Jehova Da Je Jerimaya Nọn Dọ Ha Wewe Ẹmhọn Ọlẹn

Jehova da zẹ Jerimaya nin ọle ha yi akhasẹ rẹji ibhokhan Juda. Jehova da taman ọlẹn nin ọle dọ tẹmhọn ọlẹn man ene ẹbho, yẹ taman ele nin ele zobọ bhi emhin ebe nin ele lu. Jerimaya da yọle: ‘Jehova, obhokhan khere mẹn khin. Mẹn bha lẹn ebi mẹn ha rẹ ne ene ẹbho talọ yẹ.’ Jehova ki da taman ọlẹn yọle: ‘Hẹi ji ofẹn mun uwẹ. Mẹn dẹ taman uwẹ ebi uwẹ ha taman ele. Mẹn dẹ rẹkpa uwẹ.’

Jehova da taman Jerimaya nin ọle si ene ewanlẹn ne ribhi ọne agbaẹbho koko, nin ọle guọghọ akhe a bhi odalo ele, sẹyẹ, ọle ha yọle: ‘Irio a ha rẹ guọghọ Jerusalẹm an.’ Ẹghe nin Jerimaya ki rẹ lu ebi Jehova taman ọlẹn nin ọle lu fo, ẹkẹ da wo ha khọ ene ewanlẹn. Ohẹn ọkpa natiọle Pashọ da gbe Jerimaya, yẹ mun ọlẹn ọbhi aban nan re eran lu. Bhi ọne ukpasọn nin rebhe, Jerimaya bha sabọ lueghe egbe. Ẹdẹ ki we, Pashọ da fan ọlẹn fia. Jerimaya ki da yọle: ‘Egbe lọ mẹn. Mẹn i da yẹ tẹmhọn Osẹnobulua.’ Ọkpakinọn, ọle be gene zobọ bhọ rẹ ha tẹmhọn Osẹnobulua? Eye. Ẹghe nin Jerimaya ki rẹ manman ria eria nyan ọne ẹmhọn nọnsẹn, ọle da yọle: ‘Uhọnmhunje nin Jehova je mẹn le diabe eranlẹn bhi egbe nọnsẹmhẹn. Mẹn i da sabọ zobọ bhọ rẹ ha tale.’ Jerimaya da sẹyẹ wo ha sekha nin ene ẹbho.

Ikpe ne bunbun ki gbera, Juda da ha mhọn ojie ọbhebhe. Ene ohẹn bi ene akhasẹ ohoghe bha zẹwẹ hoẹmhọn ọne uhọnmhunje nin Jerimaya ha wewe. Ele da taman ene ekhaẹmhọn yọle: ‘Ọkhẹke nan gbe Jerimaya a.’ Jerimaya da ki yọle: ‘Ahamiẹn bha gbe mẹn an, ọria nọn bha lẹn-ọkpa-lẹn-eva bha gbe a. Ọ i yi ebe na bhi ọkhọle nọnsẹmhẹn vae mẹn ta man bha, sokpan, ọta nọnsi Jehova nọn.’ Ene ekhaẹmhọn ki họn ọnan, ele da yọle: ‘Ọ bha khẹke nan gbe ọne okpea nan an.’

Jerimaya da sẹyẹ wo ha wewe ọne uhọnmhunje. Ọnan da wo re ẹkẹ manman ha khọ ene ekhaẹmhọn. Ẹle da taman ọnojie nin ọle gbe Jerimaya a. Ọnojie da taman ele nin ele dọ lu Jerimaya ebi ọ hi ki rẹ khin nọn ghọn ele. Bhiriọ, ele da mun Jerimaya yẹ mun ọlẹn fiọbhi omin nin ekhuọrọ ye. Ele da ha riale ghe ọle dẹ yu ọbhi enin. Khere-khere, Jerimaya da ha gberuẹ bhi ẹkẹ ọne ekhuọrọ.

Ọkpakinọn, Ibẹd-mẹlẹk nọn wẹnna bhi egua ọsi ọnojie da taman ọnojie yọle: ‘Ene ekhaẹmhọn mun Jerimaya ọbhi omin! Mhan ha zẹ ọle obọ bhi enin, ọle dẹ yu.’ Ọnojie da ki taman Ibẹd-mẹlẹk nin ọle ne ikpea 30 rẹkhan egbe, nin ele dọ mun Jerimaya sibhi ẹkẹ ọne omin re. Ọ bha be khẹke nin mhan re egbe khọkhọ Jerimaya, nọn bha ji emhin soso da re ọle zobọ bhọ rẹ ha wewe uhọnmhunje nọnsi Jehova?