A Da Mun Daniẹl Ọbhi Uhio Ọsi Oduman

Derayọs nin obhokhan Midia da ki ha yi ojie ọbhebhe nọn ha gbẹloghe Babilọn. Derayọs da daghe ọle ghe ọria kpataki Daniẹl khin. Ọle da re Daniẹl kiẹn ọwanlẹn ọsi ikpea kpataki ne ribhi ọne agbaẹbho. Ene ikpea da wo ha mhọn ikhu da Daniẹl. Bhiriọ, ele da ha guanọ nin ele gbe ọle a. Ele lẹnmhin ghe igba ea daniẹl nan erọnmhọn ji Jehova ukpẹdẹ-ukpẹdẹ, bhiriọ, ele da taman Derayọs yọle: ‘Eo ọnojie, ọkhẹke nan re uhi ọbhi otọ nan ha rẹ ha nan erọnmhọn ji uwẹ ọkpa. Ọria nọn hi ki rẹ khin nọn gbobọra ọne uhi nan, a ki mun ọlẹn fiọbhi uhio ọsi oduman.’ Ebi ele tale da wo ti ọnojie bhọ, bhiriọ, ọle da re obọ ọbhọ.

Ẹghe nin Daniẹl ki rẹ họn ẹmhọn ọne uhi ọgbọn nan, ọle da ha khian uwa nọnsọle. Ọle da diguẹ ha nan erọnmhọn ji Jehova bhi odalo iwindo nọnsọle nọn tuje a. Ene ikpea ne ha mhọn ikhu da ọle da wo re osukpa nabhi uwa nọnsọle, yẹ daghe ọle ghe ọle nan erọnmhọn. Ele da runẹ bu Derayọs yẹ taman ọlẹn yọle: ‘Daniẹl gbobọrauhi nọnsẹ. Igba ea ọle nan erọnmhọn ji Osẹnobulua nọnsọle ukpẹdẹ-ukpẹdẹ.’ Derayọs wo manman hoẹmhọn Daniẹl, bhiriọ, ọle bha ha guanọ nin emhin sunu ji Daniẹl. Bhi ọne ukpẹdẹ nin rebhe, ọle da ha ria ẹmhọn uwedẹ kẹkẹ nin ọle ha rẹ sabọ hinmhin Daniẹl. Sokpan, ọnojie tobọle bhọ i da sabọ fi uhi nin ọle re ọbhi otọ denọ. Ọle ki da taman ikpea nesọle nin ele mun Daniẹl ọbhi ọne uhio ọsi oduman.

Bhi ọne ukpasọn nin, Derayọs da wo ha ria ẹmhọn Daniẹl rẹ sẹbhọ ghe, ọle bha sabọ wẹ. Ẹdẹ ki we, ọle da runẹ ha khian eji ọne uhio ye, yẹ sotie Daniẹl yọle: ‘Daniẹl, Osẹnobulua nọnsẹ be hinmhin uwẹ?’

Derayọs da ki họn uru ọsi Daniẹl! Ọle da taman Derayọs yọle: ‘Ẹhi nọnsi Jehova gue unun ọsi ene oduman. Ele bha kuan mẹn hiehie.’ Ọnan da wo re Derayọs ha ghọnghọn! Ọle da taman eguọmhandia nesọle nin ele mun Daniẹl sibhi ọne uhio re. Emhin soso bha rẹso Daniẹl bhi egbe. Ọnojie da ki taman ikpea nesọle yọle: ‘Bha muno ene ikpea ne lu ọne emhanmhan nan ọbhi ọne uhio ọsi oduman.’ Beji a ki muno ene ikpea ọbhi ọne uhio, ene oduman da wo zanzan ele a.

Derayọs da ki taman ẹbho nesọle yọle: ‘Ọkhẹke nin ẹbho rebhe ha mun ofẹn Osẹnobulua ọsi Daniẹl. Ọle hinmhin Daniẹl bhi  obọ ọsi ene oduman.’

Uwẹ be nan erọnmhọn ji Jehova ukpẹdẹ-ukpẹdẹ bii Daniẹl?