Luẹ Ọnan

Manman Ha Gua Otọ Ẹmhọn Ikpẹ Nesi Jehova

Ahamiẹn mhan tie Baibo, mhan sabọ rẹ noo ebe nesẹmhan rẹ manman gua otọ ebi mhan tie fẹghe, beji mhan ha da sabọ manman lẹn otọ ọle nọnsẹn. Ọrẹyiriọ, ọ iyi nin mhan rẹ gheghe lẹn emhin ne bunbun zẹle nin mhan da lu ọnan. Mhan lu ọle beji oyẹẹ nin mhan mhọn da Jehova ha da manman ha tuẹn okhun. Nin mhan rẹ sabọ lu ọnan, ọkhẹke nin mhan nọọn egbe mhan ọne inọnta nan: ‘Be eji mẹn tie nan man mẹn le rẹji Jehova?’

Mhan sabọ yẹ rẹ dọ gua otọ ebi Jehova rẹ re oyẹẹ, ẹwanlẹn, bi ahu man yẹ, yẹ bhuohiẹn bhi uwedẹ nọn gbale. Ọkpakinọn, ọ iyi ene ikpẹ nan ọkpa Jehova mhọnlẹn, ọle yẹ mhọn ikpẹ ebhebhe. Ijela uwẹ ha da manman luẹ ẹmhọn ene ikpẹ nekẹle?

Uwẹ sabọ rẹ dọ fẹ ikpẹ ebhebhe nesi Jehova ne bun gbera 50 ghe bhi Watch Tower Publications Index, bhi odotọ uhọnmhọn-ọta nọn yọle “Jehovah,” bi bhi uhọnmhọn-ọta nọn ribhi otọle nọn yọle, “Qualities by Name.” Gua otọ ikpẹ nan tẹmhọnlẹn bhi Baibo nin uwẹ tie. (Ahamiẹn Research Guide for Jehovah’s Witnesses ọkpa uwẹ mhọn, fẹ ọne uhọnmhọn-ọta ghe nọn yọle, “Jehovah God” bi uhọnmhọn-ọta nọn ribhi odotọle nọn yọle, “Jehovah’s Qualities.”)