Adam Bi Ivi Bha Hẹnmhọn Nin Osẹnobulua

Ẹdọkpa, beji Adam bha ha ribhi eji Ivi ye, ẹnyẹn da vae dọ ne Ivi talọ. Ọne ẹnyẹn da nọọn ọlẹn yọle: ‘Ẹmhọanta gene nọn ghe Osẹnobulua bha re otọ nin bha rẹ ha le bhi ene ikperan rebhe ne ribhi ọne ogba nan?’ Ivi da wanniẹn ọlẹn yọle: ‘Mhan dẹ sabọ le bhi ene ikperan rebhe, sokpan, ọkpa ribhọ nin mhan i da le. Mhan ha le ọle, mhan ki yu.’ Ọne ẹnyẹn da ki yọle: ‘Bha i da yu. Bhi ọsi ẹmhọanta, ibha ha le bhọ, ibha ki diabe Osẹnobulua.’ Ẹmhọanta be khọnin? Eye, ohoghe nọn. Ọkpakinọn, Ivi da rẹọbhi ebi ọne ẹnyẹn tale. Beji Ivi ki rẹ ha ghe ọne ikperan, ọ da wo ha ghọn ọlẹn rẹ le ọle. Ọle da le ọne ikperan yẹ re nin Adam le. Adam lẹnmhin ghe ele dẹ yu sade ele bha hẹnmhọn nin Osẹnobulua, ọrẹyiriọ, Adam da yẹ le ọle.

Akizẹbue bhi ọne ukpẹdẹ nin, Jehova da ne Adam bi Ivi talọ. Ọle da nọọn ele ebezẹle nin ele da gbobọrauhi nọnsọle. Ivi da yọle ghe ẹnyẹn si ọle, sẹyẹ, Adam da yọle Ivi si ọle. Ranmhude Adam bi Ivi bha hẹnmhọn nin Jehova, ọle da khu ele sibhi ọne ogba re. Beji a ha da miẹn ele bha kie sabọ fikie ọne ogba, Jehova da ne ẹhi ọbhi eji a da nabhi ọne ogba, yẹ re agbada nọn mhọn eranlẹn ọbhọ nọn ha fi nẹga.

Jehova da yẹ yọle ghe ọle dẹ re oya nin ọnọn bha ohoghe man Ivi. Ọ i yi ọne ẹnyẹn gene ne Ivi talọ. Jehova bha man ẹnyẹn ne ele ha talọ. Ẹhi nọn i mhẹn, ọle noo ọne ẹnyẹn rẹ talọ. Ọle da noo ọle rẹ hiẹ Ivi. Ọne ẹhi nin, ọle a tiọle Esu la Ojuu. Bhi ẹghe odalo, Jehova dẹ gbe Esu a beji a ha da miẹn ghe, ọle i da yẹ ha hiẹ ẹbho rẹ dọ ha lu emhin ebe.