12 Ha Mhọn Emhin Nin Uwẹ Khu Ọi

EBI A RE ỌLE TA

Ọria nọn mhọn emhanmhan nin ọle khu ọi igbe obọ bhi egbe ha khẹ nin ọne emhanmhan wo de ọbhọ nanlẹn. Ọle dẹ mhanmhan ebi ọle ha rẹ mun ọne emhanmhan sẹ yẹ, yẹ lu rẹkhan ọlẹn. Ọle dẹ wẹnna kaka nin ọne emhanmhan da sabọ de odẹ rẹ nanlẹn.

Emhin nin uwẹ khu ọi sabọ ha yi emhanmhan nin uwẹ ha sabọ munsẹ bhi ẹkẹ ikpẹdẹ eso, uzana eso, uki eso, la, ikpe eso. Ahamiẹn uwẹ mhọn emhanmhan nọn ha sabọ re uwẹ ẹghe nọn tanlẹn, uwẹ sabọ rẹ gha ọle a, nin ọne ẹsọn da fo uwẹ.

EBEZẸLE NỌN DA KHẸKE

Uwẹ ha sabọ mun emhanmhan ọkpa sẹ, ọ ki ha hu uwẹ bhi udu rẹ khu ọbhi emhanmhan ọbhebhe. Ọ ki yẹ ziẹn ikolu nin uwẹ bi imọẹ nesẹ ko mhọn, yẹ manman re uwẹ ha ghọnghọn.

Uwẹ ki ha mhọn ọhubhudu: Ahamiẹn uwẹ sabọ mun emhanmhan nọn bha nọghọ gbe sẹ, uwẹ ki ha mhọn ọne ọhubhudu nin uwẹ rẹ khu ọbhi emhanmhan nọn kaka nẹ ọne uwẹ ka lu. Sẹyẹ, ofẹn ida ha mun uwẹ rẹ lu ebe khẹke sade ibo ẹ ho nin ele sua uwẹ ọbhọ rẹ lu emhin nọn imhẹn.

Uwẹ ki ziẹn ikolu nin uwẹ bi imọẹ nesẹ ko mhọn: Ọ ti ẹbhọ bhọ nin ele rẹ ne ọria nọn mhọn emhanmhan ha lu ọmọẹ. Ọria nọn mhọn emhanmhan hi ọria nọn lẹn ebi ọle guanọ, yẹ khu ọbhọ nin ọne emhin da sabọ sẹ ọle obọ. Bhi ọsi ẹmhọanta, uwedẹ ọkpạ nin mhan ha rẹ sabo ziẹn ikolu nin mhan bi ọria ko mhọn hi, sade mhan ko ha khu ọbhi emhanmhan ọkpa.

Uwẹ ki ha ghọnghọn: Ahamiẹn uwẹ khu ọbhi emhanmhan nin uwẹ mhọn, nin ọne emhanmhan da de odẹ re, uwẹ ki wọ ha ghọnghọn.

“Ọ yẹẹ mẹn nin rẹ ha mhọn emhanmhan nin mẹn khu ọi. Ọ rẹkpa mẹn rẹ ha mhọn emhin nin mẹn lu bhi obọ. Ahamiẹn uwẹ sabọ mun emhanmhan nọnsẹ sẹ, uwẹ ki wo ha ghọnghọn. Uwẹ ki ha ghọnghọn ghe, uwẹ sabọ re ọle sotọ.”​—Christopher.

ADIA NỌN RIBHI BAIBO: “Ọria nọn ghe ahoho ida kọ emhin, sẹyẹ, ọria nọn ghe okhun ida rọ emhin nan kọle.”​—Ecclesiastes 11:4.

EBI UWẸ HA SABỌ LU

Lu ene emhin ea nan nin uwẹ rẹ sabọ ha mun emhanmhan nesẹ sẹ.

Gbẹn emhanmhan nesẹ ọbhi otọ. Gbẹn ele ọbhi otọ ọsegbe-ọsegbe beji uwẹ ho nin uwẹ rẹ mun ele sẹ.

Mhanmhan ebi uwẹ ha rẹ mun ele sẹ yẹ. Gbẹn ene emhin nan rẹkhan ọdeọde bhi ene emhanmhan nesẹ:

• Ukpẹdẹ nin uwẹ re ọbhi otọ nin uwẹ rẹ mun ele sẹ.

• Emhin kẹkẹ nin uwẹ ha lu nin uwẹ rẹ mun ele sẹ.

• Emhin ne ha sabọ de uwẹ idobolo bi ebi uwẹ ha rẹ khọn ele yẹ.

Wẹnna ọbhọ. Hẹi mundia ha khẹ nin emhin rebhe gba fo ọkuẹsẹ uwẹ munhẹn. Nọọn egbe ẹ, ‘Be hi emhin ọhẹnhẹn nin mẹn ha lu nin ọne emhanmhan nan da sabọ de odẹ re?’ Wo munhẹn ha lu ọle. Ẹghe rẹ sẹ ẹghe, ha fẹ eji uwẹ sẹ sabọ lu sẹ bhi ọne emhanmhan.

ADIA NỌN RIBHI BAIBO: “Emhanmhan ọsi ene wẹnna nọnsẹn kiọnlẹn nin ele.”​—Proverbs 21:5.