Usẹn Ikpea Enẹn Ne Hẹnmhọn Nin Jehova

Ẹghe nin Nẹbukadnẹza ki rẹ ne ene ikpea kpataki nesi Juda sẹbhi Babilọn, ọle da ne ele ọbhi obọ ọsi Ashpẹnaz nọn wẹnna bhi ẹguale nọnsọle, nin ọle ha gbẹloghe ele. Nẹbukadnẹza da taman Ashpẹnaz ghe nin ọle guanọ usẹn ikpea nin egbe manman daan, ne yẹ manman mhọn ẹwanlẹn bhi ẹwẹ ele. Ikpe ea a ha rẹ man ele emhin. Emhin nan ha man ele le dẹ rẹkpa ele rẹ sabọ ha wẹnna bhi ẹguale ọsi ọne ojie. Ele dẹ luẹ ebi a rẹ tie ikpebe ọsi Babilọn yẹ, bi ebi a rẹ gbẹn ọlẹn yẹ. Ele dẹ yẹ luẹ ebi a rẹ zẹ urolo nan zẹ bhi Babilọn yẹ. Ọ da yẹ khẹke nin ele ha le ebale nin ọnojie bi ene wẹnna bhi ẹguale nọnsọle le. Itue enẹn bhi ẹwẹ ele da ha yi Daniẹl, Hananaya, Mishẹl bi Azaraya. Ashpẹnaz da mun elin Babilọn hẹ ele. Ene elin hi: Bẹtẹshaza, Shẹdrak, Mẹshak, bi Abẹdnigo. Ene emhin nan ha man ele le dẹ be re ele zobọ bhọ rẹ ha ga Jehova?

Ene usẹn ikpea nan da wo muegbe nin ele rẹ hẹnmhọn nin Jehova. Ele lẹnmhin ghe ọ bha khẹke nin ele le ebale ọsi ọne ojie, ranmhude uhi nọnsi Jehova yọle ghe eso bhi ene ebale bha khia. Bhiriọ, ele da taman Ashpẹnaz yọle: ‘Huẹan hẹi sua mhan ọbhọ rẹ le ebale ọsi ọne ojie.’ Ashpẹnaz da taman ele yọle: ‘Ahamiẹn ibha bha da le ebale, nin ọne ojie da daghe ọle ghe ibha diabe ene khọnmhọn, ọle dẹ gbe mẹn an!’

Daniẹl ki da taman Ashpẹnaz yọle: ‘Huẹan re ẹfuọ nin mhan le, uwẹ ha yẹ re amẹn nin mhan wọn bhi ẹkẹ ikpẹdẹ igbe. Ikpẹdẹ igbe ha ki gba, uwẹ ha rẹ mhan khọkhọ ene usẹn nekẹle ne le ebale ọsi ọnojie.’ Ashpẹnaz nọn gbẹloghe ele da ka ele ehọ.

Ene ikpẹdẹ igbe ki gba, Daniẹl bi imọẹ ọle ea egbe daan nẹ ikpea nekẹle ne ha le ebale ọsi ọne ojie. Ọ da wo re Jehova ha ghọnghọn ranmhude nin ele rẹ hẹnmhọn nanlẹn. Ọle bhọ da re ẹwanlẹn nin Daniẹl rẹ sabọ ha lẹn ebi imianlo bi ebhohiẹ mundia nan.

A ki man ele emhin fo, Ashpẹnaz da ne ele bu Nẹbukadnẹza. Ẹghe nin ọnojie rẹ nin ele ha zilo, ọle da kere ghe Daniẹl, Hananaya, Mishẹl, bi Azaraya, ele lẹn emhin nẹ ene usẹn ikpea nekẹle. Bhiriọ, ọle da zẹ ele nin ele dọ ha wẹnna bhi ẹguale nọnsọle. Ahamiẹn ọnojie mhọn emhin kpataki nin ọle ho nin ọle lu, ọle ki tie ele nin ele re ibhude nanlẹn. Jehova da manman re ẹwanlẹn nin ele. Ele da mhọn ẹwanlẹn gbera ene ikpea ne wanlan ne wẹnna nin ọne ojie, bi ene lu ilọnmhọn idunan.

Arẹmiẹn Daniẹl, Hananaya, Mishẹl, bi Azaraya ribhi otọ nọn i yi ọsele, ele bha yelea ghe ẹbho nesi Jehova ele khin. Uwẹ ki? Uwẹ dẹ be ha ye Jehova re ẹghe rebhe aharẹmiẹn ene biẹ ẹ i ribhi eji uwẹ ye?