Uwẹ Dẹ Sabọ Ha Mhọn Ọfure Aharẹmiẹn Uwẹ Kuẹlo Da Ọnọghọ Ne Kaka

1. Be bhọ “ọfure nọn na bhi obọ Osẹnobulua vae?” Elele nela mhan miẹn sade mhan mhọn ọlẹn? (Philippians 4:6, 7)

UNAN ọfure ribhọ nin ẹbho bhi ọne agbọn nan bha lẹn. “Ọfure nọn na bhi obọ Osẹnobulua vae nọn,” nọn yi ọkhọle nọn lọre nin mhan mhọn sade mhan deba Aba mhan nọn ribhi okhun ha mhọn ikolu. Ahamiẹn mhan mhọn ọfure nọn na obọ Osẹnobulua vae, egbe ki wo fu mhan re. (Tie Philippians 4:6, 7.) Mhan ki deba ẹbho ne hoẹmhọn ọlẹn ha mhọn ikolu nọn ziẹnlẹn. Sẹyẹ, mhan ki deba Osẹ ọsi ọfure ha mhọn ikolu nọn ziẹnlẹn. (1 Thess. 5:23) Ahamiẹn mhan lẹn Osẹnobulua nin Aba mhan, mun udu nyan ọlẹn, yẹ hẹnmhọn nanlẹn, ọfure nọn na obọ ọle vae dẹ sabọ rẹkpa mhan rẹ ha mhọn ọkhọle nọn lọre ahamiẹn mhan kuẹlo da ọnọghọ.

2. Bezẹle nin mhan ha da sabọ rẹọbhọ ghe mhan dẹ sabọ ha mhọn ọfure nọn na obọ Osẹnobulua vae?

² Mhan dẹ be gene sabọ ha mhọn ọfure nọn na bhi obọ Osẹnobulua vae sade mhan kuẹlo da ọkakale bọsi, ahamiẹn emianmhẹn zegbere, emhin idunmhuri, okhọnlẹn la ekpokpo? Ọnọn hi ki rẹ khin bhi ene ọkakale nan dẹ sabọ re imhan ha mun ofẹn. Sokpan, Jesu da taman ene rẹkhan ọlẹn yọle: “Bha hẹi ji udu ha kpokpo bha, bha hẹi ji ọle ha mun ofẹn.” (John 14:27) Ọ wo ti mhan bhọ ghe ibhio mhan wo ha re obọ rẹkhan ọne ibhude nan nọnsi Jesu. Jehova rẹkpa ele rẹ sabọ ha mhọn ọfure arẹmiẹn ele kuẹlo da ọkakale kẹkẹ.

EBI MHAN HA RẸ HA MHỌN ỌFURE YẸ SADE EMIANMHẸN ZEGBERE

3. Be emianmhẹn ọbe nọn zegbere ha rẹ re imhan miẹn yẹ ghe mhan bha yẹ ha mhọn ọfure?

³ Emianmhẹn ọbe ha zegbere bhi agbọn, ọ ki wo manman fi emhin kẹkẹ denọ bhi iẹnlẹn nọnsẹmhan. Bhi ọsi ijiẹmhin, emianmhẹn KOVID-19 wo rẹso ẹbho ne bunbun. Ẹghe nan rẹ nọọn ẹbho eso ebi ọ rẹ rẹso ele yẹ, ene bun nẹ bhi ẹwẹ ele da yọle ghe, ọ da ha nọghọ ele rẹ ha wẹ ọsasọn ẹghe nin ọne emianmhẹn rẹ dagbare. Bhi ẹghe ọne emianmhẹn KOVID-19, ẹbho da wo manman ha kpokpo egbe, egbe iẹnlẹn da lọ ẹbho, ẹbho da ha danyọn-gbe-egbe, yẹ noo ikpẹ-ikhunmhun ne imhẹn. Okhọnlẹn da ha de bhi azagba-uwa. Sẹyẹ, ẹbho bhọ da ha guanọ nin ele gbe egbe ele a. Ahamiẹn emianmhẹn zegbere bhi eji uwẹ da nyẹnlẹn, be uwẹ ha lu yẹ beji a ha da miẹn uwẹ bha yẹ manman ha kpokpo egbe, yẹ ha mhọn ọfure nọn na obọ Osẹnobulua vae?

4. Be ọ rẹ re ọfure nin mhan yẹ nin mhan rẹ lẹn ọta akhasẹ nin Jesu tale rẹji ẹghe ọkike ọsi ọne agbọn nan?

⁴ Jesu ka yọle ghe, bhi ẹghe ọkike ọsi ọne agbọn nan, emianmhẹn kikẹ “ki ha sunu bhi ije kẹkẹ.” (Luke 21:11) Nin mhan rẹ lẹn ọnan, be ọ rẹ re ọfure nin mhan yẹ? Emianmhẹn kẹkẹ ne zegbere bha han mhan ilo. Mhan lẹnmhin ghe ene emhin nan sunu beji Jesu yọle ele dẹ rẹ ha sunu. Bhiriọ, ọkhẹke nin mhan re obọ rẹkhan adia nin Jesu re nin ẹbho ne nyẹnlẹn bhi ẹghe ọkike ọsi ọne agbọn nan. Ọle da yọle: “Bha hẹi ji ọnan re ofẹn ha mun bha.”—Matt. 24:6.

5. (a) Beji Philippians 4:8, 9 rẹman, be ọkhẹke nin mhan nan bhi erọnmhọn sade emianmhẹn zegbere? (b) Be imhan ha rẹ miẹn elele yẹ sade mhan kaehọ Baibo nan rẹkọdi?

⁵ Ahamiẹn emianmhẹn zegbere, ọ dẹ sabọ re imhan ha kpokpo egbe, yẹ ha mun ofẹn. Ọnan hi emhin nọn sunu ji obhio mhan nin okhuo natiọle Desi.b Obhio aba ọle nin okpea, ọmọn okpea ọsi obhio aba ọle, bi idọkitọ ki yu fo ranmhude emianmhẹn KOVID-19, ọle da ha mun ofẹn ghe ọle dẹ yẹ mun ọne emianmhẹn, yẹ mun nin inẹn ọlẹn nọn ki dọmanlẹn. Ranmhude one emianmhẹn KOVID-19, ọle da ha kpokpo egbe ghe ọle ida yẹ ha mhọn iwẹnna. Bhiriọ, ọle da ha riale ebi ọle ha rẹ sabọ ha dẹ ebale, yẹ haosa uwa yẹ. Ọle da wo ha kpokpo egbe ba ene emhin nan rẹ sẹbhọ ghe, ọle iyẹ sabọ wẹ ọsasọn. Ọkpakinọn, egbe da kie fu Desi re. Be ọnan rẹ sunu yẹ? Ọle da bhii ji Jehova nin ọle rẹkpa ọle rẹ de ọkhọle re, yẹ ha ria eria ne mhẹn. (Tie Philippians 4:8, 9.) Ọle da wo ha ka Jehova ehọ, beji ọle rẹ ha khue irẹkọdi ọsi Baibo. Ọle da yọle: “Uwedẹ nin ene ibhio mhan rẹ re uru nọn dere ha tie ọle, da rẹ mẹn de ọkhọle re, yẹ ye mẹn re ghe ẹmhọn mẹn rẹtẹ Jehova.”—Ps. 94:19.

6. Be Baibo nin uwẹ tobuwẹ luẹ, bi ikolo oga nan yo ha rẹ rẹkpa uwẹ yẹ?

⁶ Ahamiẹn emianmhẹn zegbere, ọ dẹ sabọ re ọle ha nọghọ mhan rẹ ha lu emhin rebhe nin mhan ka lu khẹ. Sokpan, mhan hẹi ji ọnan rẹso Baibo nin mhan tobọmhan luẹ, la ikolo oga nin mhan yo. Okha ọsi ibhio mhan ne ribhi ebe nesẹmhan bi ividio nesẹmhan kẹkẹ dẹ rẹkpa uwẹ rẹ lẹn sẹbhọ ghe, ibhio mhan sẹyẹ wo ha ga Jehova arẹmiẹn ele kuẹlo da ọnọghọ ne sẹ iriọ. (1 Pet. 5:9) Ikolo oga dẹ rẹkpa mhan rẹ ha ria emhin ne ha re izebhudu nin mhan bhi ẹkẹ Baibo. Ọ dẹ yẹ re ọne isẹhoa nin mhan rẹ ha re ikoudure nin ẹbho, bi nin ẹbho yẹ rẹ re ikoudure nin mhan. (Rom. 1:11, 12) Ahamiẹn uwẹ ria eria nyan ebi Jehova rẹ rẹkpa ẹbho ne ga ọle sade ele khọnmhọn, ofẹn mun ele, la ele riale ghe ele ọkpa khian, urẹọbhọ nọnsẹ ki ha ziẹn ọbhọ. Sẹyẹ, uwẹ ki rẹọbhọ ghe ọle dẹ yẹ rẹkpa uwẹ.

7. Be uwẹ ha sabọ miẹn luẹ bhi obọ Jọni nin odibo?

⁷ Dọnmhegbe rẹ ha ne ibhio ẹ nin bha ko ga talọ. Ahamiẹn emianmhẹn zegbere, a sabọ rẹ yọle nin mhan hẹi yẹ manman ha sikẹ ẹbho, a ha bhọ rẹ miẹn imhan bi ibhio mhan nin mhan ko ga nọn. Bhi ẹghe nọn sẹ inian, emhin sabọ rẹ dia uwẹ bhi egbe beji ọ dia Jọni nin odibo bhi egbe. Ọle da rẹ ha guanọ nin ọle miẹn ọmọẹ ọle nin Geyọs bhi ẹlo. (3 John 13, 14) Ọrẹyiriọ, Jọni da lẹn sẹbhọ ghe ọle ida sabọ miẹn Geyọs rẹ na ẹgheso. Bhiriọ, Jọni da lu ebi ọle ha sabọ lu. Ọle da gbẹn ileta ji Geyọs. Ahamiẹn ọ ilẹkhẹ nin uwẹ ẹghe rebhe rẹ rẹnẹ ji ibhio ẹ nin bha ko ga, dọnmhegbe rẹ re ifoni tie ele, la re ifoni gbẹn ebe ji ele. Ahamiẹn uwẹ ne ibhio mhan nin bha ko ga talọ ẹghe rebhe, ọ ida yẹ manman dia uwẹ bhi egbe ghe uwẹ ọkpa khian. Uwẹ ki yẹ manman ha mhọn ọkhọle nọn lọre. Ne ene ewanlẹn talọ ahamiẹn emhin ribhọ nọn re uwẹ ha kpokpo egbe, yẹ miẹn ọta ikoudure nin ele ha ha taman uwẹ ọbhi egbe.—Isa. 32:1, 2.

EBI MHAN HA RẸ SABỌ HA MHỌN ỌFURE YẸ AHAMIẸN EMHIN IDUNMHURI SUNU

8. Be emhin idunmhuri ha rẹ sabọ re uwẹ miẹn yẹ ghe uwẹ bha yẹ ha mhọn ọfure?

⁸ Ahamiẹn ologho amẹn, otọ nọn mun vẹa, la eranlẹn sẹ ka riia uwẹ emhin an khẹ, asabọmiẹn uwẹ dẹ wo manman ha kpokpo egbe bhi ẹghe nọn tanlẹn ahamiẹn ọne ọkakale fo. Ahamiẹn eria nesẹ yu, la emhin nesẹ dunmhun an, uwẹ sabọ rẹ ha lu akhiẹ, ha khọẹkẹ, la egbe iẹnlẹn bhọ sabọ rẹ lọ uwẹ. Ọnan bha rẹman ghe afe uwẹ mun kalo, la uwẹ iyẹ mhọn urẹọbhọ. Ọnọghọ nọn bha lẹkhẹ hiehie uwẹ kuẹlo da. Sẹyẹ, ẹbho eso sabọ rẹ ha guanọ nin uwẹ re uwedẹ nọn bha gba rẹ lu emhin. (Job 1:11) Ọkpakinọn, ọkakale nọn hi ki rẹ khin nin uwẹ kuẹlo da, uwẹ dẹ yẹ sabọ ha mhọn ọfure. Be ha rẹkpa uwẹ?

9. Be Jesu tale nọn ha rẹkpa mhan muegbe khẹ emhin idunmhuri?

⁹ Ye ọta akhasẹ nin Jesu ta re. Ẹbho eso riale ghe emhin idunmhuri ida sunu ji ele. Sokpan, mhan lẹnmhin ghe emhin idunmhuri kẹkẹ dẹ wo ha sunu bhi ẹghe nọnsẹmhan. Sẹyẹ, eso bhi ene emhin idunmhuri nan sabọ rẹ sunu ji mhan. Jesu da taman ene rẹkhan ọlẹn ghe, “otọ-umunvẹa ne khua,” bi emhin idunmhuri nekẹle dẹ sunu ọkuẹsẹ ọkpẹnlẹn vae. (Luke 21:11) Ọle da yẹ tale ghe, ‘igbuhia dẹ ha tuẹn okhun.’ Ọnan wo sunu ẹlẹnan. Bhi ọsi ijiẹmhin, mhan wo daghe aikhailu nin ẹbho lu, ugbele bi okhọnlẹn, bi ẹbho ne fuẹn ẹbho a, yẹ riia emhin an. (Matt. 24:12) Jesu bha yọle ghe ẹbho nin Jehova fikeke gbe ọkpa ene emhin nan ha sunu je. Bhi ọsi ẹmhọanta, emhin idunmhuri wo sunu ji ene bunbun bhi eguọmhandia nesi Jehova. (Isa. 57:1; 2 Cor. 11:25) Asabọmiẹn Jehova ida wo re uwedẹ ọhan-ilo rẹ gbega mhan nin emhin idunmhuri rebhe hẹi sunu ji mhan. Sokpan, ọle dẹ re emhin nọn hi ki rẹ khin nọn ha sabọ rẹkpa mhan de ọkhọle re nin mhan.

10. Ahamiẹn mhan muegbe khẹ emhin idunmhuri ne ha sabọ sunu, be ọ ha rẹ rẹman yẹ ghe mhan mhọn urẹọbhọ? (Proverbs 22:3)

¹⁰ Ọ dẹ lẹkhẹ nin mhan rẹ de ọkhọle re sade emhin iguaguako sunu ahamiẹn mhan ka muegbe khẹ ọle khẹ. Sokpan, ahamiẹn mhan muegbe ọbhi otọ be rẹman ghe mhan iyẹ mhọn urẹọbhọ rẹ da Jehova? Hiehie. Bhi ọsi ẹmhọanta, ahamiẹn mhan muegbe ọbhi otọ khẹ emhin idunmhuri rẹman ghe, mhan rẹọbhọ ọle dẹ sabọ gbẹloghe mhan. Be ọ rẹ yi iriọ yẹ? Ọta nọnsi Osẹnobulua ji mhan lẹn ghe, ọkhẹke nin mhan muegbe khẹ emhin idunmhuri ne ha sabọ sunu. (Tie Proverbs 22:3.) Sẹyẹ, agbotu nọnsi Osẹnobulua wo ha noo ebe nesẹmhan, ikolo oga kẹkẹ, bi ẹmhọn eso ne khẹke nin mhan lẹn rẹ ha mun mhan egbe khẹ emhin idunmhuri ne ha sabọ sunu.c Mhan be mun udu nyan Jehova? Ahamiẹn mhan mun udu nyan ọlẹn, mhan ki ha re obọ rẹkhan adia nin ọle re nin mhan nian ọkuẹsẹ emhin idunmhuri sunu.

11. Be uwẹ miẹn luẹ bhi obọ Margaret?

¹¹ Bha ji mhan fẹ ebe sunu ji obhio mhan nin okhuo natiole Margaret ghe. Ekhẹn govamẹnt da yọle nin ọle kpanọ bhi uwa nọnsọle ranmhude nin eranlẹn rẹ ha tuẹ emhin an bhi eji ọle da nyẹnlẹn. Ranmhude nin ẹbho ne bunbun rẹ ha ho nin ele re osukpa nẹgbe, imoto ne bunbun da ha ribhi uwedẹ. Bhiriọ, ọsoso bhi ẹwẹ ele bha yẹ sabọ khian. Ighogho ne bhihi da wo vuọn okhun. Sẹyẹ, Margaret bha sabọ kpanọ bhi ẹkẹ imoto nọnsọle. Ọrẹyiriọ, ọle da miuhọnmhọn ranmhude nin ọle rẹ ka muegbe ọbhi otọ. Ọle da re imapu ọbhi ẹkpa nọnsọle nin ọle ha sabọ noo rẹ guanọ uwedẹ ọbhebhe nin ọle ha da nẹgbe. Ọle bhọ da ka hẹn imoto na ọne uwedẹ ọkuẹsẹ ọne ẹghe nan, beji ọle ha da sabọ noo ọle rẹ nẹgbe sade emhin idunmhuri sunu. Ranmhude uwedẹ nin Margaret rẹ ka muegbe ọbhi otọ, ọle da miuhọnmhọn.

12. Bezẹle nin mhan da re obọ rẹkhan adia nan re nin mhan ne ha sabọ gbega iẹnlẹn nọnsẹmhan?

¹² Nin mhan bi ẹbho nekẹle da sabọ ha mhọn ugbega, ene gbẹloghe sabọ rẹ taman mhan ẹghe nin mhan ha rẹ ha dagbare, nin mhan kpanọ bhi eji mhan ye, la nin mhan re obọ rẹkhan adia ọbhebhe. Ẹbho eso iguanọ nin ele re obọ rẹkhan ọne adia nan ranmhude ele bha guanọ nin ele zẹ emhin nin ele mhọn obọ. Ẹlo nela Kristiẹn rẹ ghe ene adia nan? Baibo taman mhan yọle: “Ranmhude Ebeanlẹn mhan, bha ha deuhọnmhọnre nin ọrebhe nin eria ne ọbhi ihe, aharẹmiẹn ojie nọn ranmhude ọle ke okhun nẹ uwẹ la ene gọvanọ nọn, ranmhude a je ele.” (1 Pet. 2:13, 14) Agbotu nọnsi Osẹnobulua yẹ re adia nin mhan ne ha sabọ gbega mhan. Ẹghe rebhe a rẹ ye mhan re nin mhan re eji mhan dia, bi nọmba ọsi ifoni nọnsẹmhan nin ene ewanlẹn, beji ele ha da sabọ miẹn mhan sade emhin iguaguako sunu. Uwẹ be sẹ lu iriọ? A sabọ yẹ rẹ taman mhan eji mhan ha dia, nin mhan kpanọ bhi eji mhan ye, sẹyẹ, ebi mhan ha rẹ miẹn ebi mhan ha rẹ ha gbẹloghe egbe, la ebi mhan ha rẹ rẹkpa ẹbho nekẹle, bi ẹghe nin mhan ha rẹ lu ọle. Ahamiẹn mhan bha ka re obọ rẹkhan ene adia nan, mhan sabọ rẹ mun iẹnlẹn nọnsẹmhan, bi iẹnlẹn ọsi ene ewanlẹn bhi agbotu ọbhi okhẹnan. Yere ghe, ene ewanlẹn bhi agbotu gbẹloghe mhan. (Heb. 13:17) Margaret da yọle: “Mẹn wo rẹọbhọ ghe ranmhude nin mẹn rẹ re obọ rẹkhan adia ọsi ene ewanlẹn, bi ọsi agbotu miẹn iẹnlẹn nọnsẹmhẹn fan.”

13. Be rẹkpa ibhio mhan ne bunbun ne sibhi uwa nọnsele re ha mhọn eghọnghọn bi ọfure?

¹³ Ibhio mhan ne bunbun ne sibhi uwa nọnsele re ranmhude emhin idunmhuri la okhọnlẹn, wo dọnmhegbe rẹ sabọ guẹ idia nin ele ki ye, yẹ wo manman ha lu eka nin ele ha sabọ lu bhi oga nọnsi Jehova. Beji Kristiẹn bhi ẹghe ẹdẹlẹ lu ne van obọ diọbhi ije kẹkẹ ranmhude ekpokpo, ele sẹyẹ wo ha tẹmhọn Osẹnobulua man ẹbho. (Acts 8:4) Iwẹnna itẹmhọn Osẹnobulua rẹkpa ele rẹ ha mun ọkhọle ọbhi Agbejele nọnsi Osẹnobulua, ọ iyi ekpokpo nin ele kuẹlo da. Ranmhude ọnan, ele sabọ ha ghọnghọn, yẹ mhọn ọfure.

MHAN DẸ SABỌ HA MHỌN ỌFURE AHARẸMIẸN A KPOKPO MHAN

14. Be ekpokpo ha rẹ re imhan miẹn ghe mhan bha yẹ ha mhọn ọfure yẹ?

¹⁴ Ahamiẹn mhan kuẹlo da ekpokpo, mhan ida yẹ sabọ ha mhọn emhin ne bunbun ne ha rẹkpa mhan ha mhọn ọfure. Ọ re imhan ghọnghọn sade mhan dọ ha tẹmhọn Osẹnobulua, sade mhan sikoko, bi sade mhan lu emhin kẹkẹ nin mhan lu ukpẹdẹ-ukpẹdẹ ahamiẹn mhan bha ha mun ofẹn ghe a dẹ mun mhan. Ọkpakinọn, ahamiẹn mhan bha yẹ sabọ lu ene emhin nan, mhan sabọ rẹ ha kpokpo egbe, yẹ ha mun ofẹn ebe ha kie sunu. Ọ iyi emhin ọbe nin emhin rẹ re inian dia mhan bhi egbe. Sokpan, ọkhẹke nin mhan mhọn ẹwan. Jesu yọle ghe, ekpokpo dẹ sabọ re ene rẹkhan ọlẹn fikeke gbe ọle. (John 16:1, 2) Bhiriọ, be imhan ha rẹ sabọ ha mhọn ọfure yẹ aharẹmiẹn a kpokpo mhan?

15. Bezẹle nọn bha da khẹke nin mhan ha mun ofẹn ekpokpo? (John 15:20; 16:33)

¹⁵ Baibo taman mhan yọle: “Ọrebhe ne guanọ nin ele re iẹnlẹn nọnsele rẹ ha ga Osẹnobulua beji Jesu Kristi lu, dẹ yẹ miẹn ekpokpo.” (2 Tim. 3:12) Ọ da ha nọghọ obhio mhan natiọle Andrei rẹ rẹọbhọ ọnan ẹghe nan rẹ mun idobolo ọbhi iwẹnna oga nọnsẹmhan bhi agbaẹbho nọnsọle fo. Ọle da riale: ‘Esali Jehova ne bunbun wo ribhi enan. Ene ribhi ugbẹloghe dẹ be sabọ muno mhan rebhe khue?’ Andrei bha yẹ ha mhọn ọfure. Ọne iria-eria nan da wo re ọle ha kpokpo egbe. Ibhio mhan nekẹle da mun udu nyan Jehova. Sẹyẹ, ele bha ha riale a ida mun ele. Ele lẹnmhin ghe, a sabọ rẹ mun ele khue. Sokpan, ele bha ha kpokpo egbe beji Andrei rẹ ha kpokpo egbe. Bhiriọ, Andrei da zẹ nin ọle rẹ re egbe khọkhọ ene ibhio mhan, yẹ mun udu nyan Osẹnobulua. Ọ bha sẹ bue gbe, ọle da ha mhọn ọkhọle nọn fure, yẹ ha ghọnghọn nian arẹmiẹn ọle yẹ kuẹlo da ọnọghọ ne bunbun. Ọnan dẹ yẹ sabọ sunu ji mhan. Arẹmiẹn Jesu yọle ghe a dẹ kpokpo mhan, ọle da yẹ sẹyẹ ji mhan lẹn ghe, mhan dẹ sabọ sun rẹkhan Osẹnobulua aharẹmiẹn mhan kuẹlo da ekpokpo.—Tie John 15:20; 16:33.

16. Adia nela ọkhẹke nin mhan re obọ rẹkhan ahamiẹn a kpokpo mhan?

¹⁶ Ahamiẹn a mun idobolo ọbhi iwẹnna oga nọnsẹmhan, Bẹtẹ bi ene ewanlẹn sabọ rẹ re adia nin mhan. Ele lu ọnan nin ele rẹ gbega mhan beji mhan ha da sabọ ha miẹn ebale oriọn, bi nin ele rẹ rẹkpa mhan ha tẹmhọn Osẹnobulua beji mhan ha sabọ lu sẹ. Dọnmhegbe nin uwẹ rẹ re obọ rẹkhan adia nan re nin uwẹ aharẹmiẹn uwẹ bha manman lẹn otọ ebezẹle nan da re ọne adia re. (Jas. 3:17) Sẹyẹ, hẹi ha ta emhin ne rẹtẹ ibhio mhan la agbotu man ẹbho ne bha khẹke nin ele lẹn.—Eccl. 3:7.

17. Beji ene etuegbe bhi ore nin ọhẹnhẹn lu, be ọkhẹke nin mhan muegbe rẹ lu?

¹⁷ Emhin ọkpa nọn manman zẹ nin Esu da ha kpokpo ẹbho nesi Osẹnobulua hi, ranmhude ele “mhọn ọne ẹsọn nan rẹ sọsali rẹji Jesu.” (Rev. 12:17) Hẹi ji Esu bi ọne agbọn nọnsọle nan re ofẹn ha mun uwẹ. Ahamiẹn mhan tẹmhọn Osẹnobulua yẹ man ẹbho emhin, ọ re imhan ghọnghọn yẹ mhọn ọfure, aharẹmiẹn a kpokpo mhan. Ẹghe nin ibhokhan iJu ne ha ribhi ihe rẹ taman ene etuegbe nin ele hẹi yẹ tẹmhọn Osẹnobulua bhi ore nin ọhẹnhẹn, ele da yẹ zẹ rẹ hẹnmhọn nin Osẹnobulua. Ele da yẹ wo ha tẹmhọn Osẹnobulua. Sẹyẹ, ọne iwẹnna nan da wo re ele ha ghọnghọn. (Acts 5:27-29, 41, 42) Bhi ọsi ẹmhọanta, a ha yọle nin mhan hẹi yẹ lu ilọnmhọn oga, ọkhẹke nin mhan noo ẹwanlẹn sade mhan tẹmhọn Osẹnobulua. (Matt. 10:16) Ọkpakinọn, ahamiẹn mhan dọnmhegbe lu eka nin mhan ha sabọ lu, mhan ki ha mhọn ọfure nọn nabhọre sade mhan lu ebe ti Jehova bhọ, bi sade mhan tẹmhọn ọlẹn man ẹbho.

“OSẸNOBULUA ỌSI ỌFURE KI NE IBHA DIA”

18. Họla ha sabọ rẹkpa mhan ha mhọn ọfure ọsaje?

¹⁸ Mhan ha mhọn ọlẹn bhi ọkhọle ghe, a ha bhọ rẹ miẹn mhan kuẹlo da ọkakale, mhan dẹ sabọ ha mhọn ọfure. Bhi ẹghe nọn sẹ iriọ, ọkhẹke nin mhan yere ghe ọfure nin mhan guanọ hi, ọfure nọn na obọ Osẹnobulua vae. Ọnin hi, ọfure nin Jehova ọkpa ha sabọ re nin mhan. Mun udu nyan ọlẹn ahamiẹn emianmhẹn zegbere, emhin idunmhuri sunu, la sade uwẹ kuẹlo da ekpokpo. Manman sun rẹkhan agbotu nọnsọle. Ha khuaẹloghe emhin esili kẹkẹ nin uwẹ ha miẹn bhi ẹghe odalo. Uwẹ ha lu iriọ, “Osẹnobulua ọsi ọfure ki ne [uwẹ] dia.” (Phil. 4:9) Bhi uhọnmhọn-ọta nọn ki sẹ ọle bhi egbe, mhan dẹ zilo nyan ebi mhan ha rẹ sabọ rẹkpa ibhio mhan nin mhan ko ga yẹ, ne kuẹlo da ọkakale rẹ sabọ ha mhọn ọfure nọn na obọ Osẹnobulua vae.