Uwẹ Dẹ Sabọ Miẹn Elele Bhi Ikpebe Kẹkẹ Bhi Baibo, Ne Rẹkpa Mhan Rẹ Guanọ Otọ Emhin Fẹghe

Asabọmiẹn New World Translation of the Holy Scriptures nan zedu ọle diọbhi urolo Danish la Ebo uwẹ noo. Ahamiẹn iriọ nọn, a gbẹnẹ ikpebe ne dia khere-khere kẹkẹ sikẹ ọta eso nan tale bhi ẹkẹ ọle, ne rẹkpa mhan rẹ gua-otọ ene ọta fẹghe. Ẹne ikpebe nan wo rẹman ghe, ulọnlẹn rẹbhe bhi Baibo wo diẹn kugbe, ranmhude, ọ rẹkpa mhan rẹ sabọ miẹn ulọnlẹn ebhebhe bhi Baibo ne yẹ talọ nyan ulọnlẹn nin mhan gua-otọle. Ahamiẹn uwẹ gbẹlokotọ bhi ọta eso nan tale bhi Baibo, uwẹ ki miẹn ene ikpebe ne dia khere-khere nan gbẹn sikẹ ehehe ele. Ahamiẹn Baibo nan printi dagbare uwẹ noo, uwẹ dẹ sabọ miẹn ene ikpebe bhi adesẹ ọle ne ha rẹkpa uwẹ rẹ sabọ miẹn ulọnlẹn ebhebhe ne talọ nyan ọne uwẹ guanọ. Ahamiẹn uwẹ noo jw.org la JW Library®, piẹn ọne ikpebe nan gbẹn sikẹ ọta nan tale, beji ọ ha da re uwẹ diọbhi ulọnlẹn ebhebhe ne talọ ọbhi ọne uwẹ gua-otọle.

Ikpebe nan gbẹn sikẹ ọta nan tale bhi Baibo dẹ sabọ rẹkpa uwẹ rẹ miẹn emhin kẹkẹ bii:

Eji Ọbhebhe Nin One Okha Da Zegbere: Ọne ikpebe nan gbẹn sikẹ ọta nan tale bhi ulọnlẹn bhi Baibo, dẹ re uwẹ diọbhi ije ebhebhe bhi Baibo, nin okha nin uwẹ guanọ da yẹ zegbere. Bhi ọsi ijiẹmhin, fẹ 2 Samuel 24:1 bi 1 Chronicles 21:1 ghe.

Eji Ulọnlẹn Da Zegbere: Ọne ikpebe dẹ re uwẹ diọbhi eji ọne ulọnlẹn da ka zegbere bhi Baibo. Bhi ọsi ijiẹmhin, fẹ Matiu 4:4 bi Deuteronomy 8:3 ghe.

Akhasẹ Nọn Munsẹ: Ọne ikpebe dẹ re uwẹ diọbhi ulọnlẹn nan da kha akhasẹ, bi ulọnlẹn ọbhebhe nọn rẹman ebi ọ rẹ munsẹ yẹ. Bhi ọsi ijiẹmhin, fẹ Matiu 21:5 bi Zechariah 9:9 ghe.