Bezẹle nin Ahinmhin-ibo Da Wa Ẹbho A?—Be Baibo Ta Yẹ?

Ilọnmhọn ahinmhin-ibo wo wa ẹbho a bhi otọ agbọn rebhe. Otu ọkpa natiọle Pew Research Center da dọ nọọn ẹbho eso ọta bhi agbaẹbho ne bun sẹbhi 19 bhi ukpe 2022, reji ebi ilọnmhọn ahinmhin-ibo rẹ wa ẹbho a yẹ bhi agbaẹbho nọnsele. Ẹbho ne bunbun bhi ẹwẹ ele da yọle ghe, ilọnmhọn ahinmhin-ibo wo wa ẹbho ne ribhi usun ahinmhin-ibo kẹkẹ a bhi isi ele.

Uwẹ be daghe ọle ghe ilọnmhọn ahinmhin-ibo wa a ẹbho gbera ọnikhẹ bhi eji uwẹ da nyẹnlẹn? Bezẹle nọn da dia iriọ? A dẹ be sabọ re ọne ẹmhọn ọi? Fẹ ebi Baibo ta yẹ.

Ebe si iwaegbe a re

Baibo ka tale khẹ ghe, ọne ẹghe nọnsẹmhan nan nian natiọle “ẹghe ọkike,” ẹbho ne bunbun dẹ ha lu emhin nọn ha re ọle nọghọ rẹ ha mhọn okugbe.

• “Bhi ẹghe ọkike, ọkakale nọn bha lẹkhẹ nan rẹ khọn, dẹ ha ribhọ. Eria ki ha hoẹmhọn egbe ele ọkpa. . . . A ida yẹ ko ta ọta re obọ rẹkhan ọlẹn.”—2 Timothy 3:1-3.

Arẹmiẹn ẹbho ne bunbun dọnmhegbe rẹ lu emhin nin ele ha sabọ lu, ọ yẹ nọghọ gọvamẹnt rẹ sabọ lu iwẹnna nọnsele nọnsẹn. Ọ dẹ manman nọghọ nin ẹbho ne imhọn ọkhọle ọkpa rẹ sabọ kugbe ha re emhin khian nọnsẹn. Ebi mhan daghe ẹlẹnan diẹn mun ebi Baibo tale bhi ikpe ne bunbun ne gbera.

• “Eria . . . denyẹnyẹn ibo ele yẹ si ikuan-egbe ji ele.”—Ecclesiastes 8:9.

Ọkpakinọn, Baibo ji mhan lẹn ghe Agbejele ọkpa ribhọ nọn ha sabọ rẹkpa mhan, ranmhude, ọnọn gbẹloghe bhọ mhọn ọne ahu rẹ re ọkpẹnlẹn ọbhi iloya nesi eria rebhe ẹlẹnan.

Ọnọn mhọn ọne ahu rẹ gbẹloghe nọn mhọn ẹmhọn ẹbho bhi ọkhọle

Baibo tẹmhọn ọria nọn sẹ ọnọn ha sabọ gbẹloghe eria. Ọne ọria hi Jesu Kristi. Jesu mhọn ọne ahu bi ọnọn ọkhọle rẹ mun okugbe bi ọfure ji ọrebhe.

• “Bhi ikpẹdẹ nesọle, emhin ki manman ha mhẹn nin ene khiale, ọfure ki gba ije rebhe.”—Psalm 72:7.

• “Agbaẹbho rebhe dẹ ga ọle.”—Psalm 72:11.

Jesu hi ọria nọn khẹke nọn ha gbẹloghe ranmhude ẹmhọn ẹbho rẹtẹ ọle, sẹyẹ ọle guanọ nin ọle rẹkpa ẹbho, manman nọn ene a denyẹnyẹn.

• “Ọle dẹ hinmhin ene bha miẹn rẹ lu ne viẹ bu ọle re. Ọle dẹ yẹ hinmhin ene ibhioguele bi ọria nọn ki rẹ khin nọn imhọn urẹkpa. Ọle dẹ mhọn itohan da ene ibhioguele bi ene bha miẹn rẹ lu, Ọle dẹ miẹn iẹnlẹn ọsi ene bha miẹn rẹ lu fan. Ọle dẹ miẹn ele fan bhi obọ ene denyẹnyẹn ele, bi ene ne ele khọnlẹn.”—Psalm 72:12-14.

Luẹ ba ebi uwẹ lẹn rẹji Agbejele nọnsi Osẹnobulua nin Jesu ha da ha gbẹloghe. Luẹ ebi uwẹ ha rẹ miẹn elele bhi ọne ugbẹloghe yẹ bi ebi uwẹ ha re re obọ ba ọle yẹ.

• Ghe ọne ividio natiọle Bebhọ Agbejele Nọnsi Osẹnobulua?

• Tie ọne uhọnmhọn-ọta nọn yọle, “ God’s Kingdom—A Government With No Corruption.” (Agbejele Nọsi Osẹnobulua—Ugbẹloghe Nin Eku Iye)