Re Egbe Khọkhọ Jesu Bhi Uwedẹ Nin Ọle Rẹ Ha Re Ọyaya Tẹmhọn Osẹnobulua

1. Emhin ọkpa nela re ẹbho nesi Jehova dikẹ bhi ẹbho bhi ọne agbọn nan?

EMHIN ọkpa nọn re eguọmhandia nesi Jehova dikẹ bhi ekhẹn otuẹ hi, uwedẹ nin ele rẹ re ọyaya tẹmhọn Osẹnobulua. (Tai. 2:14) Ẹgheso, ọ i da ha ghọn uwẹ rẹ dagbare dọ tẹmhọn Osẹnobulua. Asabọmiẹn emhin dẹ dia uwẹ bhi egbe beji dia ọwanlẹn ọkpa bhi egbe, nọn wo ha wẹnna kaka bhi agbotu. Ọle da yọle: “Ẹgheso, ọ i ghọn mẹn hiehie rẹ dọ tẹmhọn Osẹnobulua.”

2. Be ha sabọ re ọle nọghọ mhan rẹ ha mhọn ọyaya bhi iwẹnna itẹmhọn Osẹnobulua nin mhan lu?

² Ọ sabọ rẹ ha yẹẹ mhan rẹ lu iwẹnna oga ebhebhe nọn hi ki rẹ khin gbera nin mhan rẹ dọ ha lu iwẹnna itẹmhọn Osẹnobulua. Bezẹle? Ranmhude mhan kẹ wo daghe elele nọn nabhọre sade mhan deba ibhio mhan bọn Kindọn Họọ la re ọle i nọnsẹn, la rẹkpa ibhio mhan nin emhin idunmhunri sunu je, la ko ele udu re bhi ẹghe ebhebhe. Ọnan rẹ mhan ghọnghọn. Ọfure bi oyẹẹ nin mhan miẹn bhi ẹwẹ ibhio mhan nin mhan deba wẹnna manman wo re mhan ghọnghọn. Sẹyẹ, mhan lẹnmhin ghe emhin nin mhan lu nin ele manman wo ti ele bhọ. Bhi obọ nọnkẹlẹ, asabọmiẹn rẹ na bhi ẹghe nin mhan mhọn da tẹmhọn Osẹnobulua bhi agọ nin mhan ye, ikpeta ẹbho ọkpa kaehọ, eso bhọ i kaehọ hiehie. Mhan yẹ wo lẹn ghe beji ọkpẹnlẹn ọsi ọne agbọn nan rẹ manman ha sire, ẹbho dẹ wo manman ha kpokpo mhan gbera ọnikhẹ, ranmhude iwẹnna itẹmhọn Osẹnobulua nin mhan lu. (Mat. 10:22) Be ha sabọ rẹkpa mhan rẹ wo manman ha mhọn ọyaya bhi iwẹnna itẹmhọn Osẹnobulua nin mhan lu?

3. Be Luk 13:​6-9 rẹ tẹmhọn ọyaya nin Jesu ha mhọnlẹn yẹ bhi iwẹnna itẹmhọn Osẹnobulua?

³ Mhan dẹ sabọ miẹn emhin luẹ bhi obọ Jesu rẹji ebi a rẹ re ọyaya tẹmhọn Osẹnobulua yẹ. Bhi ẹghe nin ọle rẹ ha lu iwẹnna itẹmhọn Osẹnobulua, ọle bha ji egbe lọ ọle. Bhi ọsi ẹmhọanta, beji ẹghe rẹ ha gbera, ọle da wo ha lu gbera eka nin ọle ka lu khẹ bhi iwẹnna itẹmhọn Osẹnobulua. (Tie Luk 13:​6-9.) Beji ọria nọn gbẹloghe ọne ugbo ivain rẹ re ikpe ea gbẹloghe eran figi nọn bha ka mọn ikpẹ, iriọ Jesu rẹ re ikpe ea tẹmhọn Osẹnobulua man ene ibhokhan Ju. Ọkpakinọn, eso bhi ẹwẹ ele bha ka re ehọ ọbhi ebi ọle ha taman ele. Beji ọria nọn gbẹloghe ugbo ivain bha rẹ ji egbe lọ ọle rẹ ha gbẹloghe ọle, Jesu bha ji egbe ene ẹbho lọ ọle, la re ọle de obọ re bhi iwẹnna itẹmhọn Osẹnobulua nin ọle lu. Bhi ọsi ẹmhọanta, Jesu da manman wẹnna kaka rẹ rẹkpa ene ibhokhan Ju beji ele ha da sabọ dọ rẹọbhi ọne ọta nọn mhẹn nin ọle ha taman ele.

4. Emhin enẹn nela Jesu lu nin mhan ha zilo nyan?

⁴ Bhi ọne uhọnmhọn-ọta nan, mhan dẹ zilo nyan ebi Jesu rẹ re ọyaya man yẹ, manman nọn bhi ene uki ehan nin ọle gbe kike bhi iwẹnna itẹmhọn Osẹnobulua nin ọle lu. (Luk 10:1) Ahamiẹn mhan re egbe khọkhọ ọle, yẹ luẹ emhin bhi ebi ọle man ẹbho le, ọ ki rẹkpa mhan rẹ re ọyaya ha lu iwẹnna itẹmhọn Osẹnobulua. Bha ji mhan fẹ emhin enẹn ghe nin mhan ha sabọ miẹn luẹ bhi obọ Jesu: (1) Ọle da mun iho nọnsi Jehova kalo bhi iẹnlẹn, (2) ọle da wo lẹn otọ akhasẹ ne ribhi Baibo nọnsẹn yẹ re obọ rẹkhanlẹn, (3) ọle da mun udu tẹ Jehova nọn rẹkpa ọle bi (4) ọle da rẹọbhọ ghe ẹbho eso dẹ ka ọle ehọ.

ỌLE DA MUN IHO NỌNSI JEHOVA KALO BHI IẸNLẸN

5. Be Jesu rẹ rẹman yẹ ghe iho nọnsi Jehova ọle mun kalo bhi iẹnlẹn?

⁵ Jesu da wo re ọyaya ha wewe “ọne ọta nọn mhẹn ọsi Agbejele”, ranmhude ọle lẹnmhin ghe, ọnan hi iwẹnna nin Osẹnobulua guanọ nin ọle lu. (Luk 4:43) Iwẹnna itẹmhọn Osẹnobulua wo ha yi iwẹnna kpataki rẹji Jesu. Bhi uki eso nin ọle gbe kike bhi ọne iwẹnna itẹmhọn Osẹnobulua nin ọle lu, “ọle da ha na bhi agbaẹbho rẹ sẹbhi agbaẹbho, bi idunmhun rẹ sẹbhi idunmhun” yẹ man ẹbho ẹmhọn Osẹnobulua. (Luk 13:22) Ọle da yẹ man edibo nesọle ebi a rẹ lu iwẹnna itẹmhọn Osẹnobulua yẹ beji ele ha da sabọ ha deba ọle lu ọne iwẹnna.—Luk 10:1.

6. Be iwẹnna oga ebhebhe nin mhan lu rẹ diẹn mun iwẹnna itẹmhọn Osẹnobulua yẹ? (Yẹ fẹ ifoto ghe.)

⁶ Ẹlẹnan nian, iwẹnna itẹmhọn Osẹnobulua hi iwẹnna nọn lu uhọnmhọn-emhin nẹ nin Jehova bi Jesu guanọ nin mhan ha lu. (Mat. 24:14; 28:​19, 20) Iwẹnna itẹmhọn Osẹnobulua nin mhan lu bi iwẹnna oga ọbhebhe nọn hi ki rẹ khin nin mhan lu diẹn kugbe. Bhi ọsi ijiẹmhin, mhan bọn Kindọn Họọ kẹkẹ ranmhude mhan guanọ nin ẹbho nin mhan tẹmhọn Osẹnobulua man miẹn eji ele ha da ha ga Jehova. Sẹyẹ, iwẹnna kẹkẹ nin mhan lu bhi Bẹtẹ bi ije ebhebhe ne dia iriọ, yẹ rẹkpa bhi iwẹnna itẹmhọn Osẹnobulua nin mhan lu. Emhin idunmhunri ha sunu, mhan ki dọnmhegbe ne emhin nin ibhio mhan guanọ ne ele, beji ele ha da sabọ kie ha yo ikolo oga bi inẹbho. Mhan ha lẹn ebi iwẹnna itẹmhọn Osẹnobulua lu uhọnmhọn-emhin sẹ yẹ, yẹ yere ghe ọle hi iwẹnna kpataki nin Jehova guanọ nin mhan ha lu, ọnan ki re ọne ọhubhudu nin mhan rẹ ha lu iwẹnna itẹmhọn Osẹnobulua ẹghe rebhe. János, ọwanlẹn ọkpa bhi Hungary da yọle, “Ẹghe-ẹghe mẹn rẹ ye egbe mẹn re ghe, iwẹnna oga soso i ribhọ nọn lu uhọnmhọn-emhin gbera iwẹnna itẹmhọn Osẹnobulua ranmhude ọle iwẹnna kpataki nin Jehova mun nin mhan.”

7. Bezẹle nin Jehova da guanọ nin mhan wo situa ha lu iwẹnna itẹmhọn Osẹnobulua? (1 Timoti 2:​3, 4)

⁷ Mhan dẹ sabọ manman ha mhọn ọne ọyaya rẹ ha lu iwẹnna itẹmhọn Osẹnobulua sade mhan ghe ẹbho bhi uwedẹ nin Jehova rẹ ghe ele. Ọle guanọ nin ẹbho ne bunbun họn ọne ọta nọn mhẹn ọsi Agbejele, yẹ miẹn ọlẹn ọbhi egbe. (Tie 1 Timoti 2:​3, 4.) Ranmhude ọnan, ọle wo ha man mhan uwedẹ kẹkẹ nin mhan ha rẹ sabọ ha lu ọne iwẹnna nan nọnsẹn nọn ha sabọ miẹn ẹbho fan. Bhi ọsi ijiẹmhin, ọne brokiọ natiọle Hoẹmhọn Ẹbho—Re Ele Kiẹn Edibo wo ha man mhan ebi a rẹ ne ẹbho zilo yẹ bhi iwẹnna itẹmhọn Osẹnobulua, beji ele ha da sabọ dọ luẹ Baibo, yẹ dọ kiẹn edibo nesi Jesu. Aharẹmiẹn ẹbho bha ka ga Jehova bhi ejayenan nian, asabọmiẹn ele dẹ miẹn ọne isẹhoa rẹ lu iriọ ọkuẹsẹ ọkpẹnlẹn ọsi ekpokpo nọn khua. Ebi mhan taman ele nian dẹ sabọ ha yi ebe ha rẹkpa ele rẹ zẹ rẹ dọ ga Jehova bhi ẹghe odalo. Ọkpakinọn, mhan ha situa ha tẹmhọn Osẹnobulua, ọle ọnan ha da sabọ sunu.

ỌLE DA WO LẸN ỌTA AKHASẸ NE RIBHI BAIBO NỌNSẸN YẸ RE OBỌ RẸKHANLẸN

8. Ranmhude Jesu lẹn otọ Ọta akhasẹ nan khale rẹji ọle, be ọ rẹ rẹkpa ọle yẹ rẹ noo ẹghe nọnsọle nọnsẹn?

⁸ Jesu lẹn ebi ọta akhasẹ ne ribhi Baibo ha rẹ munsẹ yẹ. Ọle wo lẹn ghe ikpe ea bi ukhiọnmhẹn ọle ha rẹ lu iwẹnna itẹmhọn Osẹnobulua. (Dan. 9:​26, 27) Ọle yẹ lẹn ọta akhasẹ nan khale rẹji ẹghe nin ọle ha rẹ yu, bi ebi ọle ha rẹ yu yẹ. (Luk 18:​31-34) Ranmhude ghe Jesu lẹn ebi a khale rẹji ọle, ọle da wo noo ẹghe nọnsọle nọnsẹn. Ranmhude ọnan, ọle da wo re ọyaya ha lu iwẹnna itẹmhọn Osẹnobulua nan mun nanlẹn, beji ọle ha da sabọ lu ọle fo.

9. Ahamiẹn mhan lẹn ọta akhasẹ ne ribhi Baibo nọnsẹn, be ọ ha rẹ rẹkpa mhan yẹ rẹ re ọyaya ha tẹmhọn Osẹnobulua?

⁹ Mhan ha lẹn otọ ọta akhasẹ ne ribhi Baibo nọnsẹn, ọ ki rẹkpa mhan rẹ manman re ọyaya ha lu iwẹnna itẹmhọn Osẹnobulua. Mhan lẹnmhin ghe ọne agbọn nan dẹ kẹ kpẹn. Baibo tẹmhọn ebi ẹbho ha rẹ ha lu emhin yẹ bhi ẹghe ọkike ọsi ọne agbọn nan, bi emhin kẹkẹ ne da ha sunu. Mhan wo ha daghe ebi ene akhasẹ rẹ ha munsẹ yẹ ẹlẹnan. Akhasẹ ne ribhi Baibo yẹ rẹman ghe “bhi ẹghe ọkike”, ojie ọsi nọt bi ojie ọsi saot dẹ ko ha ne egbe khọnlẹn. Mhan lẹnmhin ghe Anglo-American World Power bi Russia bi ene rẹkpa ele, ne ha ne egbe ele khọnlẹn ọne akhasẹ nan ha tẹmhọnlẹn. (Dan. 11:40) Mhan yẹ lẹnmhin ghe Anglo-American World Power mundia nin oẹ ọsi amanzẹ nan tẹmhọnlẹn bhi Daniel 2:​43-45. Beji ọne ọta akhasẹ rẹman, mhan wo rẹọbhọ ghe bhi ẹghe nọn bha yẹ ree gbe, Ejele nọnsi Osẹnọbulua dẹ dunmhun ejele ọsi eria a. Ene ọta akhasẹ nan rebhe rẹman ghe ẹghe ọkike ọsi ọne agbọn nan mhan ki da nyẹnlẹn. Bhiriọ, ọkhẹke nin mhan manman ha noo ẹghe nọnsẹmhan nọnsẹn rẹ lu iwẹnna itẹmhọn Osẹnobulua.

10. Uwedẹ ebhebhe nela ọta akhasẹ ne ribhi Baibo ha rẹ sabọ rẹkpa mhan yẹ rẹ situa ha lu iwẹnna itẹmhọn Osẹnobulua?

¹⁰ Ọta akhasẹ kẹkẹ ne ribhi Baibo yẹ wo rẹkpa mhan rẹ lẹn uhọnmhunje kpataki nọn khẹke nin mhan wewe man ẹbho. Obhio mhan nin okhuo ọkpa natiọle Carrie nọn lu iwẹnna oga bhi Dominican Republic da yọle: “Mẹn ha ria eria nyan ive kẹkẹ nin Jehova vele rẹji ẹghe odalo, ọ manman wo re ọne ọhubhudu nin mẹn rẹ ha wewe ọle man ẹbho.” Ọle da yẹ yọle: “Ẹghe nọn hi ki rẹ khin nin mẹn rẹ daghe ọkakale kẹkẹ nin ẹbho kuẹlo da bhi iẹnlẹn, ọ rẹkpa mẹn rẹ lẹn ghe ọ i yi mẹn ọkpa Jehova ve ọne ive nan nan, ọ yẹ rẹtẹ ele.” Ọta akhasẹ kẹkẹ ne ribhi Baibo rẹkpa mhan rẹ lẹn ghe ọ bha khẹke nin mhan ha siegbe re ikeke rẹ lu ọne iwẹnna itẹmhọn Osẹnobulua nan, ranmhude Jehova wo rẹkpa mhan rẹ lu ọle. Leila nọn nyẹnlẹn bhi Hungary da yọle: “Ẹmhọn ne ribhi Isaiah 11:​6-9, manman wo re ọne ọhubhudu nin mẹn rẹ dọ tẹmhọn Osẹnobulua mhan ẹbho, rẹ dọ sẹbhi ẹbho nọn diabe ghe ele i da miẹn ọlẹn ọbhi egbe. Mẹn lẹnmhin ghe Jehova dẹ sabọ rẹkpa ọria nọn hi ki rẹ khin rẹ fidenọ.” Obhio mhan ọkpa natiọle Christopher, nọn nyẹnlẹn bhi Zambia da yọle: “Beji Mak 13:10 rẹman, a wo ha wewe ọne ọta nọn mhẹn nabhi ọne otọ agbọn nan rebhe. Ọ ti mẹn bhọ ghe mẹn wo deba ha mun ọne ọta akhasẹ nan sẹ.” Ọta akhasẹ nela re ọhubhudu nin uwẹ rẹ ha tẹmhọn Osẹnobulua?

ỌLE DA MUN UDU TẸ JEHOVA NỌN RẸKPA ỌLE

11. Bezẹle nọn da khẹke nin Jesu mun udu nyan Jehova nọn rẹkpa ọle beji ọle ha da sabọ re ọyaya ha lu iwẹnna itẹmhọn Osẹnobulua? (Luk 12:​49, 53)

¹¹ Jesu wo rẹọbhọ ghe Jehova dẹ wo ha rẹkpa ọle rẹ ha re ọyaya lu iwẹnna itẹmhọn Osẹnobulua. Arẹmiẹn ghe Jesu wo ha re ekpẹn ne ẹbho zilo bhi iwẹnna itẹmhọn Osẹnobulua nin ọle ha lu, ọle lẹnmhin ghe ọne ọta nọn mhẹn ọsi Agbejele nin ọle ha wewe dẹ re ẹbho eso ha khọẹkẹ. (Tie Luk 12:​49, 53.) Ene mun ọkalo bhi oga bha hoẹmhọn ebi Jesu ha man ẹbho le. Bhiriọ, ele da wo ha dọnmhegbe igba ne bunbun nin ele rẹ gbe ọle a. (Jọni 8:59; 10:​31, 39) Ọrẹyiriọ, Jesu da yẹ wo ha lu iwẹnna itẹmhọn Osẹnobulua ranmhude ọle lẹnmhin ghe Jehova ri ọle bhi ikeke. Ọle bhọ da yọle: “Ọ iyi mẹn ọkpa khian. Aba imẹn nọn je imẹn ne imẹn dia. . . . Ọle bha zẹ mẹn obọ. Ranmhude, ebe ti ọle bhọ mẹn lu ẹghe rebhe.”—Jọni 8:​16, 29.

12. Be Jesu rẹ mun edibo nesọle egbe ọbhi otọ yẹ rẹ sẹyẹ ha tẹmhọn Osẹnobulua arẹmiẹn ọ dẹ re ẹkẹ khọ ẹbho?

¹² Jesu da ji edibo nesọle lẹn ghe, ele dẹ sabọ mun udu nyan Jehova nọn rẹkpa ele. Ẹghe-ẹghe ọle rẹ ha taman ele ghe Jehova dẹ rẹkpa ele sade ele kuẹlo da ekpokpo. (Mat. 10:​18-20; Luk 12:​11, 12) Ranmhude Jesu lẹnmhin ghe ẹmhọn Agbejele nin edibo nesọle ta dẹ re ẹkẹ ha khọ ẹbho ne bunbun, ọle da yọle nin ele ha babegbe. (Mat. 10:16; Luk 10:3) Ọle da yẹ ji ele lẹn ghe ahamiẹn ẹbho bha re ehọ ọbhi ebi ele ta, nin ele hẹi sua ẹbho ọbhọ rẹ lu iriọ. (Luk 10:​10, 11) Rẹ deba ọnin, ọle da yẹ taman ele nin ele nẹ diọbhi eji ọbhebhe sade ẹbho kpokpo ele. (Mat. 10:23) Arẹmiẹn ghe Jesu wo ha mun udu nyan Jehova, yẹ ha mhọn ọyaya bhi iwẹnna itẹmhọn Osẹnobulua, ọle bha ha tobọle mun egbọle ọbhi okhẹnan.—Jọni 11:​53, 54.

13. Bezẹle nin uwẹ ha da sabọ rẹọbhọ ghe Jehova dẹ rẹkpa uwẹ?

¹³ Ẹbho ne bunbun ẹlẹnan manman wo kpokpo mhan ranmhude iwẹnna itẹmhọn Osẹnobulua nin mhan lu, bhiriọ, mhan manman guanọ urẹkpa nọnsi Jehova beji mhan ha da sabọ yẹ ha lu ọle. (Arẹm. 12:17) Bezẹle nin mhan ha da sabọ rẹọbhọ ghe Jehova dẹ gene rẹkpa mhan rẹ sabọ ha lu ọne iwẹnna itẹmhọn Osẹnobulua nan? Bha ji mhan fẹ erọnmhọn nin Jesu nanlẹn ghe nan gbẹn ọbhi Jọni uhọnmhọnlẹn 17. Jesu da bhii Jehova nin ọle gbẹloghe etuegbe nesọle, Jehova da gene họn erọnmhọn nọnsọle. Ebe ọsi Iwẹnna rẹkpa mhan rẹ daghe ebi Jehova rẹ rẹkpa etuegbe nesi Jesu yẹ beji ele ha da sabọ re ọyaya ha tẹmhọn Osẹnobulua arẹmiẹn a kpokpo ele. Bhi ọne erọnmhọn nin Jesu nan, ọle da yẹ bhii Jehova nin ọle gbega ẹbho ne da rẹọbhi ẹmhọn Agbejele nin etuegbe nesọle wewe. Uwẹ yẹ deba bhi ene ẹbho nin. Jehova yẹ wo wanniẹn erọnmhọn nọnsi Jesu rẹ dọ sẹbhi ẹlẹnan. Jehova dẹ yẹ rẹkpa uwẹ beji ọle rẹ rẹkpa ene etuegbe.—Jọni 17:​11, 15, 20.

14. Be mhan rẹ lẹn yẹ ghe mhan dẹ sabọ re ọyaya ha lu iwẹnna itẹmhọn Osẹnobulua? (Yẹ fẹ ifoto ghe.)

¹⁴ Beji ọkpẹnlẹn ọsi ọne agbọn nan rẹ manman ha sire, ọ sabọ rẹ manman ha nọghọ mhan rẹ re ọyaya ha tẹmhọn Osẹnobulua. Ọkpakinọn, Jesu ji mhan lẹn ghe ọle dẹ rẹkpa mhan rẹ sabọ miẹn ọne ẹsọn nan. (Luk 21:​12-15) Beji Jesu bi edibo nesọle lu, mhan dẹ re otọ nin ẹbho rẹ tobele zẹ si ele dẹ miẹn ẹmhọanta nin mhan taman ele ọbhi egbe. Mhan i da ha nin ele gbugan. Arẹmiẹn ghe a bha re otọ nin ibhio mhan bhi agbaẹbho eso rẹ ha lu iwẹnna itẹmhọn Osẹnobulua nin ele lu, ele yẹ wo sabọ lu ọne iwẹnna nan ranmhude Jehova ele mun udu nyan, ọ i yi ahu nọnsele. Beji Jehova rẹ re ahu nin Kristiẹn bhi ore nin ọhẹnhẹn rẹ sabọ lu iwẹnna nan mun nin ele, Jehova yẹ wo re ahu nin mhan ẹlẹnan nian, beji a ha da miẹn ghe mhan ki sabọ “tẹmhọn Osẹnobulua sotọ nọnsẹn” beji Jehova rẹ guanọ ọlẹn tee. (2 Tim. 4:17) Uwẹ dẹ sabọ ha mhọnlẹn bhi ọkhọle ghe uwẹ ha mun udu nyan Jehova, uwẹ ki sabọ re ọyaya ha lu iwẹnna itẹmhọn Osẹnobulua.

ỌLE DA RẸỌBHỌ GHE ẸBHO ESO DẸ KA ỌLE EHỌ.

15. Be rẹman ghe Jesu wo ha mhọnlẹn bhi ọkhọle ghe ẹbho dẹ ka ọle ehọ?

¹⁵ Jesu wo ha mhọnlẹn bhi ọkhọle ghe ẹbho dẹ ka ọle ehọ. Ọle zẹle nin ọle da wo re eghọnghọn ha lu iwẹnna itẹmhọn Osẹnobulua. Bhi ọsi ijiẹmhin, ukpe ọkpa ki gbera nin Jesu munhẹn ha tẹmhọn Osẹnobulua, ọle da dọ kere ghe ẹbho ne bunbun wo muegbe nin ele rẹ họn ọta nọn mhẹn. Ranmhude ọnan, ọle da re ele khọkhọ ebi a kọle nọn wolo, nọn sẹ ebi a ha koko. (Jọni 4:35) Akizẹbue, ọle da taman edibo nesọle yọle: “emhin nan ha khuan bhi ugbo wo manman bun.” (Mat. 9:​37, 38) Bhi ẹghe ọbhebhe, ọle da gbo kie taman ele yọle: “Emhin nan ha khuan bhi ugbo wo manman bun . . . Bha bhii ọnọn nyan ọne ugbo nin ọle je ẹbho re ne dọ khuan ene emhin.” (Luk 10:2) Jesu wo ha mhọnlẹn bhi ọkhọle ghe ẹbho dẹ kaehọ ẹmhọanta nin ọle ha wewe man ele. Ẹghe nin ọle ki rẹ miẹn ẹbho ne kaehọ, ọ da wo gene re ọle ha ghọnghọn.—Luk 10:21.

16. Be arẹkhọkhọ nin Jesu tẹmhọnlẹn rẹ rẹkpa mhan rẹ lẹn ghe, ẹbho dẹ ka mhan ehọ bhi iwẹnna itẹmhọn Osẹnobulua? (Luk 13:​18-21) (Yẹ fẹ ifoto ghe.)

¹⁶ Jesu da taman edibo nesọle nin ele ha mhọnlẹn bhi ọkhọle ghe ẹbho dẹ ka ele ehọ. Ọnan da rẹkpa ele rẹ re ọyaya ha tẹmhọn Osẹnobulua. Bhi ọsi ijiẹmhin, bha ji mhan zilo nyan arẹkhọkhọ eva nin ọle tẹmhọnlẹn. (Tie Luk 13:​18-21.) Bhi ọkpa bhi ene arẹkhọkhọ, Jesu da re itẹmhọn Agbejele rẹ khọkhọ ikpẹ mọstad khere nan re kọ, nọn yẹ wanre dọ kiẹn udede eran. Ọnan rẹman ghe ẹbho ne bunbun dẹ miẹn ọne ẹmhọanta ọbhi egbe, sẹyẹ, emhin soso i da sabọ mun idobolo ọbhọ nin ọnan hẹi sunu. Bhi arẹkhọkhọ nọnzi eva, Jesu da re ẹmhọn Agbejele rẹ khọkhọ yisti, ranmhude a dẹ tẹmhọn Agbejele na bhi otọ agbọn nan rebhe. Sẹyẹ, ọ dẹ re ẹbho ne bunbun fidenọ, aharẹmiẹn ẹbho i da kẹ daghe ọne ufidenọ nan. Iriọ Jesu rẹ rẹkpa edibo nesọle rẹ daghe ọle ghe, ẹmhọn Agbejele nin ele wewe dẹ rẹkpa ẹbho ne bunbun.

17. Bezẹle nin mhan da mhọnlẹn bhi ọkhọle ghe ẹbho dẹ ka mhan ehọ bhi iwẹnna itẹmhọn Osẹnobulua?

¹⁷ Mhan ha daghe uwedẹ nin ẹmhọn Agbejele rẹ manman ha rẹkpa ẹbho bhi otọ agbọn nan rebhe, ọ manman wo re ọne ọyaya nin mhan rẹ situa ha lu iwẹnna itẹmhọn Osẹnobulua. Bhi ukpe-ukpe, ẹbho ne bunbun vae bhi Ayere Ọsi Uyumhin Nọnsi Jesu, yẹ deba mhan luẹ Baibo. Usun ẹbho ne bunbun wo ha mianmẹn yẹ deba mhan bhi ọne iwẹnna itẹmhọn Osẹnobulua nan. Mhan bha lẹn eka ẹbho ne ha yẹ miẹn ọne ẹmhọanta nin mhan wewe ọbhi egbe, ọkpakinọn, mhan lẹnmhin ghe Jehova wo ha ne ẹbho ne bunbun koko, ne ha miuhọnmhọn bhi ẹghe ekpokpo nọn khua. (Arẹm. 7:​9, 14) Jehova nọn nyan ọne ugbo lẹn ghe, ẹbho ne bunbun dẹ sẹyẹ miẹn ọne ẹmhọanta ọbhi egbe. Bhiriọ, ọkhẹke nin mhan rebhe situa yẹ ha lu ọne iwẹnna itẹmhọn Osẹnobulua.

18. Be mhan ho nin ẹbho daghe bhi egbe mhan?

¹⁸ A wo lẹn edibo nesi Jesu ọbhi ẹbho ne re ọyaya lu iwẹnna itẹmhọn Osẹnobulua. Bhi ọsi ijiẹmhin, ẹghe nin ẹbho rẹ daghe ebi edibo nesi Jesu rẹ re ọyaya bi izebhudu ha talọ yẹ, “ele da dọ yere ghe, ele ka gene ha rẹkhan Jesu.” (Iwẹn. 4:13) Mhan yẹ guanọ nin mhan re izebhudu bi ọyaya rẹ ha tẹmhọn Osẹnubulua, bhiriọ, ẹbho ki yẹ daghe ọle ghe Jesu mhan re egbe khọkhọ.