Be IJesu Diayẹ?
Ewanniẹn nin Baibo re ọbhọ
Baibo bha taman mhan ebi Jesu diayẹ bhi egbe bi ẹlo. Bhiriọ, ọria soso iribhọ nọn lẹn ebi Jesu gene diayẹ tee. Ọnan rẹman ghe ebi Jesu diayẹ bhi egbe bi ẹlo bha lu uhọnmhọn-emhin. Ọkpakinọn, Baibo taman mhan emhin eso rẹji ebi Jesu ha sabọ diayẹ.
Uwedẹ nin ọle rẹ lu emhin: Obhokhan iJew, ọle inẹn Jesu khin. Bhiriọ, asabọmiẹn ghe, Jesu wo ha lu emhin bhi uwedẹ nin ibhokhan iJew rẹ lu emhin. (Hebrews 7:14) A sabọ yẹ miẹn ghe, uwedẹ nin ọle rẹ lu emhin bha wo dikẹ bhi uwedẹ nin eria nekẹle rẹ lu emhin. Ẹghe ọkpa, ọle da sabọ do na iGalilee ha khian iJerusalem. Ọria soso bha lẹn ọlẹn. (John 7:10, 11) Uwedẹ nin Jesu rẹ lu emhin bha manman dikẹ bhi uwedẹ nin etuegbe nesọle rẹ lu emhin. Ranmhude ọnan, ẹghe nin eria eso rẹ vae nin ele dọ mun ọle khue, ele bha lẹn ọlẹn. Judas Iscariot re ọle man ele. —Matthew 26:47-49.
Ebi eto nọnsọle na sẹyẹ: Asabọmiẹn ghe eto nọnsi Jesu bha manman na, ranmhude Baibo yọle ghe, emhin nọn imhẹn nọn nin okpea rẹ ha mhọn eto nọn manman na.—1 Corinthians 11:14.
Eto-agban: Jesu wo ha mhọn eto-agban. Ọle wo re obọ rẹkhan uhi nin Jehova gbe nin bhokhan Izrẹl nọn yọle ghe, ọ bha khẹke nin okpea gbẹn eto-agban nọnsọle kua. (Leviticus 19:27; Galatians 4:4) A bhọ da sounun bhi eto-agban nọnsi Jesu bhi ọta akhasẹ ọkpa nọn tẹmhọn ẹghe nin eghian ọlẹn rẹ ha re loya nanlẹn.—Isaiah 50:6.
Egbe nọnsọle: Emhin ne bunbun nan lẹnlẹn rẹji Jesu rẹman ghe egbe wo gba nanlẹn. Ọle wo re oẹ khian okhian nọn manman ree ẹghe nin ọle rẹ ha lu iwẹnna itẹmhọn Osẹnobulua. (Matthew 9:35) Igba eva ọle ọkpa khu ẹbho ne bunbun bi elanmhẹn nin ele rẹ ha do ẹki bhi uwa oga kua. (Luke 19:45, 46; John 2:14, 15) Ebe ọkpa natiọle McClintock and Strong’s Cyclopedia da yọle: “okha nọn tẹmhọn ebi Jesu rẹ lu iwẹnna itẹmhọn Osẹnobulua wo rẹman ghe, ọle wo ha mhọn egbe nọn gbale.”—Volume IV, page 884.
Ebi ẹlo nọnsọle diayẹ bhi uhọnmhọn: Jesu ikhekhe ẹlo a bhi uhọnmhọn. Ọria nọn mhọn ẹkẹ-ẹjẹjẹ ọle khin. (Matthew 11:28, 29) Ọle wo ha rẹkpa unan ẹbho kẹkẹ yẹ ko ele udu re. (Luke 5:12, 13; 7:37, 38) Egbe wo fu ene ibhokhan re sade ele ribhi eji ọle ye.—Matthew 19:13-15; Mark 9:35-37.
Emhin nọn bha gba nin ẹbho ta rẹji ebi Jesu diayẹ
Ohoghe: Eria eso yọle ghe, otọ Africa, ọle Jesu na vae. Ele ta ọnan ranmhude uwedẹ nin ebe nọnsi Revelation yọle ghe eto bi oẹ nọnsọle diayẹ.—Revelation 1:14, 15.
Ẹmhọanta: “Iyaman kẹkẹ” ele a noo bhi ebe nọnsi Revelation. (Revelation 1:1) Arẹkhọkhọ ebe nọnsi Revelation re oẹ bi eto nọnsi Jesu rẹ lu. Ikpẹ nin Jesu ha mhọnlẹn ẹghe nin ọle rẹ riọ kpanọ fo bhi uu, ọle ebi ebe nọnsi Revelation tẹmhọnlẹn mundia nan. Ọ iyi ebi egbe nọnsọle gene diayẹ. Ẹghe nin ebe nọnsi Revelation 1:14 rẹ yọle ghe eto nọn ri Jesu bhi uhọnmhọn fua bii ilọn ọsi ohuan, uwedẹ nin edẹn nọn ribhi uhọnmhọn rẹ fua, ọle enin rẹ ha lu arẹkhọkhọ. Ẹwanlẹn nin Jesu mhọnlẹn, ranmhude ika ikpe nin ọle sẹ gbe bhi agbọn, ọle ọne arẹkhọkhọ mundia nan. (Revelation 3:14) Ẹmhọn nọn ribhi ọne Baibo nan bha rẹman ghe, eto nọn ribhi uhọnmhọn nọnsi Jesu diabe ilọn nọn ribhi egbe ọsi ohuan.
Ebe nọnsi Revelation da yẹ yọle ghe, oẹ nọnsi Jesu diabe oze nan tuẹ bhi eranlẹn. (Revelation 1:15) Ọ da yẹ yọle ghe, ẹlo nọnsọle diabe ovuẹn nọn manman zẹ. (Revelation 1:16) A bha miẹn unan ẹbho soso ne dia inian bhi ọne agbọn nan. Bhiriọ, arẹkhọkhọ, ọle emhin nin John daghe bhi ọne imianlo nan khin. Ebi ọle daghe Jesu diayẹ bhi ukhun ẹlinmhin, ọle John tẹmhọnlẹn bhi ọne imianlo nan. —1 Timothy 6:16.
Ohoghe: Jesu wo wẹghẹ a.
Ẹmhọanta: Jesu wo ha yi okpea nọn deziẹn. Bhi ọsi ijiẹmhin, ofẹn bha mun ọlẹn rẹ yọle ghe, ọle hi Jesu ẹghe nin eghian ọlẹn rẹ ha guanọ nin ele mun ọlẹn khue. (John 18:4-8) Emhin ọbhebhe nọn rẹman ghe okpea nọn deziẹn ọle Jesu khin hi, ọle wo ha noo emhin nan rẹ kanọ eran rẹ lu iwẹnna kapẹnta.—Mark 6:3.
Ahamiẹn okpea nọn deziẹn Jesu gene khin, bezẹle nin ọle bha da sabọ mun eran nan ha khan ọlẹn mun? Sẹyẹ, bezẹle nin ọle da ka ẹbho nekẹle nan khan ba ọle yu? (Luke 23:26; John 19:31-33) Ọkuẹsẹ ẹghe nan ha rẹ gbe iJesu a, egbe da wo manman lọ ọle. Ọle bha miẹn owe ọsasọn ọkuẹsẹ a gbe ọle. Ọle da wo ha ria ẹmhọn oya bi uu nọn khẹ ọle. (Luke 22:42-44) Ọne ukpasọn nin, ibhokhan iJew da manman re oya nin Jesu. Ẹdẹ ki yẹ we, egbanegbe ọsi Rome da yẹ manman re oya nanlẹn le. (Matthew 26:67, 68; John 19:1-3) Asabọmiẹn ghe, ene emhin nan zẹle nin ọle da ka ene eria nin yu.
Ohoghe: Ọria nọn ighọnghọn hiehie, ọle iJesu ha khin.
Emhọanta: Jesu wo manman re egbe khọkhọ iJehova nin Aba ọle nin Baibo tiọle “Osẹnobulua ọsi eghọnghọn.” (1 Timothy 1:11; John 14:9) Bhi ọsi ẹmhọanta, Jesu wo ha man ẹbho emhin nin ele ha lu nin da ha ghọnghọn bhi iẹnlẹn. (Matthew 5:3-9; Luke 11:28) Ene emhin nan rẹman ghe ọria nọn wo ha ghọnghọn, ọle Jesu khin. Ọle bha ha khekhe ẹlo a bhi uhọnmhọn.