Ohu Da Re Keni Gbe Ebẹl A

Adam bi Ivi ki sibhi ogba ọsi Idẹn re fo, ele da biẹ imọn ne bunbun. Keni hi ọmọndiọn nọnsele, Ebẹl da yi ọmọn-ukpazeva. Keni da ha yi ọmugbo, Ebẹl da ha yi ọsun-ohuan.

Ẹdọkpa, Keni bi Ebẹl da zọese ji Jehova. Uwẹ be lẹn ebi izọese khin? Ẹsele kpataki izọese khin. Jehova da wo miẹn izọese ọsi Ebẹl ọbhi egbe, sokpan, ọle bha miẹn ọsi Keni ọbhi egbe. Ọnan da re ohu manman ha re Keni. Jehova da sekha nin Keni ghe, ohu nọnsọle dẹ re ọle lu emhin ebe. Ọkpakinọn, Keni bha kaehọ.

Keni da ki taman Ebẹl yọle: ‘Vae, rẹkhan mẹn ha khian ugbo.’ Ẹghe nin ele ọkpa ki rẹ ha ribhi ugbo, Keni da gbe Ebẹl a. Be Jehova ki lu yẹ? Ọle da re oya nin Keni. Ọle da khu Keni sibhi eji azagba-uwa nọnsọle ye re ha khian eje manman ree. Ẹghe i ribhọ nin Keni ha rẹ sabọ fikiere.

Be imhan ha sabọ miẹn luẹ bhi ọnan? Ohu sabọ rẹ ha re mhan sade emhin bha sunu beji mhan rẹ ha guanọ. Mhan ha daghe ọle ghe ohu munhẹn ha re mhan, la ẹbho taman mhan ghe ọ diabe ohu munhẹn ha re mhan, ọkhẹke nin mhan jẹje ku egbe ọi, beji a ha da miẹn ghe mhan bha dọ lu emhin ebe.

Ẹghe i ribhọ nin Jehova ha rẹ ye Ebẹl a, ranmhude, Ebẹl hoẹmhọn Jehova, sẹyẹ, ọle lu emhin nọn gbale. Ẹghe nin Osẹnobulua ha rẹ re ọne otọ nan kiẹn otọ ọfubhegbe, ọle ki riọ Ebẹl kpanọ bhi uu, nin ọle kie dọ ha nyẹnlẹn.