Ọta Nin Eria Ne Tie Ebe Nesẹmhan Nọọn

Ẹghela Iwẹnna Itẹmhọn Osẹnobulua Nin Mhan Lu Ha Rẹ Kpẹn?

Jesu yọle: “A dẹ wewe ọne ọta nọn mhẹn ọsi Agbejele na bhi otọ agbọn rebhe, nọn ha yi ọsali rẹji ọrebhe. Ẹghenin, ọkpẹnlẹn ki vae.” (Mat. 24:14) Ukpọta Grik nan zedu ọle diọbhi “ọkpẹnlẹn” bhi ọne ulọnlẹn nan, bi bhi ulọnlẹn nọnzi 6 bi 13 hi, teʹlos. Ebi ọ mundia nan hi, ẹghe nan ha rẹ re ọkpẹnlẹn ọbhi ọne agbọn Esu nan sẹsẹsẹ bhi ẹghe okhọn Amagẹdọn. (Arẹm. 16:​14, 16) Ọnan rẹman ghe, mhan dẹ wo ha tẹmhọn Osẹnobulua khian rẹ dọ sẹbhi ẹghe nin Amagẹdọn ha rẹ munhẹn. Ọnan wo fi ebi mhan rẹ ka rẹọ i rẹji ọne ẹmhọn nan denọ.

Bhi ẹghe nikhẹ, mhan da rẹọbhọ ghe, mhan dẹ zobọ bhọ rẹ ha tẹmhọn Osẹnobulua bhi ẹghe nin ekpokpo nọn khua ha rẹ munhẹn, sade a dunmhun Babilọn Nọn Khua a fo. (Arẹm. 17:​3, 5, 15, 16) Mhan da rẹọbhọ ghe, ekpokpo nọn khua ha munhẹn, Jehova i da kie re isẹhoa nin ọria soso rẹ dọ luẹ ẹmhọn ọlẹn. (Isa. 61:2) Mhan da yẹ rẹọbhọ ghe, ẹbho ne da miẹn uhọnmhọn bhi ekpokpo nọn khua dẹ ha yi ẹbho ne wo ha sun rẹkhan Jehova ọkuẹsẹ ekpokpo nọn khua munhẹn. Mhan da re ele khọkhọ ẹbho ne miẹn uhọnmhọn bhi ẹghe nan rẹ dunmhun Jerusalẹm an bhi ukpe 607 B.C.E. Ene ẹbho nan wo ka rẹman ghe ele gene sun rẹkhan Jehova yẹ he emhin ebe, ọle zẹle nin ele da sabọ miẹn uhọnmhọn. (Ezek. 5:11; 9:4) Ọnan bha diẹn mun ebi Jesu tale bhi Matiu 24:​14, nọn rẹman ghe asabọmiẹn ẹbho dẹ miẹn isẹhoa rẹ yẹ dọ ga Jehova rẹ dọ sẹbhi ọne ẹghe nin okhọn Amagẹdọn ha rẹ munhẹn.

Uwedẹ nin mhan ki rẹ dọ lẹn otọ ẹmhọn ne ribhi Matiu 24:14 wo rẹman ghe, ọ yẹ khẹke nin mhan fi ebi mhan rẹ ka rẹọ i rẹji Arẹman 16:21 denọ. Enin da tẹmhọn ‘udede esia nọn si ọbalọ.’ Ebi a dọ gua otọle kere rẹman ghe, ene ulọnlẹn nan veva diẹn kugbe. Be ọ rẹ yi iriọ yẹ? Ranmhude ebi Baibo tale rẹji uwedẹ nin ẹbho rẹ miẹn ẹmhọn Agbejele ọbhi egbe. Pọl ki ha talọ rẹji “ẹbho ne da miuhọnmhọn,” ọle da yọle ghe, ọta esili ọne uhọnmhunje khin rẹji ele. Sẹyẹ, ọ “vin-ohin ọsi iẹnlẹn” rẹji ele. Ọkpakinọn, ọta ebe nọn rẹji eghian nesi Jehova, sẹyẹ, ọ “ya uu” rẹji ele. (2 Kọr. 2:​15, 16) Ebezẹle nin ele da he ọne uhọnmhunje nan hi, ranmhude ọne uhọnmhunje wo rẹman ebi ọne agbọn nan nin ele hoẹmhọnlẹn gene khin, ghe ọ i mhẹn, sẹyẹ, Esu hi ọnọn gbẹloghe ọle. Rẹ deba ọnin, a dẹ kẹ fuẹn ọlẹn an.—Jọni 7:7; 1 Jọni 2:17; 5:19.

Yere ghe, ọne esia nan rẹ lu arẹkhọkhọ dẹ wo manman ha “khua.” Asabọmiẹn ebi ọnan mundia nan hi, bhi ẹghe ekpokpo nọn khua, mhan dẹ wo kie manman ha tẹmhọn Osẹnobulua gbera ọnikhẹ. Ọnan ki re isẹhoa nin ẹbho ne bunbun rẹ manman dọ lẹn elin nọnsi Jehova. (Ezek. 39:7) Ahamiẹn a dunmhun Babilọn Nọn Khua a fo bhi ọne ẹghe nin, ẹbhọ dẹ be dọ hoẹmhọn uhọnmhunje nin mhan wewe man ele bii emhin nọn vin-ohin? Asabọmiẹn ọ dẹ sunu. Asabọmiẹn ele dẹ yere ghe, Esali Jehova ka wewe ọle bhi ikpe ne bunbun, ghe a dẹ dunmhun oga ohoghe a.

Ọnan hi ebe yẹ sunu bhi otọ Ijipt bhi ẹghe ẹdẹlẹ, bhi ẹghe nin Jehova rẹ re oya nin ele igba igbe fo. Ẹghe nin Jehova rẹ “bhohiẹn ene osẹ rebhe nesi Egypt” fo, usun ẹbho ne bunbun da rẹkhan ibhokhan Izrẹl. (Ex. 12:​12, 37, 38) Asabọmiẹn ebezẹle nin ene usun ẹbho da zẹ rẹ rẹkhan ẹbho nesi Osẹnobulua hi, ranmhude nin ele rẹ daghe ọle ghe, ibhokhan Ijipt gene loya igba igbe, beji Mozis rẹ yọle ghe ọ dẹ sunu ji ele.

Ọria nọn hi ki rẹ khin nọn vae dọ ha ga Jehova sade a dunmhun Babilọn Nọn Khua a fo, dẹ miẹn isẹhoa rẹ ha re iyobọ nin ibhio Kristi ne da kẹre bhi ọne otọ nan ẹghenin. (Mat. 25:​34-36, 40) Bhi ọsi ẹmhọanta, ọne isẹhoa nan ha rẹ bhu ẹbho ohiẹn bii ihuan dẹ kpẹn ọkuẹsẹ okhọn Amagẹdọn munhẹn. Bhi ọne ẹghe nan, a ki ne enanzẹle ne kẹre bhi ọne otọ nan ha khian okhun.

Uwedẹ nan kie rẹ gbotọ ọne ẹmhọanta nan fanọan wo rẹman ghe, Jehova manman mhọn oyẹẹ bi itohan. Bhi ọsi ẹmhọanta, “ọle guanọ nin ẹbho rebhe fidenọ. Ọle bha guanọ nin ọria soso miẹn ugbekhuelo.”—2 Pita 3:9.