibo ẹdẹdẹ? (Josh. 1:8) Ahamiẹn iriọ nọn, dọnmhẹn ọkpa bhi ene emhin nan fẹghe:
Lu ọle nin foni nọnsẹ ha ye uwẹ egbe re ẹdẹdẹ. Mhanmhan ẹghe ọbhi foni nọnsẹ, nọn da ha ye uwẹ re ẹdẹdẹ rẹ ha tie Baibo.
Mun Baibo nọnsẹ ọbhi eji uwẹ ha da kẹ ha daghe ọle. Ahamiẹn Baibo nan printi dagbare uwẹ noo rẹ lu iluẹmhin Baibo nọnsẹ ẹdẹdẹ, mun ọlẹn ọbhi eji uwẹ ha da kẹ ha daghe ọle.—Deut. 11:18.
Ha kaehọ Baibo nan rẹkọdi. Ha kaehọ Baibo nan rẹkọdi beji uwẹ rẹ lu emhin ukpẹdẹ-ukpẹdẹ. Ọnan hi ebi obhio mhan nin okhuo natiọle Tara, nọn lu iwẹnna ọkanẹfan lu. Inẹn ọle ọle khin, sẹyẹ, bhi ọsasọn ọle da wẹnna. Ọle da yọle: “Ahamiẹn mẹn lu emhin ukpẹdẹ-ukpẹdẹ, yẹ kaehọ Baibo nan rẹkọdi, ọ rẹkpa mẹn rẹ ha tie Baibo ẹdẹdẹ.”
Hẹi ji egbe lọ uwẹ rẹ ha dọnmhegbe. Ahamiẹn emhin sunu nọn zẹle uwẹ bha sabọ tie Baibo bhi ẹghe nin uwẹ rẹyi bhi ukpẹdẹ, dọnmhegbe yẹ tie obhiọ khere ọkuẹsẹ uwẹ nowẹ. Uwẹ ha ririọ ha tie ọle khere-khere ẹdẹdẹ, uwẹ dẹ yẹ sabọ miẹn elele bhọ.—1 Pita 2:2.