Ẹghe Nin Jesu Rẹ Ribhi Obhokhan

Nazarẹt, ọle Josẹf, Meri, bi imọn nesele rẹ dọ sẹbhi Jesu da ha nyẹnlẹn. Iwẹnna kapẹnta Josẹf lu rẹ gbẹloghe azagba-uwa nọnsọle, sẹyẹ, ọle wo ha man ele uhi nọnsi Jehova. Ẹghe-ẹghe ele rẹ ha diọbhi sinagọg dọ ha ga bhi enin. Sẹyẹ, ukpe-ukpe ele rẹ ha yo Jerusalẹm dọ ha lu Iluemhin Ọsi Anagbera.

Ẹghe nin Jesu rẹ ha ribhi ikpe 12, azagba-uwa nọnsọle da diọbhi Jerusalẹm beji ele ka lu khẹ. Ẹbho da wo vuọn Jerusalẹm ranmhude Iluemhin Ọsi Anagbera. A ki lu ọne iluemhin fo, Josẹf bi Meri da fikie ha khian uwa. Ele da ha riale ghe Jesu ribhi usun nin ele rẹ ko khian uwa. Ọkpakinọn, ẹghe nin ele rẹ ha guanọ ọle bhi ẹwẹ ibhio ele nin ele rẹ ko khian uwa, ele bha miẹn ọlẹn.

Ele da fikie diọbhi Jerusalẹm dọ ha guanọ ọmọn nọnsele. Ele da guanọ ọlẹn na bhi ikpẹdẹ ea. Bhi ọkike ọle, ele da diọbhi uwa oga. Bhi enin, ele da kere ghe Jesu dotua bhi adesẹ ọsi ene man-emhin. Ọle da ha ka ele ehọ, yẹ nọọn ele inọnta ne gbale. Ẹmhọn Jesu da wo ha ti ene man-emhin bhọ, bhiriọ, ele da ha nọọn ọlẹn inọnta kẹkẹ. Ewanniẹn nin Jesu re nin ele da wo han ele ilo. Ele da daghe ọle ghe Jesu wo lẹn otọ uhi nọnsi Jehova.

Ranmhude ghe Josẹf bi Meri wo ha kpokpo-egbe, Meri da yọle: ‘Ọmọn, be uwẹ khian yẹ? Uwẹ mhan mọn da guanọ na bhi otọ bi okhun!’ Jesu ki da taman ọlẹn yọle: ‘Uwẹ bha be lẹn ghe uwa nọnsi aba mẹn mẹn da ha ye?’

Jesu ki da rẹkhan ene biẹ ọle ha khian Nazarẹt. Josẹf da man Jesu iwẹnna kapẹnta. Unan ọria nela uwẹ riale Jesu ha khin beji ọle ribhi obhokhan? Beji Jesu rẹ ha wanre, ọle da wo manman ha wanlan, sẹyẹ, Osẹnobulua bi eria da wo ha re elọ esili ghe ọle.