Ologho Nọn Riia Ijerebhe A—Be Baibo Ta Yẹ?

Ologho wo riia ẹbho emhin an bhi otọ agbọn rebhe. Fẹ ebi ẹbho eso ta yẹ:

• “Okpamẹn da wo ha rọ bhi otọ China bhi ẹkẹ ikpẹdẹ eso ne gbera, rẹ na bhi ẹdẹ Satọde rẹ sẹbhi ẹdẹ Wẹnẹzde. Ọne amẹn da wo si ologho nọn dinmhin gbera ifiti 4. Ọ gbera ikpe 140 nin okpamẹn nọn sẹ inian rọ bhi otọ China.”—AP News, Ọgọst 2, 2023.

• “Efi natiọle Typhoon Khanun nọn manman fi bhi ẹdẹ Tọzde nin ukpẹdẹ nọnzi eva, da si okpamẹn bi okpahoho. Ọne okpamẹn bi okpahoho da gbe ebe sẹ itue eva a. . . . Ọne okpahoho nan dẹ sabọ si amẹn nọn ha sabọ si ologho nọn dinmhin sẹ ifiti eva bhi eji oke ye bhi ijeso bhi Taiwan.”—Deutsche Welle, Ọgọst 3, 2023.

• “Okpamẹn nọn rọle, ọle si ologho [bhi Nova Scotia] bhi eje sikẹ okpẹdẹ natiọle Atlantic bhi Canada. Ọ gbera ikpe 50 nin ologho nọn sẹ inian na bhi otọ Canada.”—BBC News, Julai 24, 2023.

Be Baibo ta yẹ rẹji ene emhin nan ne sunu?

Ọkpa bhi emhin ne ha rẹ mhan lẹn ghe “ẹghe ọkike” mhan ki ye

Baibo ji mhan lẹn ghe, ẹghe nin mhan da nyẹnlẹn nan, ọle a tiọle, “ẹghe ọkike.” (2 Timothy 3:1) Jesu yọle ghe, bhi ẹghe nọnsẹmhan nan, “emhin ne re ofẹn mun ẹbho ki ha sunu.” (Luke 21:11) Ẹghe okale bi ẹghe orọ nọn ki wo fidenọ deba ebe si ọle nin okpamẹn, okpahoho, bi ologho da ki wo sunu ẹghe-ẹghe yẹ riia ijerebhe a ẹlẹnan.

Ikhuaẹloghe nin mhan mhọnlẹn

Baibo taman mhan ghe, emhin ne sunu ẹlẹnan ne re ofẹn mun ẹbho dẹ sabọ re imhan ha mhọn ikhuaẹloghe. Be ọ rẹ ye iriọ yẹ? Jesu da yọle: “Ibha ha daghe ọle ghe ene emhin nan munhẹn ha sunu, ibha lẹn sẹbhọ ghe, Agbejele nọnsi Osẹnobulua sire.”—Luke 21:31; Matthew 24:3.

Ene emhin nin mhan daghe ne sunu ẹlẹnan rẹman ghe Agbejele ọsi Osẹnobulua dẹ kẹ dia emhin ne riia ọne otọ nan an, bọsi, okpamẹn, ologho, ọkhualulu, bi emhin ne dia inian.—Job 36:27, 28; Psalm 107:29.

Nin uwẹ rẹ luẹ ba ebi Agbejele nọnsi Osẹnobulua ha rẹ hẹnhẹn ọne otọ nan yẹ, tie ọne uhọnmhọn-ọta nọn yọle, “Họla Ha Hinmhin ọne Otọ Nan?”