Ọgan Nan Rẹ Gbe Ehẹn Nan Tẹmhọnlẹn Bhi Baibo

Ehẹn eso bhi edibo nesi Jesu ha gbe khiẹn rẹ gbẹloghe egbe. (Mak 1:​16-20) Ọgan ele ha noo rẹ gbe ehẹn bhi Okpẹdẹ ọsi Galili.

Nin ọria rẹ sabọ lu ọgan nan rẹ gbe ehẹn, ọne ọria ki do ikpiri ne bunbun kugbe rẹ sẹbhọ ghe ọ ki dọ diabe nẹnti. Unan ehẹn nin ọria ho nin ọle gbe ha rẹkpa ọle rẹ lẹn unan ọgan nin ọle ha do—si ọnọn kpọnọ nọn la ọnọn khere nọn. Ọgan nin khere mhọn ikuẹ-ikuẹ udo nan diẹn mun ọlẹn nọn rẹkpa ọle rẹ diọbhi otọ ẹdẹ sade a fi ọle bhi ẹkẹ ẹdẹ. Ọgan nọn kpọnọ nọn ribhọ manman khua bhi otọle. Sẹyẹ, ọ mhọn emhin bii eran la emhin ebhebhe nan lu nẹga okhun ọlẹn nọn rẹkpa ọle rẹ mundia bhi eji a mun ọlẹn i bhi ẹkẹ ẹdẹ, beji a ha da miẹn ọ bha kuelo.

Igho nọn mamman kpọnọ a rẹ dẹ ọgan bhi ẹghe ẹdẹlẹ. Udo ne ribhi ẹkẹ ẹdẹ dẹ sabọ riia ọnọn ọgan an. Sẹyẹ, ehẹn ha bun gbe nan re ọnọn ọgan mun, ọ dẹ yẹ sabọ riia ọle a. (Luk 5:6) Baibo tẹmhọn ẹghe nin Jemis bi Jọni rẹ ha “hẹnhẹn ọgan nọnsele.” Asabọmiẹn olu bi agbede ele ha noo rẹ hẹnhẹn ọlẹn. (Mat. 4:21) Sẹyẹ, asabọmiẹn ele ha gbe ehẹn fo ele da hẹnhẹn ọgan nọnsele. Luk yẹ tẹmhọn ẹbho ne gbe ehẹn ne ha kpe ekhuọrọ sibhi ọgan nọnsele re. (Luk 5:2) Ele ha ki lu iriọ fo, ele ki muno ọgan nọnsele ka. Asabọmiẹn ebezẹle nin ele da lu ọnan hi, beji a ha da miẹn ọne ọgan bha riia.—Ezek. 47:10.

Jesu da tie ikpia ne guẹ ebi a rẹ noo ọgan rẹ gbe ehẹn yẹ nin ele dọ ha tẹmhọn Osẹnobulua. Ọle da taman ele yọle, “Imẹn dẹ rẹ ibha ha muno eria beji bha rẹ muno ehẹn.”