Be Urẹọbhọ Nin Uwẹ Mhọn da Ive Nesi Jehova Ziẹn Sẹ Yẹ?

Joshua bi Solomon da tale ghe ọkpa iribhi ive nin Jehova vele nọn bha munsẹ. (Jos 23:14; 1Ki 8:56) Ọne ọta ẹmhọn-ata nin ene itue eva nan tale, deba emhin ne ha sabọ rẹkpa mhan ha mhọn urẹọbhọ nọn ziẹnlẹn.—2Co 13:1; Tit 1:2.

Be iJehova rẹ mun ive nọnsọle sẹ yẹ bhi ẹghe nọnsi Joshua? Uwẹ bi azagba-uwa nọnsẹ ko ghe ọne ividio natiọle ‘Ọkpa Iribhọ Nọta Nọn Bhasẹ.’ Bha ki ghe ọle fo, bha re ewanniẹn ọbhi ene inọnta nan: (1) Be imhẹn arẹ regbe khọkhọ iRahab bhi uwedẹ nin ọle rẹ re urẹọbhọ nọnsọle man yẹ? (Heb 11:31; Jas 2:24-26) (2) Be ijiẹmhin nọnsi Achan rẹ rẹman yẹ ghe akan-ehọ si ọkakale re? (3) Arẹmiẹn ghe eria ne guẹ ebi arẹ khọnlẹn yẹ, ọle ikpea nesi Gibeon khin, bezẹle nin ele da hiẹ Joshua nin ele da sabọ deba ibhokhan Izrẹl ha ribhi ọfure? (4) Be ọta nọnsi Jehova rẹ munsẹ yẹ ẹghe nin enijie isẹn nesi ibhokhan Amorite rẹ mun okhọn bu ibhokhan Izrẹl? (Jos 10:5-14) (5) Beji uwẹ rẹ mun ẹmhọn Agbejele nọnsi Jehova bi ikhiale nọnsọle kalo bhi iẹnlẹn nọnsẹ, uwedẹ nela Jehova sẹ rẹ rẹman uwẹ ghe ọle mundia nin uwẹ?—Mt 6:33.

Mhan ha ria eria nyan emhin nin Jehova sẹ lu, ebi ọle lu nian, bi ebi ọle khian dọ lu bhi ẹghe odalo, urẹọbhọ nin mhan mhọn da ive nọnsọle ki ha de ziẹn ọbhọ.—Ro 8:31, 32.