Obhio Mhan Nan La Re Ba Otu Nọn Sun Oga

ỌSEWEWIẸ bhi ẹdẹ iWednesday January 24, 2018, a da taman ibhio mhan bhi Bẹtẹ nọn ribhi United States bi ọnọn ribhi Canada ghe, a re obhio mhan natiọle Kenneth Cook, Jr., ba Otu Nọn Sun Oga ọsi Esali Jehova.

Agbaẹbho natiọle Pennsylvania bhi U.S.A, ọle a da biẹ iKenneth Cook. Enin ọle da yẹ wanre. Ọ ki kẹ khere nin ọle rẹ yo isiku fo, ọle da luẹ ẹmhọn Osẹnobulua bhi obọ obhio mhan nin ele ko ha yo isiku. Ọle da mianmẹn bhi June 7, 1980. Bhi September 1, 1982, ọle da munhẹn ha lu iwẹnna ọkanẹfan. Ọle ki lu iwẹnna ọkanẹfan na bhi ikpe eva, a da tie ọle vae bhi Bẹtẹ nọn ribhi Wallkill, New York. October 12, 1984 ọle munhẹn ha ga bhi Bẹtẹ.

Bhi ẹkẹ ikpe 25 nin ọle sẹ gbe bhi Bẹtẹ nian, ije kẹkẹ ọle sẹ da wẹnna. Bhi ọsi ijiẹmhin, ọle sẹ wẹnna bhi eji a da printi ebe bi ọfisi natiọle iBẹtẹ Ọfisi. Bhi ukpe 1996, ọle da re okhuo. Jamie a tie okhuo ọle. Okhuo ọle da deba ọle ha ga bhi Bẹtẹ nọn ribhi Wallkill. Bhi December 2009, a da re obhio mhan nin Cook bi okhuo ọle ha khian Watchtower Educational Center bhi Patterson, New York. Bhi enin, ọle da dẹba ene mhọn obọ bhi ebe nan gbẹn ha wẹnna. Bhi April 2016, ele da fikie ha khian iBẹtẹ nọn ribhi Wallkill. Ọ bha sẹ bue gbe nin ele fikie ha khian enin, a da re ele ha khian Bẹtẹ nọn kokhun nẹ nọn ribhi Brooklyn, New York. Ọ ki ribhi uki isẹn nin ele diọbhi Brooklyn, a da mun iBẹtẹ nọn kokhun nẹ sibhi Brooklyn re ha khian Warwick, New York. Bhi January 2017, a da re obhio mhan nin Cook mundia nin ọle ha rẹkpa Usun ọsi Otu Nọn Sun Oga, ne mhọn obọ bhi ebe nan gbẹn.