Jesu Hi Ojohẹn Nọnsẹmhan Nọn Mhọn Ẹkẹ-ẹjẹjẹ

1-2. (a) Bezẹle nin Jehova da je Ọmọn nọnsọle vae bhi ọne otọ nan? (b) Be mhan ha zilo nyan bhi ọne uhọnmhọn-ọta nan? (Hibru 5:​7-9)

BHI ikpe 2,000 ne gbera nian, Jehova da je Ọmọn nọnsọle nin ọle manman hoẹmhọn ọlẹn vae bhi ọne otọ nan. Bezẹle? Emhin ọkpa nọn zẹle hi, nin ọle dọ miẹn mhan fan bhi obọ olukhọ bi uu, bi nin ọle rẹ ne ọkakale rebhe nin Esu si bhi ọne otọ nan kie. (Jọni 3:16; 1 Jọni 3:8) Jehova yẹ lẹn ghe, emhin kẹkẹ nin Jesu ha kuẹlo da bhi ọne otọ nan dẹ rẹkpa ọle rẹ muegbe ọbhi otọ, rẹ ha yi Ojohẹn nọnsẹmhan nọn mhọn itohan bi ẹkẹ-ẹjẹjẹ. Jesu da munhẹn ha ga bhi ọne ihe nan beji ọle mianmẹn fo bhi ukpe 29 C.E.a

² Bhi ọne uhọnmhọn-ọta nan, mhan dẹ zilo nyan ebi emhin kẹkẹ nin Jesu kuẹlo da bhi ọne otọ nan, rẹ rẹkpa ọle rẹ sẹ ọria nan ha re ọbhi ihe ọsi Ojohẹn nọn mhọn itohan yẹ. Beji mhan ha rẹ manman ha lẹn otọ ebezẹle nin Jesu da sẹ ọria nọn khẹke nọn ha ribhi ọne ihe nan, ọ dẹ re ọle lẹkhẹ nin mhan rẹ ha nan erọnmhọn ji Jehova, sade mhan lu akhiẹ ranmhude idobọ nesẹmhan la mhan mhọn eji mhan da wẹghẹ.—Tie Hibru 5:​7-9.

ỌMỌN NỌNSI OSẸNOBULUA NIN ỌLE HOẸMHỌN ỌLẸN DA VAE BHI ỌNE OTỌ NAN

3-4. Emhin nela Jesu fiya bhi okhun vae bhi ọne otọ nan? Be iẹnlẹn nọnsọle diayẹ bhi ọne otọ nan?

³ Ene bunbun bhi ẹwẹ mhan sẹ wo fi emhin denọ bhi iẹnlẹn ranmhude idia nin ele ye. Emhin bii, nin mhan rẹ sibhi eji mhan da nyẹnlẹn re nin mhan manman hoẹmhọnlẹn, zẹ azagba-uwa nọnsẹmhan obọ la imọẹ mhan. Ọ i lẹkhẹ nan rẹ fi emhin ne sẹriọ denọ bhi iẹnlẹn. Ọrẹyiriọ, ọria soso i ribhọ nọn sẹ fi emhin denọ bhi iẹnlẹn sẹ bii Jesu. Jesu hi ẹhi ọhẹnhẹn nin Jehova ka man, sẹyẹ, ọle hi ọne yẹ khua okhun nẹ bhi ẹwẹ ene ẹhi rebhe. Jehova wo manman hoẹmhọn ọlẹn, sẹyẹ, Jesu wo manman ha ghọnghọn nin ọle bi Jehova rẹ ko ha wẹnna kugbe. (Ps. 16:11; Prov. 8:30) Ọrẹyiriọ, Filipai 2:7 yọle ghe, ọle da “degbere sẹsẹsẹ.” Jesu da zẹ ihe nin ọle ha ye bhi okhun obọ, yẹ vae bhi ọne otọ nan dọ deba eria nọn bha gba nan fo ha nyẹnlẹn.

⁴ Fẹ ebi iẹnlẹn nọnsi Jesu dia yẹ bhi ẹghe nan rẹ la biẹ ọle, bi beji ọle ha wanre. Ene biẹ Jesu bha fe. Ebe rẹ mhan lẹn ọnan hi, ranmhude ebi ene biẹ ọle rẹ zọese bhi ẹghe nan rẹ la biẹ ọle. (Lev. 12:8; Luk 2:24) Ẹghe nin Hẹrọd nin Ojie rẹ lẹn ghe a biẹ Jesu, ọle da ha guanọ Jesu nin ọle gbe a. Nin ene biẹ Jesu da sabọ gbega iẹnlẹn nọnsọle, ele da nẹ diọbhi Ijipt dọ ha nyẹnlẹn. (Mat. 2:​13, 15) Iẹnlẹn nọnsi Jesu bhi ọne otọ nan wo dikẹ bhi iẹnlẹn nin ọle ha nyẹnlẹn bhi okhun!

5. Be Jesu daghe bhi ọne otọ nan? Be emhin nin ọle kuẹlo da bhi ọne otọ nan rẹ rẹkpa ọle rẹ muegbe ọbhi otọ khẹ ihe ọsi Ojohẹn yẹ? (Yẹ fẹ ifoto ghe.)

⁵ Beji Jesu ribhi ọne otọ nan, ọle wo ha daghe uwedẹ nin ẹbho rẹ ha loya. Edandan i ribhọ ghe eria eso nin Jesu hoẹmhọnlẹn yumhin, rẹ dọ sẹbhi aba ọle nin Josẹf. Ẹghe nin Jesu rẹ ha lu iwẹnna itẹmhọn Osẹnobulua, ọle wo ha daghe ẹbho ne ha loya. Ẹbho bii, ene khọnmhọn emianmhẹn egbekẹn, ene ruẹlo, akhun, enebiọmọn nin ọmọn nọnsele yu, sẹyẹ, ọle da mhọn ẹkẹ-ẹjẹjẹ da ene ẹbho nan. (Mat. 9:​2, 6; 15:30; 20:34; Mak 1:​40, 41; Luk 7:13) Bhi ọsi ẹmhọanta, Jesu wo ha daghe ẹbho ne ha loya bhi ọne otọ nan bhi ẹghe nin ọle rẹ ha nyẹnlẹn bhi okhun. Ọkpakinọn, beji ọle ki ha ribhi ọne otọ nan, ọle da wo dọ lẹn ebi emhin dia ẹbho ne loya yẹ bhi egbe. (Isa. 53:4) Emhin nin Jesu miẹn bhi ọne otọ nan hi ebe rẹkpa ọle rẹ lẹn ebi ọ dia ẹbho yẹ bhi egbe sade egbe iẹnlẹn lọ ele, la ele ribhi ọbalọ. Beji ọ dia eria bhi egbe, egbe yẹ wo lọ Jesu. Ọle yẹ wo ha kpokpo egbe, yẹ wo ha lu akhiẹ.

JESU DA JI ẸMHỌN ẸBHO RẸTẸ ỌLE

6. Be mhan miẹn luẹ bhi akhasẹ nin Ẹzaya khale rẹji Jesu? (Isaiah 42:3)

⁶ Bhi ẹghe nin Jesu rẹ ha lu iwẹnna itẹmhọn Osẹnobulua, ọle da wo ha ji ẹmhọn ẹbho nan ha lu khọlọ da rẹtẹ ọle. Bhiriọ, ọle da re ọnan mun ọta-akhasẹ nin Jehova na bhi obọ Ẹzaya kha sẹ. Bhi Baibo nan re urolo Hibru gbẹn, a kẹ re ẹbho ne fe bi ẹbho ne ziẹnlẹn rẹ khọkhọ ugbo nọn sikẹ egbe ẹdẹ, la eran nọn manman kpọnọ, nọn yẹ ziẹn. (Ps. 92:12; Isa. 61:3; Jer. 31:12) Ọkpakinọn, ẹbho ne bha fe, bi ẹbho nin egbe iẹnlẹn lọle, a kẹ re ele khọkhọ ilunmhun nọn khuẹn ghọghọ, bi ukuolulu ọsi orukpa nọn wo ha kẹa khian. Ẹbho i ghe emhin ne sẹnian bii emhin soso. (Tie Isaiah 42:3; Mat. 12:20) Rẹ na obọ Ẹzaya nin akhasẹ, Jehova da noo ene ọta nan rẹ tẹmhọn oyẹẹ bi ẹkẹ-ẹjẹjẹ nin Jesu da ha mhọn da ẹbho nan re ẹlo gbe a, bi eria nin ẹbho ghe bii eria ne bha sẹ emhin soso.

7-8. Be Jesu rẹ mun ọta akhasẹ nin Ẹzaya khale sẹ yẹ?

⁷ Matiu nọn yi ọkpa bhi eria ne gbẹn Baibo, da tẹmhọn ebi akhasẹ nin Ẹzaya khale rẹ rẹtẹ Jesu yẹ, bhi ẹghe nin ọle rẹ yọle: “Ilunmhun nọn khuẹn ghọghọ, ọle ida wo khuẹn ọlẹn an fo. Ukuolulu nọn kẹa khian, ọle ida wo fuẹn ọlẹn an.” Jesu wo lu emhin ọhan-ilo ne bunbun rẹ rẹkpa ẹbho nan ha re obọ oya mun, la ẹbho ne ha riale ghe, idia nin ele ye i da fidenọ. Ọkpa bhi ene eria nan da ha yi okpea ọkpa nọn ha khọnmhọn emianmhẹn egbekẹn. Asabọmiẹn ọne okpea da ha riale ghe egbe i da daan ọlẹn ghẹdẹ. Sẹyẹ, ghe, ọle i da miẹn ọne isẹhoa rẹ deba azagba-uwa nọnsọle bi imọẹ ọle gbe ẹghe kugbe hiehie. (Luk 5:​12, 13) Ọria ọbhebhe nin Jesu yẹ re egbe daan da ha yi okpea ọkpa nọn yehọ, nọn i yẹ sabọ talọ nọnsẹn. Ria ẹmhọn ebi egbe ha dia ọne okpea nan yẹ beji ọle rẹ ha daghe ẹbho ne ha ne egbe ele talọ, ọkpakinọn, ọle bha sabọ lẹn ebi ele ta. (Mak 7:​32, 33) Ọkpakinọn, emhin ebhebhe yẹ ribhọ nin Jesu kuẹlo da bhi iẹnlẹn beji ọle ribhi ọne otọ nan.

⁸ Bhi ẹghe nọnsi Jesu, ibhokhan Ju wo rẹọbhọ ghe, ranmhude emhin ebe nin ẹbho ne loya lu, la emhin ebe nin ene biẹ ele lu, ọle zẹle nin ele da loya. (Jọni 9:2) Ranmhude ọne ohoghe nan nin ele rẹọ i, iẹnlẹn da wo ha nọghọ ene ẹbho ne khọnmhọn la ene loya. Nin Jesu rẹ mun ọta akhasẹ nin Ẹzaya khale sẹ, ọle da ha re egbe daan ene khọnmhọn, yẹ rẹkpa ele rẹ lẹn ghe ẹmhọn ele rẹtẹ Osẹnobulua. Iruduba nela ọnan re nin mhan?

9. Be ebe ọsi Hibru 4:​15, 16 rẹ rẹman yẹ ghe, Jesu nọn yi Ojohẹn nọnsẹmhan mhọn itohan da eria nọn bha gba nan?

⁹ Tie Hibru 4:​15, 16. Mhan dẹ sabọ ha mhọnlẹn bhi ọkhọle ghe Jesu dẹ mhọn itohan da mhan. Be ọnan mundia nan? Ọria nọn mhọn itohan ji ẹmhọn ẹbho ne loya da rẹtẹ ọle. Ọne ukpọta Grik nan zedu ọle diọbhi nan rẹ ‘tohan’ ọria, mundia nin, nin ọria rẹ mun egbọle ọbhi idia ọsi ọria ọbhebhe, la ji ẹmhọn ọria da rẹtẹ ọria. (Yẹ fẹ Hibru 10:34 ghe.) Emhin ọhan-ilo kẹkẹ nin Jesu lu nan gbẹn ọbhi Baibo rẹman ghe oya nin ẹbho ha le wo manman rẹso ọle. Ọ i yi nan rẹ gheghe re egbe daan ene ẹbho nan zẹle nin Jesu da lu ọle, ẹmhọn ele wo manman rẹtẹ ọle, sẹyẹ, ọ ghọn ọlẹn nin ọle rẹ re egbe daan ele. Bhi ọsi ijiẹmhin, Jesu ha rẹ sabọ re egbe daan ọne okpea nọn khọnmhọn emianmhẹn egbekẹn aharẹmiẹn ọle bha re obọ so ọle. Sokpan, ọle da re obọ so ọne okpea. Asabọmiẹn ọnan hi ẹghe ọhẹnhẹn nin ọria sẹ re obọ so ọne okpea nan bhi ẹkẹ ikpe ne bunbun nian. Beji Jesu ho nin ọle re egbe daan ọne okpea nọn yehọ, ọle da re ọle sibhi ẹwẹ usun ẹbho re dọ re egbe daan ọlẹn bhi eje fiahiẹ a. Ẹghe nin okhuo ọkpa nọn ki fidenọ bhi emhin ebe nin ọle ka rẹ ha lu, rẹ re amẹn eviẹ rẹ kpe oẹ nọnsi Jesu, yẹ re eto ka ọle, obhokhan Farisi ọkpa da ha re ẹlo gbe ọle a. Ọkpakinọn, Jesu da mundia nin ọne okhuo. (Mat. 8:3; Mak 7:33; Luk 7:44) Jesu bha ha fikekegbe ẹbho ne khọnmhọn, la ne lu emhin ebe nọn manman kaka, ọle da mhọn ẹkẹ-ẹjẹjẹ da ẹbho ne sẹnian yẹ miẹn ele ọbhi egbe. Mhan dẹ sabọ rẹọbhọ ghe, Jesu dẹ mhọn itohan da mhan.

RE EGBE KHỌKHỌ OJOHẸN NỌNSẸMHAN ẸLẸNAN

10. Be agbotu nọnsi Jehova sẹ lu dagbare ne ha rẹkpa ene yehọ bi ene i daghe? (Yẹ fẹ ene ifoto ghe.)

¹⁰ Beji a miẹn ene rẹkhan Jesu mhan khin, mhan wo dọnmhegbe rẹ re egbe khọkhọ ọle bhi uwedẹ nin ọle rẹ re oyẹẹ man, nin ọle rẹ ji ẹmhọn ẹbho da rẹtẹ ọle, bi itohan nin ọle mhọn da ẹbho. (1 Pita 2:21; 3:8) Aharẹmiẹn ghe mhan i da sabọ re egbe daan ene yehọ bi ene ruẹlo, mhan dẹ sabọ rẹkpa ele rẹ dọ lẹn Osẹnobulua, yẹ sikẹ ọle. Bhi ọsi ijiẹmhin, Baibo nan zedu ọle diọbhi urolo ọsi odin bun gbera 100. Rẹji ẹbho ne i daghe nọnsẹn la ene ruẹlo, a lu ebe nesẹmhan kẹkẹ natiọle braille nin ele, bhi urolo ne bun gbera 60. Rẹ deba ọnin, ọria ribhọ nọn ta ebe sunu dagbare bhi ividio kẹkẹ nesẹmhan nan zedu ọle diọbhi urolo ne bun gbera 100. Ene yehọ bi ene i daghe a lu ene emhin nan rebhe nan, nọn ha rẹkpa ele rẹ manman ha sikẹ Jehova bi Ọmọn nọnsọle.

11. Be agbotu nọnsi Jehova sẹ rẹ re ẹkẹ-ẹjẹjẹ man yẹ beji Jesu rẹ re ọle man? (Iwẹnna 2:​5-7, 33) (Yẹ fẹ ene ifoto ghe.)

¹¹ Agbotu nọnsi Jehova wo dọnmhegbe rẹ rẹkpa ẹbho ne hi ki rẹ khin rẹ sikẹ Jehova. Yere ghe, beji Jesu riọkpanọ fo, ọle da re ẹlinmhin nọn khiale ọsi Osẹnobulua nin ẹbho ne sikoko bhi ẹghe iluemhin ọsi anagbera, beji ele ha da sabọ họn ọta ẹmhọanta bhi “urolo nesele.” (Tie Iwẹnna 2:​5-7, 33.) Ranmhude Jesu hi ọnọn dia agbotu nọnsi Osẹnobulua ẹlẹnan, agbotu nọnsi Osẹnobulua sẹ wo dọnmhegbe rẹ zedu ebe nesẹmhan diọbhi urolo ne bun gbera 1,000. Ẹbho ne zẹ eso bhi ene urolo nan i manman bun. Bhi ọsi ijiẹmhin, urolo eso ribhọ nan miẹn ghe, ẹbho ne i manman bun ne nyẹnlẹn bhi obọ ọsi nọt bi saot bhi America, ele zẹ ene urolo nan. Ọrẹyiriọ, a zedu ebe nesẹmhan eso diọbhi ene urolo nan ne bun gbera 160, beji a ha da miẹn ghe ẹbho ne zẹ ene urolo ki miẹn ọne isẹhoa rẹ họn ọne ọta nọn mhẹn. A yẹ zedu ebe nesẹmhan diọbhi urolo ọsi Romany ne bun gbera 20. Ẹbho ne bunbun ne zẹ ene urolo nan wo dọ ha miẹn ẹmhọanta ọbhi egbe.

12. Emhin ọbhebhe nela agbotu nọnsi Jehova sẹ lu rẹ rẹkpa ẹbho?

¹² Rẹ deba nan rẹ rẹkpa ẹbho rẹ dọ luẹ ẹmhọanta, agbotu nọnsi Jehova sẹ wo rẹkpa ẹbho ne loya ranmhude emhin idunmhure ne sẹ wo sunu ji ele. Ẹbho ne bunbun sẹ wo zegbere beji ele ha da sabọ rẹkpa ibhio ele nin ele ko ga. Agbotu nọnsi Jehova sẹ wo bọn uwa oga ne bunbun, beji ẹbho ha da miẹn eji ele da sikoko luẹ ẹmhọn ahoẹmhọn-egbe nin Osẹnobulua mhọn da ele.

OJOHẸN NỌNSẸMHAN DẸ SABỌ RẸKPA UWẸ

13. Uwedẹ eso nela Jesu rẹ rẹkpa mhan?

¹³ Beji a miẹn Jesu hi ọsun-ohuan nọn mhẹn nọnsẹmhan, ọle wo dọnmhegbe rẹ ne emhin rebhe nin mhan guanọ nin mhan, ne ha rẹkpa mhan rẹ ha sikẹ Jehova. (Jọni 10:14; Ẹfẹ. 4:7) Ẹgheso, ọkakale nin mhan miẹn bhi iẹnlẹn dẹ sabọ rẹ mhan diabe ikpilunmhun nọn khuẹn ghẹghẹ, la ukpa nọn khian wẹ a. Egbe sabọ rẹ wo lọ mhan ẹgheso ranmhude emianmhẹn nọn kaka nin mhan khọnmhọn, la ranmhude idobọ nesẹmhan, la ranmhude imhan bi obhio mhan nin mhan ko ga i ribhi ọfure. Ọnan dẹ sabọ re mhan denọ ẹlo ọbhi ọkakale nin mhan kuẹlo da nian rẹ sẹbhọ ghe, mhan i da yẹ ha ria ẹmhọn ikhuaẹloghe nin mhan mhọn rẹji ẹghe odalo. Yere ghe, Jesu wo lẹn ọkakale rebhe nin uwẹ kuẹlo da nian, bi ebi egbe dia uwẹ yẹ. Ranmhude itohan nin ọle mhọn da uwẹ, ọle wo muegbe nin ọle rẹ rẹkpa uwẹ. Bhi ọsi ijiẹmhin, ọle dẹ sabọ noo ahu ẹlinmhin nọn khiale rẹ rẹkpa uwẹ sade egbe lọ uwẹ. (Jọni 16:7; Tai. 3:6) Rẹ deba ọnin, Jesu dẹ sabọ noo ene ewanlẹn, bi ibhio uwẹ nin bha ko ga rẹ re ikoudure nin uwẹ, yẹ rẹkpa uwẹ.—Ẹfẹ. 4:8.

14. Be mhan ha sabọ lu sade egbe lọ mhan?

¹⁴ Ahamiẹn egbe iẹnlẹn lọ uwẹ, yere ghe Jesu hi Ojohẹn nọnsẹmhan, uwẹ ha yẹ ria eria nyan ebi ọnin mundia nan rẹji uwẹ. Yere ghe, ọ i yi nin Jesu dọ re iẹnlẹn nọnsọle rẹ zọese ọkpa zẹle nin Jehova da je ọle re bhi ọne otọ nan, sokpan, nin ọle rẹ manman dọ lẹn ọkakale kẹkẹ nin eria nọn bha gba nan kuẹlo da yẹ deba ebezẹle nin ọle da vae. Ahamiẹn egbe lọ mhan ranmhude idobọ nesẹmhan, la ranmhude eji mhan da wẹghẹ, Jesu wo muegbe nin ọle rẹ re urẹkpa nin mhan guanọ nin mhan “bhi ẹghe nọn khẹke.”—Hib. 4:​15, 16.

15. Be rẹkpa obhio mhan ọkpa rẹ fikiere agbotu?

¹⁵ Jesu yẹ wo rẹkpa ẹbho nesọle bhi uwedẹ nin ele rẹ dọnmhegbe rẹ guanọ ihuan nesi Jehova ne yulu a, bi nin ele rẹ rẹkpa ene ihuan nan rẹ fikie bu Jehova re. (Mat. 18:​12, 13) Fẹ isẹlobhemhin ọsi obhio mhan ọkpa natiọle Stefano ghe.b Ikpe 12 ki gbera nan re ọle sibhi agbotu re, ọle da zẹ nin ọle rẹ diọbhi ikolo oga. Ọle da yọle: “Ọ bha ha yi emhin nọn lẹkhẹ nin mẹn rẹ lu, ọkpakinọn, ọ da ha ghọn mẹn rẹ fikie dọ deba ibhio mẹn nin ikpea bi ikhuo ha ga Jehova.” Ọle da yẹ yọle: “Ene ewanlẹn ne rẹnẹ ji mẹn da rẹkpa mẹn rẹ de ọkhọle re. Ẹgheso, ọ manman wo ba mẹn bhi egbe nin mẹn rẹ ka zẹ Jehova obọ, sẹyẹ, ọ ki ha ghọn mẹn rẹ zọbọ bhọ rẹ ha dọnmhegbe rẹ fikie bu Jehova. Ene ewanlẹn da rẹkpa mẹn rẹ yere ghe, ọ sẹyẹ wo ti Jehova bi Jesu bhọ sade mẹn yẹ rẹtẹ ha ga Jehova. Ẹghe nan ki rẹ re mẹn fikiere bhi agbotu, ibhio mẹn da wo miẹn mẹn bi azagba-uwa nọnsẹmhẹn ọbhi egbe. Akizẹbue, okhuo mẹn da munhẹn ha luẹ Baibo. Ẹlẹnan nian, imhan rebhe bhi azagba-uwa nọnsẹmhẹn ko ga Jehova kugbe.” Ọ dẹ wo manman ha ti Ojohẹn nọnsẹmhan bhọ sade ọle daghe ọle ghe, eria ne rẹ ka ha lu emhin ebe miẹn urẹkpa nọn khẹke, nọn ha rẹkpa ele rẹ fikie vae bhi agbotu!

16. Bezẹle nọn da manman ti uwẹ bhọ rẹ ha mhọn Ojohẹn nọn mhọn itohan?

¹⁶ Bhi ẹghe nin Jesu rẹ ha nyẹnlẹn bhi ọne otọ nan, ọle wo ha re urẹkpa nin ẹbho ne bunbun bhi ẹghe nọn khẹke. Ẹlẹnan nian, mhan dẹ sabọ ha mhọnlẹn bhi ọkhọle ghe, Jesu dẹ re urẹkpa nin mhan guanọ nin mhan tee. Bhi agbọn ọsọgbọn nọn vade bhi ẹghe nọn bha yẹ ree gbe nian, ọle dẹ miẹn ọrebhe ne hẹnmhọn nin Osẹnobulua fan bhi obọ olukhọ. Mhan wo khuẹnmhẹn Osẹnobulua nin Jehova, nọn ranmhude oyẹẹ bi itohan nin ọle mhọn da mhan re Ọmọn nọnsọle nin mhan, nọn ha yi Ojohẹn nọnsẹmhan nọn mhọn itohan!