Osẹnobulua Da Man Okpea Bi Okhuo Nin Ọhẹnhẹn

Jehova da gba ogba ọbhi eji a tiọle Idẹn. Aroro, eran, bi elanmhẹn kẹkẹ da vuọn ọne ogba. Osẹnobulua da re ekẹn man Adam nin okpea nin ọhẹnhẹn yẹ hiẹnhiẹn ọle bhi ihue. Uwẹ be lẹn ebe sunu beji ọle lu ọnan fo? Ọne okpea da munhẹn ha nyẹnlẹn! Jehova da taman Adam nin ọle ha gbẹloghe ọne ogba, sẹyẹ, nin ọle hẹ ene elanmhẹn rebhe elin.

Jehova da gbuhi kpataki nin Adam. Ọle da taman Adam yọle: ‘Uwẹ sabọ rẹ le bhi ikpẹ ọsi ene eran rebhe, sokpan, hẹi le bhi ọkpa bhi ẹwẹ ele. Uwẹ ha le bhọ, uwẹ ki yu.’

Akizẹbue, Jehova da yọle: ‘Mẹn dẹ man ọria nọn da ha rẹkpa Adam.’ Bhiriọ, Osẹnobulua da lu ọle nin Adam wẹ dinmhin. Ẹghe nin Adam ki rẹ ha wẹ, Osẹnobulua da re ọkpa bhi uguẹ-efẹn ọsi Adam rẹ man okhuo nanlẹn. Ivi hi elin ọsi ọne okhuo. Adam bi Ivi da ha yi azagba-uwa nin ọhẹnhẹn bhi ọne otọ nan. Be egbe dia Adam yẹ bhi ẹghe nin ọle rẹ daghe ọne okhuo nin Osẹnobulua man nanlẹn? Ọle da wo ha ghọnghọn, rẹ sẹbhọ ghe, ọle da yọle: ‘Ghe ebi Jehova re uguẹ-efẹn nọnsẹmhẹn man! Mẹn sẹ miẹn ọria nọn diabe imẹn!’

Jehova da taman Adam bi Ivi nin ele biẹ vuọn ọne otọ nan. Ọle da ha guanọ nin ele ko re eghọnghọn ha wẹnna kugbe beji ele ha da re ọne otọ nan rebhe kiẹn otọ ọfubhegbe bii ogba ọsi Idẹn. Ọkpakinọn, ọ bha re iriọ sunu. Bezẹle? Mhan dẹ miẹn ewanniẹn rẹji ọne inọnta nan bhi uhọnmhọn-ọta nọn ki sẹ ọle bhi egbe.