Hana Da Bhii Jehova Nọn Re Ọmokpea Nanlẹn

Ẹkana nin obhokhan Izrẹl da ha mhọn ikhuo eva. Ene ikhuo hi, Hana bi Pẹnina. Ọkpakinọn, Hana ọle hoẹmhọnlẹn nẹ. Hana i mhọn ọmọn, sokpan, Pẹnina mhọn imọn ne bunbun. Ranmhude ọnan, ọle da wo ha zuọzuọ Hana ẹghe rebhe. Ukpe-ukpe, ọle Ẹkana rẹ ne azagba-uwa nọnsọle diọbhi uwa oga nọn ribhi Shailo, nin ele dọ ga bhi enin. Ẹghe ọkpa beji ele ribhi enin, ọle da daghe ọle ghe Hana nin ọle manman hoẹmhọnlẹn viẹ. Bhiriọ, ọle da taman ọlẹn yọle: ‘Hẹi yẹ viẹ, uwẹ lẹnmhin mẹn hoẹmhọn ẹn, sẹyẹ, mẹn i da zẹ uwẹ obọ.’

Akizẹbue, Hana da sibhi eji ele ye re dọ nan erọnmhọn. Ọle da wo ha viẹ beji ọle rẹ bhii Jehova nọn rẹkpa ọle. Ọle da ve yọle: ‘Jehova, uwẹ ha re ọmokpea nin mẹn, mẹn dẹ re nin uwẹ fikie, sẹyẹ, ọle dẹ re edagbọn iẹnlẹn nọnsọle rẹ ga uwe.’

Ẹlai nin Ojohẹn ki daghe uwedẹ nin Hana rẹ ha lu emhin beji ọle ha nan erọnmhọn, ọle da ha riale ghe anyọn mun Hana. Hana da taman ọlẹn yọle: ‘Ebeanlẹn mẹn, mẹn bha da anyọn. Ọkakale nin mẹn ye, ọle mẹn taman Jehova bhi erọnmhọn.’ Ẹlai ki da kere ghe, ọ i yi beji ọle rẹ ha riale bhi ọkhọle. Bhiriọ, ọle da taman Hana yọle: ‘Osẹnobulua dẹ re ebi uwẹ guanọ nin uwẹ.’ Ọkhọle ọsi Hana da lọre, sẹyẹ, ọle da kpanọ ha khian uwa. Ọ bha sẹ sẹ ukpe ọkpa beji ọnan sunu fo, Hana da biẹ ọmokpea, yẹ hẹ ọle Samuẹl. Ria ẹmhọn ebi Hana ha rẹ manman ha ghọnghọn yẹ bhi ọne ẹghe nan!

Hana bha ye ive nin ọle ve nin Jehova a. Samuẹl ki wanre khere, Hana da re ọle diọbhi uwa oga, nin ọle dọ ha ga bhi enin. Ọle da taman Ẹlai yọle: ‘Ọnan hi ọne ọmọn nin mẹn bhii Jehova le bhi erọnmhọn. Mẹn re ọle nin Jehova, nin ọle re ẹdagbọn iẹnlẹn nọnsọle rẹ ga Ọle.’ Ukpe-ukpe Hana bi Ẹkana rẹ ha rẹnẹ ji Samuẹl. Ele da ha khian, ele ki ne ukpọn ọgbọn ji ọle. Jehova da yẹ re imikpea ea ebhebhe bi imikhuo eva nin Hana.