A Dunmhun Jerusalẹm An

Ẹghe-ẹghe ibhokhan Juda rẹ ha zẹ Jehova obọ dọ ha ga osẹ ebhebhe. Bhi ẹkẹ ikpe ne bunbun, Jehova da wo ha dọnmhegbe nin ọle rẹ rẹkpa ele. Ọle da noo akhasẹ ne bunbun rẹ ha sekha nin ele, ọkpakinọn, ele bha ka ene akhasẹ ehọ. Ele bhọ da re ene akhasẹ ha zọjiẹ. Be Jehova rẹ re ọkpẹnlẹn ọbhi ẹbọ nin ele ha ga yẹ?

Nẹbukadnẹza nin ojie ọsi Babilọn, da wo ha khọn agbaẹbho kẹkẹ miotọ khian. Ẹghe ọhẹnhẹn nin ọle rẹ mun okhọn re bhi Jerusalẹm, ọle da mun Jehoakin nin Ojie, ikpea kpataki ne ribhi ọne agbaẹbho, ene eyokhọnlẹn, ikpea ne guẹ ebi a rẹ re ekẹn manọn emhin, bi ene guẹ ebi a rẹ re eran kanọ emhin yẹ ha khian Babilọn. Ọle da yẹ ne emhin ne ghanlẹn rebhe ne ribhi uwa oga nọnsi Jehova. Nẹbukadnẹza ki lu ọnin fo, ọle da re Zẹdẹkaya kiẹn ojie ọsi Juda.

Bhi ọsi ọhẹnhẹn, Zẹdẹkaya da wo ha hẹnmhọn nin Nẹbukadnẹza. Ọkpakinọn, ene agbaẹbho ne nẹga ọle bi ene akhasẹ ohoghe da taman Zẹdẹkaya nin ọle sọtẹ da ojie ọsi Babilọn. Ọkpakinọn, Jerimaya da taman ọlẹn yọle: ‘Uwẹ ha sọtẹ da ọle, ugbele bi emianmhẹn ki vuọn otọ Juda, sẹyẹ, ohanmhẹn ki ha ribhọ.’

Ọ ki ribhi ikpe elẹnlẹn nin Zẹdẹkaya munhẹn ha gbẹloghe, ọle da sọtẹ da ojie ọsi Babilọn. Ọle da taman eyokhọnlẹn ọsi Ijipt nin ele rẹkpa ọle. Bhiriọ, Nẹbukadnẹza da je eyokhọnlẹn nesọle ne dọ khọn Jerusalẹm. Ene eyokhọnlẹn da mun agọ nẹga ọne agbaẹbho. Jerimaya da dọ taman Zẹdẹkaya yọle: ‘Jehova yọle ghe, uwẹ ha deuhọnmhọnre nin ojie ọsi Babilọn, uwẹ bi ọne agbaẹbho nan ki miuhọnmhọn. Ọkpakinọn, ahamiẹn uwẹ bha lu iriọ, eyokhọnlẹn nesi Babilọn dẹ tuẹ ọne agbaẹbho an yẹ mun uwẹ ọbhi ighan.’ Zẹdẹkaya da yọle: ‘Mẹn i da deuhọnmhọnre nanlẹn!’

Ukpe ọkpa bi ukhiọnmhẹn ki gbera, eyokhọnlẹn nesi Babilọn da dunmhun ogbe ọsi Jerusalẹm an, yẹ mun eranlẹn ọbhi ọne agbaẹbho. Ele da tuẹ uwa oga a, gbono ẹbho ne bunbun an, yẹ muno ẹbho ne bunbun ha khian imun.

Zẹdẹkaya da nẹgbe, ọkpakinọn, eyokhọnlẹn ọsi Babilọn da khu rẹkhan ọlẹn. Ele da khu ọle kere bhi egbe-egbe Jẹriko, yẹ mun ọlẹn ji Nẹbukadnẹza. Ojie ọsi Babilọn da lu ọle nin Zẹdẹkaya ha ghe imọn nesọle beji a rẹ ha gbono ele a. Nẹbukadnẹza ki lu ọnin fo, ọle da gbono Zẹdẹkaya ẹlo a, ye mun ọlẹn ọbhi ighan. Enin ọle yu ọi beji akizẹbue. Ọkpakinọn, Jehova da ve nin ibhokhan Juda ghe, ikpe 70 ha gbera, ọle ki ne ele fikiere bhi Jerusalẹm.

Be ha ki sunu ji ene usẹn nan muno ha khian imun bhi Babilọn? Ele dẹ be sẹyẹ ha sun rẹkhan Jehova?