Khu Ọbhi Iwẹnna Oga Nin Uwẹ Rẹ Re Ogẹn Ji Jehova
“WOkpea ọkpa bhi ẹghe ẹdẹlẹ nọn gbẹn ebe da gbẹn yọle ghe, Ahamiẹn ọria bha lẹn eji ọle khian, ọle ida sabọ sẹbhi eji ọle khian. Ene ọta nan rẹman ghe, nin iẹnlẹn rẹ sabọ kiọnlẹn nin ọria, ọkhẹke nin ọne ọria ha mhọn emhanmhan.
Baibo tẹmhọn ijiẹmhin ọsi ẹbho ne bunbun man mhan ne ha mhọn emhanmhan nin ele munsẹ. Ebe sẹbhi ikpe 50 Noa gbe bhi iwẹnna nin ọle lu, nin ọle rẹ sabọ “bọn okọ nọn ha hinmhin azagba-uwa nọnsọle.” Mozis nin akhasẹ da “denọ ẹlo da elele nin ọle ha miẹn bhi ẹghe odalo.” (Hebrews 11:7, 26) Sẹyẹ, Jehova da mun ẹsọn nin Josua rẹ dọ khọn ibhokhan Kenan miotọ.—Deuteronomy 3:21, 22, 28; Joshua 12:7-24.
Pọl nin odibo yẹ wo ha mhọn emhanmhan. Ọle lẹnmhin ghe Jesu yọle ghe, “ọne ọta nọn mhẹn ọsi Agbejele nan, a dẹ wewe ọle na bhi eji eria hi ki rẹ ha ye bhi ọne otọ nan rebhe.” (Matthew 24:14) Jesu da taman Pọl nin ọle dọ tẹmhọnlẹn man ẹbho. Sẹyẹ, ọle da mun agbotu gbọ bhi ije kẹkẹ.—Acts 9:15; Colossians 1:23.
Bhi ọsi ẹmhọanta, ẹbho nesi Jehova sẹ wo re ogẹn ji Jehova bhi uwedẹ nin ele rẹ ha mhọn emhanmhan yẹ mun ọlẹn sẹ. Be mhan ha rẹ sabọ ha mhọn emhanmhan yẹ bhi iwẹnna oga? Emhanmhan nela mhan ha sabọ khu ọi? Be mhan ha lu rẹ sabọ mun ọlẹn sẹ?
Be Mhan Ha Rẹ Sabọ Ha Mhọn Emhanmhan Nọn Khẹke Yẹ?
Ẹbho dẹ sabọ ha mhọn emhanmhan kẹkẹ ne bunbun. Emhanmhan ọsi ẹbho ne ga Jehova dikẹ bhi ọsi ẹbho ne iga Jehova bhi ọne agbọn nan. Emhanmhan ọsi ẹbho ne bunbun bhi ọne agbọn nan ẹlẹnan hi, nin ele rẹ ha mhọn igho bi ahu. Ọ bha khẹke nin ọnan ha yi emhanmhan nọnsẹmhẹn. Ogẹn mhan re ji Jehova, sade mhan mhọn emhanmhan nọn ha rẹkpa mhan rẹ sabọ ga ọle. (Matthew 6:33) Ranmhude ghe mhan hoẹmhọn Osẹnobulua bi ẹbho, ọle zẹle nin mhan da mhọn ene emhanmhan nan.—Matthew 22:37-39; 1 Timothy 4:7.
Mhan sabọ rẹ ha mhọn emhanmhan nin mhan rẹ lu re alo bhi uwedẹ nin mhan rẹ ga Jehova, la nin mhan rẹ ha mhọn ikpẹ esili ne khẹke nin kristiẹn ha mhọnlẹn. Ọkpakinọn, ebi ọ hi ki rẹ khin nin mhan mhanmhanlẹn rẹ lu, ọkhẹke nin mhan mhanmhan ele ranmhude mhan hoẹmhọn Jehova bi ẹbho. Arẹmiẹn mhan mhanmhan ene emhin nan rẹ lu, ọ ilẹkhẹ nan rẹ mun ele sẹ ẹghe eso. Be ha rẹkpa mhan rẹ sabọ mun emhanmhan nọnsẹmhan sẹ?
Ọkhẹke Nọn Manman Ha Ri Mhan bhi Ọkhọle Rẹ Mun Emhanmhan Nọnsẹmhan Sẹ
Mhan dẹ sabọ luẹ emhin bhi uwedẹ nin Osẹnobulua rẹ mun emhanmhan nọnsọle sẹ rẹ man ọne agbọn nan. Jehova da mhanmhan iwẹnna nọnsọle ọbhi ẹghe kẹkẹ, nin ọle tiọle ukpẹdẹ. (Genesis 1:5, 8, 13, 19, 23, 31) Ọle wo ha mhọn emhanmhan ọsi ebi ọle ha lu bhi ukpẹdẹ-ukpẹdẹ. Sẹyẹ, ọle da wo mun ele sẹ. (Revelation 4:11) Jobu yọle: “Ahamiẹn [Jehova] ho nin ọle lu emhin, ọle ki lu ọle.” (Job 23:13) Edandan iribhọ ghe ọ dẹ wo re Jehova ha ghọnghọn, ẹghe nin ọle rẹ daghe emhin rebhe nin ọle manlẹn rẹ sẹbhọ ghe ọle da yọle ghe ele wo mhẹn an.—Genesis 1:31.
Nin mhan da sabọ mun emhanmhan nọnsẹmhan sẹ, ọ yẹ khẹke nin mhan manman ha mhọn ọne ọkhọle rẹ mun ele sẹ. Be ha rẹkpa mhan rẹ manman ha mhọn ọne ọkhọle nan? Ọkuẹsẹ Osẹnobulua man ọne otọ nan fo, ọle lẹnmhin ghe ọne otọ nan dẹ wo ha mhọn-ọse. Ahamiẹn mhan re egbe khọkhọ Jehova, yẹ ria eria nyan elele nin mhan ha miẹn bhọ sade mhan sabọ mun emhanmhan nọnsẹmhan sẹ, ọ ki ha ghọn mhan rẹ mun ele sẹ. Ọnan hi ebe sunu ji Tony nọn ribhi ikpe 19. Ẹghe nin Tony rẹ rẹnẹ sẹbhi bẹtẹ, ọle da manman ria eria nyan emhin rebhe nin ọle daghe bhi enin. Rẹ na bhi ọne ẹghenin ha vade, ọta nin Tony ki ha nọọn egbe ọle hi, ‘Be ọ ha diayẹ sadẹ ọria nyẹnlẹn yẹ ga bhi enan?’ Ranmhude ghe ọle wo ha ria ẹmhọnlẹn, ọ da ha ghọn ọle rẹ dọ ga bhi bẹtẹ. Bhiriọ, ọle da wo ha wẹnna kaka beji ọle ha da mun emhanmhan nọnsọle sẹ. Ikpe eso ki gbera, a da tiọle nin ọle dọ ga bhi bẹtẹ. Ọnan da wo re ọle manman ha ghọnghọn!
Ahamiẹn mhan deba ibhiọ mhan ne sabọ mun emhanmhan nọnsele sẹ ha mun obọ, ọ dẹ sabọ re mhan ha mhọn ọne ọkhọle rẹ mun emhanmhan nọnsẹmhan sẹ. Ẹghe nin Jayson nọn ribhi ikpe 30 rẹ ha ribhi obhokhan, ọ bha ha yẹẹ ọle rẹ ha yo inẹbhọ. Khere-khere, ọle da dọ hoẹmhọnlẹn rẹ ha dagbare bhi inẹnbhọ. Ọle ki yo isiku fo, ọle da dọ ha lu iwẹnna ọkanẹfan ọsi ẹghe rebhe. Be rẹkpa Jayson rẹ ha mhọn ọne ọkhọle rẹ lu iwẹnna ọkanẹfan? Ọle da yọle: “Emhin nọn rẹkpa mẹn hi, nin mẹn rẹ ha deba ibhio mhan ne lu iwẹnna ọkanẹfan yo inẹbho yẹ deba ele talọ.”
Mhan Ha Gbẹn Emhanmhan Nọnsẹmhan Ọbhi Ebe, Ọ Dẹ Rẹkpa Mhan Rẹ Mun Ọlẹn Sẹ
Mhan ha ta ebi mhan ha lu dagbare, ọ ki lẹkhẹ nin mhan rẹ lẹn otọle. Bhi Baibo, Solomọn da rẹman ghe ọta ẹwanlan dẹ sabọ rẹkpa mhan rẹ zẹ emhin ne mhẹn rẹ lu bhi iẹnlẹn. (Ecclesiastes 12:11) Mhan ha gbẹn ene ọta ọbhi otọ, mhan ki ha ria eria nyan ele. Ọnan zẹle nin Jehova da taman ene ijie ne ribhi otọ Izrẹl, nin ele gbẹn ọne uhi ọbhi ebe ọbhebhe nin egbe ele. (Deuteronomy 17:18) Mhan dẹ sabọ gbẹn emhanmhan nọnsẹmhan ọbhi ebe, bi ebi mhan ha rẹ mun ọlẹn sẹ yẹ. Mhan dẹ yẹ sabọ gbẹn ọnọghọ nọn ha sabọ nanbhọre ọbhi ebe, bi ebi mhan ha rẹ sabọ khọnlẹn miotọ yẹ. Sẹyẹ, mhan ha guanọ otọ ebi mhan ho nin mhan lu fẹghe, yẹ taman ẹbho nin ele rẹkpa mhan, ọ ki lẹkhẹ nin mhan rẹ sabọ mun emhanmhan nọnsẹmhan sẹ.
Ọ reele nin Geoffrey mọn da lu iwẹnna ọkanẹfan kpataki bhi otọ Asia. Ọle ki ha mhọn emhanmhan, ọnan da rẹkpa ọle rẹ dẹ ọkhọle re. Ẹghe nin okhuo ọle rẹ yu bhi ọsi eguaguako, iẹnlẹn bha zẹwẹ lẹkhẹ nanlẹn. Ọ re ọle ẹghe ọle kuẹ sabọ fi emhin denọ. Ọle da zẹ rẹ ha mhọn emhanmhan nọn ha rẹkpa ọle rẹ sabọ ha re ẹghe nọnsọle rebhe lu iwẹnna itẹmhọn Osẹnobulua. Ọle da gbẹn emhanmhan nọnsọle ọbhi ebe, yẹ nan erọnmhọn nin Osẹnobulua rẹkpa ọle rẹ mun emhanmhan nọnsọle sẹ. Geoffrey da ha guanọ nin ọle ha mhọn itue ea nin ọle ha man ele Baibo ọkuẹsẹ uki sotọ. Ukpẹdẹ-ukpẹdẹ, ọle ki ha fẹ emhin nin ọle lu ghe, sẹyẹ, ẹghe nọn hi ki rẹ khin nin ikpẹdẹ igbe rẹ gba, ọle ki fẹ ebi ọle rẹ ha lu re alo yẹ. Ọle be sabọ mun emhanmhan nọnsọle sẹ? Ehe. Ọle wo manman ha ghọnghọn ẹghe nin ọle rẹ miẹn itue enẹn nin ọle ha man ele Baibo!
Ha Mhọn Obhi Emhanmhan Khere Nin Uwẹ Ha Sabọ Munsẹ, Beji Uwẹ Ha Da Sabọ Mun Ene Kpọnọ Sẹ
Emhanmhan eso sabọ rẹ diabe emhin nin mhan ida sabọ munsẹ. Tony nin mhan ka tẹmhọnlẹn nọn ki ga bhi bẹtẹ ọsi Esali Jehova, bha rẹ riale ghe ọle dẹ sabọ ga bhi enin. Ebezẹle nin Tony da ha re iriọ ria eria hi, ranmhude, emhin ne bunbun ribhọ nin ọle ha fi denọ bhi iẹnlẹn, sẹyẹ ọle bha sẹ re egbe guẹ nin Osẹnobulua. Ọkpakinọn, ọle da fi iẹnlẹn nọnsọle denọ beji ọle ha da sabọ mianmẹn. Ọle ki mianmẹn fo, ọle da zẹ nin ọle rẹ lu iwẹnna ọkanẹfan ọsi ẹghe eso bi ọsi ẹghe rebhe. Ọle da yẹ gbẹn ẹdẹ nin ọle guanọ nin ọle munhẹn ha re obọ rẹkhan ene emhanmhan nan ọbhi kalẹnda nọnsọle. Ọle ki sẹ lu iwẹnna ọkanẹfan, ọle da dọ daghe ọle ghe, ọle dẹ sabọ ga bhi bẹtẹ.
Mhan dẹ sabọ mun emhanmhan nesẹmhan ne kpọnọ sẹ sade mhan re ọbhi emhanmhan munhẹn. Mhan ha sabọ mun emhanmahn ne khere sẹ, mhan ki daghe ebi mhan sẹ lu sẹ yẹ, bhiriọ, ọnan ki re izebhudu nin mhan rẹ mun emhanmhan nesẹmhan ne kpọnọ sẹ. Ahamiẹn mhan fẹ ebi mhan rẹ ha lu re alo yẹ ẹghe-ẹghe, ọ ki rẹkpa mhan rẹ manman ha wẹnna kaka beji mhan ha da sabọ mun emhanmhan nọnsẹmhan sẹ. Mhan ha nan erọnmhọn ji Osẹnobulua ẹghe rebhe nin ọle rẹkpa mhan rẹ mun emhanmhan nọnsẹmhan sẹ, ọle ki rẹkpa mhan. Pọl da taman mhan nin mhan “ha nan erọnmhọn ẹghe rebhe.”—1 Thessalonians 5:17.
Hẹi Ji Egbe Lo Uwẹ, Manman Ha Wẹnna Kaka Rẹ Mun Emhanmhan Nọnsi Uwẹ Sẹ
Arẹmiẹn mhan mhọn emhanmhan nọn mhẹn bi ọne ọkhọle nin mhan rẹ mun ọle sẹ, emhanmhan eso yẹ ribhọ nọn diabe ebi mhan ida sabọ munsẹ. Mhan dẹ sabọ miẹn emhin luẹ bhi ijiẹmhin ọsi Maki nin odibo, nan yẹ tiọle Jọni. Ọle da ha guanọ nin ọle rẹkhan Pọl ha khian iwẹnna misiọnari nọnzeva nin ọle khian. Ọkpakinọn, Pọl bha ka re ọle rẹkhan egbe. Edandan iribho ghe ọnan dẹ wo ba Maki bhi egbe! (Acts 15:37-40) Maki da luẹ emhin bhi ọne ebe sunu nan, bhiriọ ọle da fi emhanmhan nọnsọle denọ. Ọ wo khia bhi ẹlo a ghe, ọle gene luẹ emhin bhọ, ranmhude, akizẹbue Pọl da tẹmhọn esili rẹji ọle. Sẹyẹ, ọle da deba Pita nin Odibo wẹnna bhi Babilọn. (2 Timothy 4:11; 1 Peter 5:13) Maki da wo ha mhọn isẹhoa kpataki. Jehova da noo ọle rẹ gbẹn ebe sunu bhi iẹnlẹn nọnsi Jesu bi iwẹnna itẹmhọn Osẹnobulua nin ọle lu.
Mhan dẹ yẹ sabọ miẹn ọnọghọ kẹkẹ, beji mhan rẹ dọnmhegbe rẹ mun emhanmhan nọnsẹmhan sẹ. Ahamiẹn mhan miẹn ọnọghọ, mhan hẹi ji egbe lọ mhan. Ọkhẹke nin mhan ha fẹ ebi mhan rẹ ha lu re alo yẹ, yẹ fi emhin eso ne khẹke denọ bhi emhanmhan nọnsẹmhan. Ọkhẹke nin mhan ha mhọn ọnọn ọkhọle rẹ mun emhanmhan nọnsẹmhan sẹ, mhan ha yẹ ha wẹnna kaka rẹ sabọ mun ọne emhanmhan sẹ. Solomọn nin ojie da yọle: “Mun ebi uwẹ lu rebhe ọbhi obọ nọnsi Jehova, emhanmhan nesẹ ki kiọnlẹn.”—Proverbs 16:3.
Ọ ida wo ha lẹkhẹ nin mhan rẹ mun emhanmhan nọnsẹmhan sẹ ẹghe rebhe. Bhi ọsi ijiẹmhin, mhan sabọ rẹ ha khọnmhọn, la mhan sabọ rẹ ha gbẹloghe azagba-uwa nọnsẹmhan. Ọkpakinọn, ọkhẹke nin mhan yere ghe, emhanmhan nọn khua nin mhan khu ọi hi, iẹnlẹn ighegheghe. (Luke 23:43; Philippians 3:13, 14) Be mhan ha rẹ sabọ miẹn iẹnlẹn ighegheghe yẹ? Jọni nin odibo yọle: “Ọria nọn lu iho nọnsi Osẹnobulua dẹ ha ribhọ bhi ighegheghe.” (1 John 2:17) Arẹmiẹn idia nin mhan yẹ ida ji mhan da mun emhanmhan nọnsẹmhan sẹ, mhan dẹ yẹ sabọ “ha mun ofẹn Osẹnobulua ọsi ẹmhọanta, yẹ re obọ rẹkhan uhi nesọle.” (Ecclesiastes 12:13) Emhanmhan nin mhan mhọnlẹn rẹ lu re alo bhi oga, dẹ sabọ rẹkpa mhan rẹ ha lu iho nọnsi Osẹnobulua. Bhiriọ, bha ji mhan re ene emhanmhan nan ha gẹn Aman nọn man emhin.
[Ẹkpẹti]
Emhanmhan Eso Nin Uwẹ Ha Sabọ Khu Ọi
○ Ha tie Baibo ẹdẹdẹ
○ Ha tie The Watchtower bi Awake! nọn dagbare
○ Ha nan erọnmhọn ẹghe rebhe
○ Ha re ikpẹ ọsi ẹlinmhin nọn khiale man
○ Ha lu re alo bhi oga
○ Ha lu re alo bhi uwedẹ nin uwẹ rẹ tẹmhọn Osẹnobulua, yẹ man ẹbho Baibo
○ Luẹ ebi a rẹ noo ifoni rẹ tẹmhọn Osẹnobulua yẹ, ebi a rẹ tẹmhọn Osẹnobulua yẹ bhi eji a da dọ eki, bi ebi a re lu iwẹnna itẹmhọn Osẹnobulua yẹ nan bha muegbe ọle ya