18 GIDIỌN
Ọle Da Re Izebhudu Man Yẹ Re Ẹwanlẹn Lu Emhin
ỌKHẸKE nin ọria nọn mhọn izebhudu yẹ re ẹwanlẹn ha lu emhin. Ahamiẹn ọria nọn mhọn izebhudu i re ẹwanlẹn lu emhin, ọle ki mun egbe ọle ọbhi okhẹnan. Ọria nọn mhọn izebhudu nọn yẹ re ẹwanlẹn ha lu emhin, ọle Gidiọn ha khin. Ẹghe nin ibhokhan Izrẹl rẹ sọtẹ da Jehova ọle rẹ nyẹnlẹn. Bhiriọ, Jehova bha yẹ ha gbega ibhokhan Izrẹl. Ọle da re otọ nin ibhokhan Midian rẹ ha denyẹnyẹn ele. Ranmhude ofẹn ibhokhan Midian nọn ha mun ibhokhan Izrẹl, ele bha yẹ gbudu dọ ha rọ emhin bhi ugbo nọnsele. Ọrẹyiriọ, Gidiọn da ṣeyẹ re izebhudu ha wẹnna, beji ọle ha da sabọ re ebale nin ẹbho nesọle le. Ọkpakinọn, ọle da re ẹwanlẹn ha lu ọle. Ọle ha dọ hian wit bhi ugbo, ọle ki nẹko bhi eji a da nunu ikperan anyọn ha gbe ọne wit. Asabọmiẹn ẹlẹ udo ọne eji a da nunu ikperan anyọn ha ye.
Ẹghe nin ibhokhan Izrẹl ki rẹ daghe ọle ghe obọ da mun ele, ele da bhii Jehova nọn rẹkpa ele. Bhiriọ, Jehova da je akhasẹ bu ele nọn dọ taman ele ebezẹle nin ọle da zẹ ele obọ. Akizẹbue, Jehova da je ẹhi ọkpa nọnsọle bu Gidiọn nọn dọ taman ọlẹn ghe Ọle zẹ ọle nin ọle hinmhin ẹbho nesọle. Gidiọn da taman ọne ẹhi nin ọle re iyaman man ọlẹn, nin ọle ha rẹ lẹn ghe Jehova gene zẹ ọle. Ọne ẹhi da ka nọn rẹ re iyaman man ọlẹn. Ọle da re uwedẹ ọhan-ilo rẹ re eranlẹn tuẹ izọese nin Gidiọn lu a. Ọne ẹhi ki lu ọnan fọ, ọle da horiẹ. Bhi ọne ukpasọn nin, Jehova da ne Gidiọn talọ. Ọle da taman ọlẹn nin ọle dunmhun ukhuo-izọese ọsi Beel sotọ, bi ene ikazi ne ribhọ. Sẹyẹ, ọle ha bọn ukhuo-izọese ji Jehova, yẹ zọese ji ọle. Gidiọn da ka nin ọle rẹ lu ebi a taman ọlẹn. Ọkpakinọn, ranmhude ofẹn aba ọle nọn ha mun ọlẹn, bi ofẹn ene ikpia ne ribhi ọne agbaẹbho, ọle da lu ọle ọsasọn, ranmhude, ọle lẹnmhin ghe, bhi ọne ẹghe nan, ọria soso i da daghe ọle.
Gidiọn ki dunmhun ukhuo-izọese ọsi Beel a fọ, eyokhọnlẹn ọsi Midian, Amalẹk, bi ene na bhi obọ ọsi ist vae da mun okhọnlẹn bu ibhokhan Izrẹl. Ele da vuọn iyala ọsi Jẹzriẹ rebhe bii isikhun. Ẹlinmhin nọnsi Jehova da ne Gidiọn dia. Bhiriọ, ọle da je ukọ bu ene ikpia ne ribhi ulin-uwa kẹkẹ bhi otọ Izrẹl nin ele muegbe okhọn. Sẹyẹ, Gidiọn da taman Jehova nin ọle re iyaman eva man ọlẹn nin ọle rẹ lẹn ghe ọle ri ọle bhi ikeke. Jehova da lu ebi ọle tale. Bhi ọne ukpasọn nin, Gidiọn da mun olu nan rẹ do ukpọn wa ọbhi otọ. Jehova da lu ọle nin ebhu bhu ọbhọ, sokpan ije nekẹle bhi ọne otọ da wo ka. Bhi asọn nọn rẹkhan ọlẹn, Jehova da lu ọle nin ọne olu ka, sokpan ebhu da de ọbhi ije nekẹle bhi ọne otọ.
Jehova da taman Gidiọn nin ọle ne eyokhọnlẹn eso sibhi eyokhọnlẹn nesọle re, arẹmiẹn eyokhọnlẹn ọsi eghian ele manman bun nẹ ele
Ene iyaman nan veva da wo re izebhudu nin Gidiọn. Ọle da ne eyokhọnlẹn nesọle ne bun sẹbhi 32,000 dọ khọn eghian ele ne bun sẹbhi 135,000. Ẹghe nin Gidiọn bi eyokhọnlẹn nesọle rẹ mun agọ bhi egbegbe Ẹdẹ ọsi Herọd, Jehova da taman Gidiọn ghe eyokhọnlẹn nesọle bun gbe! Gidiọn da taman eyokhọnlẹn nesọle nin ofẹn ha mun nin ele ha khian uwa. Eyokhọnlẹn ne bun sẹbhi 10,000 ọkpa ki kẹre. Ọkpakinọn, Jehova da taman Gidiọn ghe ele sẹyẹ bun gbe. Ọle da yẹ taman Gidiọn nin ọle ha ghe eyokhọnlẹn nesọle beji ele ha rẹ ha wọn amẹn. Ọnọn hi ki rẹ khin bhi ẹwẹ ele nọn diguẹ mun uhọnmhọn ba bhi otọ ha wọn amẹn, ọle ha taman ele nin ele ha khian uwa. Ọkpakinọn, eyokhọnlẹn nekẹle da re ẹwanlẹn debhẹre ha re obọ sa amẹn wọn, beji ele ha da ha daghe ebe sunu nẹga ele. Enan hi ene eyokhọnlẹn nan zẹ nin ele dọ khọnlẹn. Itue 300 ọkpa kẹre nin Gidiọn ne ha khian okhọnlẹn!
Arẹmiẹn eyokhọnlẹn ọsi Gidiọn bha bun, ele da sẹyẹ re izebhudu muegbe nin ele rẹ dọ khọnlẹn. Jehova da gbo kie lu emhin nin ọle rẹ rẹman Gidiọn ghe ọle ri ọle bhi ikeke. Jehova da taman Gidiọn nin ọle do nabhi agọ ọsi eghian nesọle bhi ọsasọn. Ọle da wo gene lu iriọ. Bhi enin, ọle da họn ọyokhọnlẹn ọkpa tẹmhọn ebhohiẹ nin ọle miẹn nọn rẹman ghe ibhokhan Izrẹl dẹ khọn ele miotọ. Ọnan da wo re izebhudu nin Gidiọn. Ọle da fikie bu ikpia nesọle, yẹ taman ele ghe nin ele lu rẹkhan emhanmhan nesọle. Bhi ọsasọn ogiziẹn, Gidiọn bi ikpia nesọle da vẹ nẹga agọ ọsi eghian nesele. Ele da mun udede akhe mhọn, orukpa bi akala. Orukpa nin ele mun mhọnlẹn da ha ribhi ẹkẹ ọne akhe. Ẹghe nin Gidiọn rẹ khue akala nọnsọle, dunmhun akhe nọnsọle a, yẹ khua orukpa nọnsole okhun, eyokhọnlẹn nesọle rebhe da yẹ lu iriọ. Ele rebhe da reso yọle: “Agbada nọnsi Jehova bi ọsi Gidiọn!” Ranmhude uwedẹ nin ibhokhan Izrẹl wo rẹ re osukpa ha khue akala nọnsele, yẹ mun orukpa mhọnlẹn, eghian ele da ha riale ghe eyokhọnlẹn ne bun nẹ ele mun okhọn bu ele. Ọnan da re ofẹn mun ele, ele da ha hayo-hare. Ele bha yẹ lẹn ebi ele ha lu yẹ! Jehova da lu ọle nin ele ha ne egbele khọnlẹn. Itue 15,000 ọkpa hi ene miuhọnmhọn rẹ nẹgbe.
Gidiọn da khu rẹkhan ele. Ọle da khọn ibhokhan Midian bi ijie nesele miotọ. Ọle da re oya nin ẹbho ne bha ka re ebale nin ele bhi ẹghe nin ọle bi ikpia nesọle rẹ ha khọn eghian nesi Jehova. Ibhokhan Izrẹl ki da ha guanọ nin ele re Gidiọn kiẹn ojie nọnsele, sokpan, Gidiọn bha ka. Ọle da yọle: “Jehova hi ọnọn ha gbẹloghe ibha.” Osẹnobulua da nan erọnmhọn nin Gidiọn nọn wo re izebhudu man nọn yẹ re ẹwanlẹn lu emhin. Ene ẹghe rebhe nin Gidiọn rẹ ha yi ọbhuohiẹn bhi otọ Izrẹl, ẹbho bha mun okhọn bu ele. Sẹyẹ, ọle wo tọ khae ọkuẹsẹ ọle yu. Ẹghe nin Pọl nin odibo rẹ ha tẹmhọn ikpia bi ikhuo ne mhọn urẹọbhọ nọn ziẹnlẹn, ọle yẹ tẹmhọn Gidiọn.—Hib. 11:32.
Tie ọne okha bhi Baibo:
Judges 6:1–7:22; 8:4-23, 28
Inọnta:
Uwedẹ nela Gidiọn rẹ re izebhudu man?
Manman Guanọ Otọle
1. Ọyokhọnlẹn ọkpa da tẹmhọn ibrẹd nọn dia kholobo nan re bali lu nin ọle miẹn bhi ebhohiẹ. Bezẹle nin mhan ha da sabọ re ọne brẹd khọkhọ eyokhọnlẹn ọsi Gidiọn? (Judg. 7:13; it “Bali” ¶7)
2. Bezẹle nin akala nin eyokhọnlẹn ọsi Gidiọn ne bun sẹbhi 300 khuele da re ofẹn mun ibhokhan Midian? (it “Ukhaẹn” ¶3) 1
Ifoto 1: Ukhaẹn ọsi ohuan ibhokhan Izrẹl ha khue rẹ ji ẹbho lẹn ebe sunu
3. Be Gidiọn bi eyokhọnlẹn nesọle lu nin ele da sabọ khọn ibhokhan Midian miotọ? (w04 10/15 16 ¶9-10) 2
Ifoto 2: Gidiọn da khu rẹkhan eyokhọnlẹn ọsi Midian dọ sẹbhi Jogbẹha. Rẹ na bhi Jẹzriẹ dọ sẹbhi Jogbẹha dẹ ree sẹbhi imaili 50 (mhan bha lẹn ejela nọn tee nin ọle khu ele na)
4. Be rẹman ọne okha nan bhi Baibo gene sunu? (w05 4/15 32)
Ria Eria Nyan Emhin Nin Uwẹ Luẹle
Gidiọn da rẹkpa ẹbho nesi Osẹnobulua khọn miotọ. Ọkpakinọn, ọle da ha mhọn idegbere yẹ re ekpẹn ha ne ẹbho talọ. (Judg. 8:1-3) Be ọdafẹn-uwa bi ene ewanlẹn bhi agbotu ha rẹ sabọ re egbe khọkhọ Gidiọn yẹ sade ọria khọẹkẹ ranmhude emhin nin ele lu?
Idia nela ọ da khẹke nin mhan da re izebhudu man yẹ re ẹwanlẹn lu emhin? 3
Ifoto 3
Be uwẹ ha rẹ sabọ re egbe khọkhọ Gidiọn yẹ bhi uwedẹ nin ọle rẹ re izebhudu man?
Ria Ẹmhọn Jehova Bi Iho Nọnsọle
Be ọne okha nan man mẹn le rẹji Jehova?
Be ọne okha nan rẹ diẹn mun iho nọnsi Jehova yẹ?
Be mẹn ha nọọn Gidiọn le sade a riọ ọle kpanọ bhi uu?
Sẹyẹ Fẹ Ene Emhin Nan Ghe
Ahamiẹn a re uwẹ ọbhi ihe bhi ẹkẹ agbotu, be uwẹ ha rẹ sabọ re egbe khọkhọ Gidiọn yẹ?
“Ọria Nọn Lu Emhin Ọbhi Oleghe Mhọn Ẹwanlẹn” (w00 8/1 16-18 ¶11-15)
Noo ifoto nọn gbe okha ne ribhi Baibo rẹ rẹkpa imọn nesẹ rẹ mun udu nyan Osẹnobulua.