Gidiọn Da Khọn Ibhokhan Midian Miotọ

A ki gbo zẹbue, ibhokhan Izrẹl da zẹ Jehova obọ yẹ munhẹn dọ ha ga ẹbọ. Bhi ẹkẹ ikpe ihinlọn, ibhokhan Midian da ha muno elanmhẹn ọsi ibhokhan Izrẹl, yẹ riia emhin ne ele kọ bhi ugbo a. Nin ele rẹ sabọ miuhọnmhọn bhi obọ ibhokhan Midian, ele da dọ ha nẹhe bhi uhio-udo bi ene oke. Ele da ha bhii Jehova nin ọle hinmhin ele. Bhiriọ, Jehova da je ẹhi nọnsọle bu okpea ọkpa natiọle Gidiọn. Ọne ẹhi da taman Gidiọn yọle: ‘Jehova zẹ uwẹ nin uwẹ ha yi ọkakulo nọn khua.’ Gidiọn da nọọn ọlẹn yọle: ‘Be mẹn ha rẹ sabọ hinmhin ibhokhan Izrẹl yẹ? Mẹn bha sẹ emhin soso.’

Be Gidiọn ha rẹ sabọ lẹn yẹ ghe Jehova gene zẹ ọle? Ọle da re obhi olu ọbhi otọ yẹ taman Jehova yọle: ‘Ahamiẹn nin ẹdẹ rẹ we, ebhu de ọbhi ọne olu, sokpan, ọne ebhu bha de ọbhi otọ, mẹn ki lẹn ghe uwẹ ho nin mẹn hinmhin ibhokhan Izrẹl.’ Ẹdẹ ki gene we, ebhu da de ọbhi ọne olu, ọkpakinọn, ọ bha de ọbhi otọ! Gidiọn da gbo kie yọle ghe nin ẹdẹ rẹ we, nin ọle kere ghe ebhu bha de ọbhi ọne olu, sokpan, nọn de ọbhi otọ. Ọ ki gene sunu beji Gidiọn bhii, ọle da dọ rẹọbhọ ghe Jehova gene zẹ ọle. Bhiriọ, ọle da koko eyokhọnlẹn nesọle nin ele dọ khọn ibhokhan Midian.

Jehova da taman Gidiọn yọle: ‘Mẹn dẹ rẹkpa ibhokhan Izrẹl rẹ khọn miotọ. Ọkpakinọn, ranmhude uwẹ mhọn eyokhọnlẹn ne bunbun, uwẹ dẹ sabọ dọ ha riale ghe, ahu nọnsẹ uwẹ rẹ khọn miotọ. Taman ene ofẹn mun bhi ẹwẹ ene eyokhọnlẹn ghe nin ele ha khian uwa.’ Bhiriọ, eyokhọnlẹn ne bun sẹbhi 22,000 da ha khian uwa. Ọ ki da ha kẹ itue 10,000. Jehova da sẹyẹ taman Gidiọn yọle: ‘Ene eyokhọnlẹn sẹyẹ bun gbe. Ne ele ha khian ẹdẹ, uwẹ ha yẹ taman ele nin ele wọn amẹn. Ene babegbe bhi ẹwẹ ele beji ele rẹ wọn amẹn, ele ọkpa uwẹ ha zẹ.’ Itue 300 ọkpa bhi ẹwẹ ele ha babegbe beji ele ha wọn amẹn. Jehova da taman Gidiọn ghe, ene ikpea nan ọkpa da khọn eyokhọnlẹn ọsi Midian ne bu sẹbhi 135,000 miotọ.

Bhi ọne asọn nin, Jehova da taman Gidiọn yọle: ‘Ọne ẹghe khọnan nin uwẹ ha rẹ mun okhọnlẹn bu ibhokhan Midian!’ Gidiọn da ne akala bi uko nin ikpea nesọle. Ukpa da ha ribhi ẹkẹ ene uko. Ọle da taman ele yọle: ‘Bha ha ghe mẹn, ibha ha yẹ lu beji mẹn lu tee.’ Gidiọn da khue akala nọnsọle, guọghọ uko nọnsọle a, fieghe ukpa nin ọle mun mhọn, yẹ reso yọle: ‘Agbada nọnsi Jehova bi ọsi Gidiọn!’ Ene ikpea 300 da yẹ lu iriọ. Ọnan da re ofẹn mun ibhokhan Midian, bhiriọ, ele da vẹ kua yẹ nẹ diọbhi ije kẹkẹ. Ranmhude ele bha yẹ lẹn ebi ele lu bhi obọ, ele da munhẹn ha nin egbele khọn. Jehova da gbo rẹkpa ibhokhan Izrẹl rẹ sabọ khọn eghian ele miotọ.