Ẹsta Da Hinmhin Ẹbho Nesọle

Obhokhan Ju Ẹsta ha khin. Eji a tiọle Shushan bhi otọ Pẹsia ọle da nyẹnlẹn. Jerusalẹm azagba-uwa nọnsọle ka ha ye ọkuẹsẹ Nẹbukadnẹza dọ mun ele ha khian imun. Mọdẹkai nin ọmọn ọsi obhio aba ọle bẹẹ ọle wanre. Ọguọmhandia ọsi Ahazuirọs nin Ojie ọsi Pẹsia, ọle Mọdẹkai ha khin.

Ahazuirọs nin Ojie da ha guanọ nin ọle re okhuo ọbhebhe. Eguọmhandia nesọle da ne imanmhẹn ne mhọn-ose ne ribhi ọne agbaẹbho ji ọle. Ẹsta deba bhi ene imanmhẹn. Bhi ẹwẹ ene imanmhẹn rebhe, Ẹsta ọnojie zẹ nọn ha yi esọn. Mọdẹkai da taman Ẹsta nin ọle hẹi ji ẹbho lẹn ghe obhokhan Ju ọle khin.

Okpea ọkpa natiọle Heman da ha yi ọwanlẹn ọsi ene ekhaẹmhọn rebhe. Ọle wo ha mhọn okpẹhio. Ọle da ha guanọ nin ọrebhe ha deuhọnmhọnre nanlẹn. Ọkpakinọn, Mọdẹkai bha ka lu iriọ. Ranmhude ọnan, Heman da ha khọẹkẹ Mọdẹkai, yẹ guanọ nin ọle gbe ọle a. Ẹghe nin Heman ki rẹ lẹn ghe obhokhan Ju Mọdẹkai khin, ọle da mhanmhan ebi ọle ha rẹ gbono ibhokhan ju rebhe ne ribhi ọne agbaẹbho a. Ọle da taman ọnojie yọle: ‘Ibhokhan Ju i mhẹn; ọkhẹke nin uwẹ gbono ele rebhe a.’ Ahazuirọs nin Ojie ki da taman ọlẹn yọle: ‘Lu emhin nọn hi ki rẹ khin nọn ri uwẹ bhi ọkhọle.’ Ọnojie da yẹ re ahu nanlẹn rẹ sabọ re uhi ọbhi otọ. Bhiriọ, ọle da gbuhi ghe, nan gbono ibhokhan Ju rebhe a bhi ukpẹdẹ nọnzi 13 bhi uki ọsi Edar. Jehova da wo ha ghe emhin rebhe ne sunu.

Ẹsta bha lẹn ẹmhọn ọne uhi nan nin Heman gbe. Bhiriọ, Mọdẹkai da je ebe nan gbẹn ọne uhi ọi ji ọle, yẹ taman ọlẹn yọle: ‘Ha khian dọ ne ọnojie talọ.’ Ẹsta ki da yọle: ‘Ọria nọn hi ki rẹ khin nin ọnojie bha tie ha vae bhi ẹgua nọnsọle, a ki gbe ọle a. Bhi ikpẹdẹ 30 nian, ọnojie bha sẹ tie mẹn. Ọkpakinọn, mẹn dẹ yo. Ahamiẹn ọle niẹn ọkpọ nọnsọle a, mẹn ki lẹn ghe emhin i da sunu ji mẹn. Ọkpakinọn, ahamiẹn ọle bha lu iriọ, a ki gbe mẹn an.’

Ẹsta ki da ha khian ẹgua ọsi ọnojie. Ẹghe nin ọnojie rẹ daghe ọle, ọle da niẹn ọkpọ nọnsọle a. Ẹsta da khian bu ọnojie. Ọnojie da nọọn ọlẹn yọle: ‘Ẹsta, be mẹn ha lu nin uwẹ?’ Ẹsta da wanniẹn ọlẹn yọle: ‘Mẹn guanọ nin uwẹ bi Heman dọ le ebale bhi isẹmhẹn.’ Bhi ẹghe nin ele ki rẹ ha le ọne ebale, Ẹsta da taman ele nin ele vae ewiẹ yẹ dọ le ebale. Beji ele ha le ebale bhi ukpẹdẹ nọnzi eva, ọnojie da nọọn Ẹsta yọle: ‘Be uwẹ guanọ nin mẹn lu nin uwẹ?’ Ẹsta da wanniẹn ọlẹn yọle: ‘Ọria ho nọn gbe mẹn bi ẹbho nesẹmhẹn an. Huẹan, hinmhin mhan.’ Ọnojie da nọọn ọlẹn yọle: ‘Họla guanọ nin ọle gbe uwẹ a?’ Ẹsta da yọle: ‘Ọne Heman nan nin ọria ọbe nọn.’ Ẹkẹ da wo manman khọ Ahazuirọs rẹ sẹbhọ ghe, ọ da wo re ẹjẹje gbe Heman an.

Ọria soso i ribhọ nọn ha sabọ fi uhi nin Heman gbe ọbhi otọ denọ. Ọnojie tobọle i da sabọ. Bhiriọ, ọnojie da re Mọdẹkai kiẹn ọwanlẹn ọsi ene ekhaẹmhọn, yẹ re ahu nanlẹn rẹ gbuhi ọsọgbọn. Mọdẹkai ki da gbuhi nọn re otọ nin ibhokhan Ju rẹ sabọ khọn nin egbe ele. Ene ibhokhan Ju da sabọ khọn eghian ele miotọ bhi ukpẹdẹ nọnzi 13 bhi uki ọsi Edar. Rẹ na bhi ẹghe nin rẹ ha khian, ukpe-ukpe, ele ki rẹ ha lu iluemhin ranmhude nin ele rẹ sabọ khọn eghian ele miotọ.