Misiọnari Tẹmhọn Osẹnobulua “Sẹbhi Eje Ree Nẹ bhi Ọne Otọ Nan”

Jesu da taman etuegbe nesọle yọle: “bha ki ha sọsali nin mẹn . . . rẹ sẹbhi eje ree nẹ bhi ọne otọ nan.” (Acts 1:⁠8) Ẹlẹnan nian, Esali Jehova wo re ọhubhudu rẹ lu ọne ẹsọn nan. Ọkpakinọn, ijeso bhi ọne otọ nan, rẹ deba ijeso nin ẹbho manman ye, bha sẹ hẹnmhọn Osẹnobulua nọnsẹn. Sẹyẹ, Esali Jehova bha bun bhi agbaẹbho eso. (Matthew 9:​37, 38) Be bhọ mhan ki lu nin mhan da sabọ tẹmhọn Osẹnobulua man ẹbho ne bunbun?

Nin mhan da sabọ lu ọne iwẹnna nin Jesu mun nin mhan, Otu Nọn Mhọn Obọ bhi Iwẹnna itẹmhọn Osẹnobulua ọsi Esali Jehova je imisiọnari yo eji a da guanọ urẹkpa bhi ije kẹkẹ bhi ọne otọ nan. Ejayenan, ibhio mhan ne lu iwẹnna imisiọnari bhi otọ agbọn nan rebhe bun sẹbhi 3,090.a Ene bunbun bhi ẹwẹ ele yo isiku nan da man iBaibo bọsi, Isiku ọsi Ene Tẹmhọn Agbejele. Ene imisiọnari wo muegbe nin ele rẹ sibhi agbaẹbho nọnsele re ha khian agbaẹbho ebhebhe dọ ha lu iwẹnna itẹmhọn Osẹnobulua. Ranmhude ọne isiku nin ele yo, ilẹn-otọ-emhin nọnsele, bi uwedẹ nin ele rẹ re ẹwanlẹn lu emhin, ene imisiọnari nan wo sabọ rẹkpa wewe ẹmhọn Agbejele, yẹ re ijiẹmhin esili man ibhio mhan ne la mianmẹn.

Ebe A Rẹ Rẹkpa Ene Imisiọnari Yẹ Nin Ele Da Sabọ Rẹkpa Ẹbho Nekẹle

Bhi Bẹtẹ kẹkẹ, Ọfisi Nọn Gbẹloghe Ene Lu Iwẹnna Agbejele deba Otu Nọn Sun IBẹtẹ wẹnna, nin ele da sabọ rẹkpa ene imisiọnari bhi uwedẹ kẹkẹ bọsi, uwa nin ele ha dia, ebi ele ha rẹ ha gbẹloghe egbe yẹ sade ele khọnmhọn, bi igho nin ele ha rẹ ha gbẹloghe egbe. Bhi ukpe iwẹnna oga ọsi 2020, igho nin Esali Jehova noo rẹ gbẹloghe ene imisiọnari kẹ khere nọn rẹ sẹbhi $27 million (U.S.). Ranmhude ọne urẹkpa nin Bẹtẹ re nin ene imisiọnari, ele wo sabọ re ọkhọle bi ahu rebhe denọ ẹlo bhi iwẹnna itẹmhọn Osẹnobulua yẹ re izebhudu nin ibhio ele bhi agbotu nin ele ye.

Be ene ibhio mhan ne yi misiọnari sẹ rẹ rẹkpa iwẹnna itẹmhọn Osẹnobulua yẹ? Frank Madsen nọn yi Ọkpa bhi Otu nọn Sun IBẹtẹ bhi Malawi da yọle: “Ranmhude izebhudu ọsi ene imisiọnari bi ebi ele rẹ sabọ manman tẹmhọn Osẹnobulua nọnsẹn yẹ, ele wo sẹ rẹkpa agbotu kẹkẹ rẹ sabọ lu itẹmhọn Osẹnobulua bhi eje bha lẹkhẹ bọsi, idunmhun nin ẹbho da manman noo igeti rẹ gbega uwa nọnsele bi eji a da zẹ urolo ọbhebhe. Ijiẹmhin esili ele wo rẹman ibhio mhan bhi agbotu bhi uwedẹ nin ele rẹ dọnmhegbe rẹ luẹ urolo nan zẹ bi uwedẹ nan rẹ lu emhin bhi idunmhun nin ele da tẹmhọn Osẹnobulua. Sẹyẹ, ele wo re ijiẹmhin esili man ene elasẹre ne ribhi agbotu, nin ele da sabọ deba iwẹnna itẹmhọn Osẹnobulua ọsi ẹghe rebhe. Mhan khuẹnmhẹn iJehova bhi iwẹnna nin ene misiọnari lu.”

Ọkpa bhi Otu Nọn Sun IBẹtẹ bhi agbaẹbho ọbhebhe da yọle: “Ijiẹmhin ọsi ene imisiọnari wo rẹman ghe, ẹbho nesi Jehova bhi otọ agbọn rebhe mhọn okugbe. Ẹbho ne bhọ iyi Esali Jehova yẹ daghe ọle ghe, arẹmiẹn agbaẹbho kẹkẹ mhan na vae, mhan wo yẹ mhọn okugbe bhi ẹwẹ mhan, ranmhude ẹmhọanta nọn ribhi Baibo nọn ku mhan kugbe.”

Be ene imisiọnari rẹ rẹkpa ibhio mhan bhi agbotu yẹ? Paulo nọn nabhi Timor-Leste vae da yọle ghe iwẹnna nin ene imisiọnari ne ribhi agbotu nọnsọle lu wo manman ti ọle bhọ. Ọle da yọle: “Agbaẹbho nọnsẹmhan wo manman to. Arẹmiẹn agbaẹbho nọn fuọfuọ ene imisiọnari nan na vae, ele sẹyẹ wo yo inẹbho, ele iji ovuẹn da mun ele mhọnlẹn. Ele wo vae bhi ikolo nan do ọsewewiẹ rẹ muegbe iwẹnna itẹmhọn Osẹnobulua. Mẹn kẹ wo daghe ele ọsodanmhẹn ẹghe nin ovuẹn rẹ zẹ bi ọsemuan, sade ele khian afikie yo. Ele sẹ wo rẹkpa imẹn bi ẹbho ne bunbun dọ lẹn ẹmhọanta. Ele wo re ọyaya bi eghọnghọn rẹ re iẹnlẹn nọnsele rebhe rẹ ga iJehova. Ọnan wo re ọhubhudu nin ibhio mhan rebhe bhi agbotu rẹ manman ha re eghọnghọn ga iJehova nọnsẹn.”

Ketti nọn lu iwẹnna ọkanẹfan ọsi ẹghe rebhe, nọn nabhi Malawi vae da tale ebi okhuo bi ọdọ ne yi misiọnari rẹ rẹkpa azagba-uwa nọnsọle yẹ. Ọle da yọle: “Ẹghe nin okhuo bi ọdọ ne yi misiọnari rẹ vae bhi agbotu nọnsẹmhan, imẹn ọkpa ha yi Esali Jehova bhi azagba-uwa nọnsẹmhẹn. Ele da wo rẹkpa mẹn yẹ kiẹn ikolu rẹji azagba-uwa nọnsẹmhẹn. Uwedẹ esili nin ele rẹ ha lu emhin da wo rẹkpa imọn nesẹmhẹn rẹ daghe eghọnghọn nan miẹn bhọ sade a ga iJehova. Ranmhude urẹkpa nọnsele, imọn-ikhuo ea nesẹmhẹn da kiẹn ene lu iwẹnna ọkanẹfan ọsi ẹghe rebhe. Sẹyẹ, ọdọ mẹn da munhẹn ha yo ikolo oga.”

Be imhan rẹ miẹn igho rẹ gbẹloghe ene imisiọnari nan yẹ? Igho nin ẹbho re ọkhọle nọnsele re re bhi donate.jw.org bi uwedẹ ebhebhe kẹkẹ, ọle mhan rẹ gbẹloghe ele. Igho nin bha re re wo ti mhan bhọ.