Osẹnobulua Man Otọ Bi Okhun

Osẹnobulua nin Jehova hi ọnọn man mhan. Ọle hi ọnọn man emhin rebhe, ene mhan sabọ daghe bi ene mhan i sabọ daghe. Ọkuẹsẹ ọle man emhin nin mhan sabọ daghe, ọle da man ẹhi ne bunbun. Uwẹ be lẹn ebi ene ẹhi diayẹ? Ẹlinmhin ele khin beji Jehova rẹ yi ẹlinmhin. Mhan i sabọ daghe ele beji mhan i rẹ sabọ daghe Osẹnobulua. Ẹhi ọhẹnhẹn nin Jehova manlẹn da wo ha re iyobọ nanlẹn. Ọne ẹhi da re iyobọ nin Jehova beji ọle ha man ene ahiẹnhiẹn bi emhin nekẹle rebhe, rẹ dọ sẹbhi ọne otọ nan nọn mhọn-ose a nin mhan da nyẹnlẹn.

Jehova da man emhin kẹkẹ ọbhọ nọn ha re ọle fu eria bi elanmhẹn bhi egbe. Ọle da man ovuẹn nọn ha re zẹ nyan otọ. Ọle da yẹ man ene oke, ene ẹdẹ, bi ene okpẹdẹ.

Beji Jehova lu ọnan fo, be ọle ki gbo lu? Ọle da yọle: ‘Mẹn dẹ man ilunmhun, eran bi iri.’ Bhiriọ, unan ikperan kẹkẹ, ẹfọ, bi aroro da munhẹn ha jẹnẹre. Ọnan ki sunu fo, Jehova da man ene elanmhẹn rebhe, rẹ dọ sẹbhi ene tin bhi okhun, ene gua bhi ẹdẹ, ene khian bhi otọ, bi ene nannan bhi otọ. Ọle da man elanmhẹn ne khere khere, elanmhẹn bii ẹluọ. Ọle da yẹ man elanmhẹn ne kpọnọ, elanmhẹn bii eni. Ọnela yẹẹ uwẹ nẹ bhi ẹwẹ elanmhẹn nin Osẹnobulua manlẹn?

Jehova da ki taman ọne ẹhi nin ọhẹnhẹn yọle: “Ji mhan man eria.” Eria dẹ wo dikẹ bhi elanmhẹn. Ele dẹ sabọ ha noo ẹwanlẹn rẹ man emhin. Ele dẹ sabọ ha talọ, ha jiẹ, yẹ nan erọnmhọn. Ele ki ha gbẹloghe ọne otọ nan bi elanmhẹn ne ribhọ. Uwẹ be lẹn ọria ọhẹnhẹn nin Osẹnobulua manlẹn? Bha ji mhan fẹ ọle ghe.