ỌTA NIN ERIA NE TIE EBE NESẸMHAN NỌỌN

Beji Galesha 4:24 rẹman, akovẹn eva nela Pọl nin odibo ha tẹmhọnlẹn?

Pọl nin odibo ki tẹmhọn ebi Hega bi Sera rẹ biẹ nin Ebraham fo yẹ, ọle da yọle: “Mhan dẹ sabọ re ene emhin nan lu arẹkhọkhọ. Ene ikhuo eva nan mundia nin akovẹn eva.” (Gal. 4:​22-24) Bhi ẹghe nin khẹ, Esali Jehova ka rẹọbhọ ghe, ene akovẹn veva nan hi, akovẹn ọsọgbọn bi Uhi ọsi akovẹn. Ọkpakinọn, beji mhan kikie fẹ ọle ghe, mhan da dọ kere ghe ọkhẹke nin mhan fi uwedẹ nin mhan ka rẹ lẹn ọlẹn denọ. Ọ diabe ghe, ọ i yi akovẹn ọsọgbọn Pọl ha tẹmhọnlẹn, sokpan, akovẹn ọsi Ebraham ọle ha tẹmhọnlẹn. Ji mhan fẹ emhin eso ghe nọn zẹle nin ọle da ta iriọ.a

Pọl yọle ghe Uhi ọsi akovẹn nan gbe bhi Oke Ọsi Sanai bhi ukpe 1513 B.C.E., ọle Hega mundia nan. (Ex. 19:​5, 6) Eria ne bha gba nan ibhokhan Ju ha khin, bhiriọ, ele bha sabọ re obọ rẹkhan ọne Uhi tee beji a rẹ gbẹn ọlẹn. Ọnan da wo ha rẹkpa ele rẹ yere ghe, igbọn ele khin rẹji olukhọ. Ọne akovẹn nan da rẹkpa ibhokhan Izrẹl rẹ lẹn ọne Mezaya. Ọle ọkpa hi ọria nọn sabọ re obọ rẹkhan ọne Uhi tee beji a rẹ gbẹn ọlẹn. Ẹghe nin ọne Mezaya ki rẹ re iẹnlẹn nọnsọle zọese nin eria, ọle da fan ele fia bhi obọ olukhọ bi uu. (Gal. 3:​19, 24, 25) Beji Jesu ki re iẹnlẹn nọnsọle zọese nin mhan fo, ọ bha yẹ khẹke nin mhan ha re obọ rẹkhan ọne Uhi ọsi akovẹn.—Rom 10:4.

Pọl da rẹman ghe Haga bha diabe Sera. Sera “iyi igbọn,” sẹyẹ, “ranmhude ive nin Osẹnobulua ve” zẹle nin ọle da sabọ biẹ ọmọn nọnsọle. (Gal. 4:23) Ọne ive nin hi, akovẹn nin Jehova deba Ebraham gbe. (Gal. 3:29; 4:​28, 30). Bhi ebe ọsi Genesis 22:​18, Jehova da yọle: “Rẹ na obọ ọmọn nọnsẹ, ẹbho rebhe ne ribhi ọne otọ agbọn nan rebhe ki miẹn erọnmhọn, ranmhude uwẹ ka mẹn ehọ.”

Ọne akovẹn nan nin Jehova deba Ebraham ve rẹkpa mhan rẹ ye ive nin Jehova ka ve bhi ogba ọsi Idẹn re. (Gen. 3:15) Ọnan rẹkpa mhan rẹ lẹn ghe, ọne “ọmọn” nan ve ive ọle, dẹ na bhi ulin-uwa ọsi Ebraham vae. Pọl da gbotọle fanọn ghe, Jesu Kristi, ọle hi ọne “ọmọn” nan. Ọkpakinọn, ene ribhi “ibo nọnsi Kristi,” ne yi itue 144,000 ne ha deba Jesu gbẹloghe bhi okhun yẹ deba bhi ọne “ọmọn” nan. (Gal. 3:​16, 29; Arẹm. 14:​1-3) Bhi ẹghe nin ive nin Jehova ve nin Ebraham ha rẹ munsẹ, ẹbho ne bunbun ne miẹn Jesu ọbhi egbe yẹ lu ebi ọle tale, dẹ miẹn elele ne bunbun bhọ.

Bezẹle nin Pọl da noo ene arẹkhọkhọ nan? Ranmhude ọle ho nin ọle rẹman ghe, ahamiẹn ibhokhan Ju bhi ẹghe nọnsọle sẹyẹ ha re obọ rẹkhan Uhi ọsi Mozis, ọnan rẹman ghe, ele dẹ sẹyẹ ha yi igbọn bii Hega. Ọkpakinọn, ahamiẹn ele miẹn ọne “ọmọn” ọsi Ebraham ọbhi egbe, nọn yi Jesu Kristi, ọnan rẹman ghe, ele i yẹ da ha yi igbọn bii Sera. A ki fan ele fia sẹsẹsẹ bhi obọ olukhọ bi uu. (Jọni 8:​32-34) Ahamiẹn ele bha miẹn Jesu ọbhi egbe, ọnin rẹman ghe, ele bha lẹn otọ ebezẹle nan da gbuhi ọsi akovẹn nin ele, nọn ha dia ele bu ọne Kristi.

Kristiẹn ne bunbun bhi Galesha nin Pọl ha gbẹn ilẹta je, ene i yi ibhokhan Ju ele khin. Ẹghe bha ha ribhọ nin ele rẹ ha ribhi odotọ Uhi ọsi Mozis. Ọkpakinọn, ibhokhan Ju eso da ha guanọ nin Kristiẹn ne i yi Ju ha re obọ rẹkhan ọne Uhi, rẹ dọ sẹbhi uhi nọn yọle nin orebhe ha ruẹ. Pọl da ji ele lẹn ghe, ọ i yi emhin ẹwanlẹn nin ele rẹ ha lu emhin nọn sẹriọ, ranmhude, ọ bha yẹ khẹke nin ele ha yi igbọn rẹji ọne Uhi. A bhọ ki miẹn ele fan fo nin ele rẹ miẹn Kristi ọbhi egbe.—Gal. 5:​1, 10-14.