Jehova Da Gbega Jesu

Ẹbho ne nyẹnlẹn bhi agbaẹbho nọn manman ree, nọn ribhi obọ ọsi ist ọsi otọ Izrẹl rẹọbhọ ghe ahiẹnhiẹn sabọ dia ọria. Bhi asọn ọkpa, ikpea eso ne na bhi ọne agbaẹbho nin vae, da daghe emhin bhi okhun nọn diabe ahiẹnhiẹn nọn manman ha bhala. Ọne emhin nọn diabe ahiẹnhiẹn da ha khian bhi okhun, bhiriọ, ele da khian rẹkhan ọlẹn. Ọ da dia ele diọbhi Jerusalẹm. Ene ikpea ki sẹbhi Jerusalẹm, ele da ha nọọn ẹbho yọle: ‘Ọne ọmọn nan biẹ nọn da ha yi ojie ọsi ibhokhan Ju bho? Mhan vae dọ deuhọnmhọnre nanlẹn.’

Ẹghe nin Hẹrọd nin ojie ọsi Jerusalẹm ki rẹ họn ghe ojie ọbhebhe ribhọ, ọle da wo ha kpokpo-egbe. Ọle da nọọn ene ohẹn ne khua yọle: ‘Ijela a ha da biẹ ọne ojie nan?’ Ele da taman ọlẹn yọle: ‘Ene akhasẹ yọle a dẹ biẹ ọle bhi Bẹtlẹhẹm.’ Bhiriọ, Hẹrọd ki da tie ene ikpea ne rẹkhan ahiẹnhiẹn vae bhi Jerusalẹm yẹ taman ele yọle: ‘Bha ha khian Bẹtlẹhẹm dọ guanọ ọne ọmọn. Bha ha miẹn ọlẹn, ibha ha fikie vae dọ taman mẹn eji ọne ọmọn ye. Imẹn yẹ guanọ nin mẹn deuhọnmhọnre nanlẹn.’ Ọkpakinọn, ohoghe ọnan khin.

Ọne emhin nọn diabe ahiẹnhiẹn da gbo kie munhẹn ha khian. Ene ikpea da rẹkhan ọlẹn ha khian Bẹtlẹhẹm. Ọne “ahiẹnhiẹn” ki khian sẹbhi okhun uwa ọkpa, ọ da mundia, bhiriọ, ene ikpea da nabhi ọne uwa. Ele da miẹn Jesu bi inẹn ọlẹn nin Meri. Ele da deuhọnmhọnre nin ọne ọmọn yẹ re igolu, frankisẹns, bi mai rẹ lu ẹsele nanlẹn. Jehova be gene ji ene ikpea nan nin ele dọ guanọ Jesu? Eye.

Bhi ọne ukpasọn nin, Jehova da taman Josẹf bhi ebhohiẹ yọle: ‘Hẹrọd guanọ nin ọle gbe Jesu a. Re okhuo ẹ bi ọmọn nọnsẹ, bha ha nẹ diọbhi otọ Ijipt. Bha debhi enin a rẹ sẹbhi ẹghe nin ijerebhe ha rẹ fure, uwẹ kuẹ fikiere.’ Ẹjẹje, Josẹf bi azagba-uwa nọnsọle da kpanọ ha khian Ijipt.

Jehova ki da taman ene ikpea ne rẹkhan ahiẹnhiẹn vae bhi Jerusalẹm nin ele hẹi fikie bu Hẹrọd. Ẹghe nin Hẹrọd ki rẹ lẹn ghe ene ikpea i yẹ vade, ẹkẹ da wo ha khọ ọle. Beji a miẹn ọle bha sabọ miẹn Jesu, ọle da yọle nan gbono imikpea rebhe a ne ribhi Bẹtlẹhẹm ne yi otu Jesu. Ọkpakinọn, ọle bha sabọ gbe Jesu a, ranmhude Jesu ki ribhi Ijipt fo.

Beji ẹghe ki rẹ ha khian, Hẹrọd da yu. Jehova ki da taman Josẹf yọle: ‘Ijerebhe fure nian, uwẹ dẹ sabọ fikie ha khian otọ Izrẹl.’ Josẹf, Meri, bi Jesu da fikie ha khian otọ Izrẹl. Ele da dọ ha nyẹnlẹn bhi Nazarẹt.