Ebi Okhuo bi Ọdọ Ha Rẹ Sabọ Ziẹn Ikolu Nọnsele Yẹ

Ijiẹmhin esili ọsi okhuo bi ọdọ ne họemhọn egbe yẹ ha mun ekpẹn nin egbe, ọle Abraham bi Sarah wo ha khin. (Ge 12:11-13; 1Pe 3:6) Ọrẹyiriọ, emhin rebhe bha gba fo bhi iẹnlẹn ibọdọ bi ireokhuo nọnsele. Ele yẹ wo miẹn edọnmhẹn kẹkẹ bhi egbe. Be hi emhin eso nin okhuo bi ọdọ ha sabọ miẹn luẹ bhi ijiẹmhin ọsi Abraham bi Sarah?

Ọkhẹke nin bha ha ne egbe zilo. Aharẹmiẹn ghe ọkpa bhi ẹwẹ bha re ẹkẹkhọmhin talọ ranmhude ebi emhin dia ọle bhi egbe, ọkhẹke nin ọnọnkẹle re idegbere rẹ wanniẹn ọlẹn bhi uwedẹ esili. (Ge 16:5, 6) Bha mhanmhan ẹghe rẹ ha lu emhin kugbe. Re ọta nin uwẹ ta bi emhin nin uwẹ lu rẹ rẹman okhuo ẹ la ọdọ uwẹ ghe uwẹ họemhọn ọlẹn. Rẹ gbera enan rebhe, ọkhẹke nin bha ji Jehova ha yi ọria nọn ke okhun nẹ bhi iẹnlẹn nọnsẹbha. Bha dẹ sabọ lu ọnan sade bha luẹ iBaibo kugbe, nan erọnmhọn kugbe, yẹ ga kugbe. (Ec 4:12) Iẹnlẹn ibọdọ bi ireokhuo nọn ziẹnlẹn re ogẹn ji Osẹnobulua nin Jehova nọn mun ibọdọ bi ireokhuo gbọ.

GHE ỌNE IVIDIO NATIỌLE EBI A RẸ ZIẸN IKOLU ỌSI OKHUO BI ỌDỌ YẸ. BHA HA KI GHE ỌLE FO, WANNIẸN ENE INỌNTA NAN:

• Be hi emhin eso ne rẹman ghe ikolu ọsi Shaan bi Kiara bha yẹ ziẹn sẹbi ọnikhẹ?

• Bezẹle nọn da khẹke nin okhuo bi ọdọ ha taan ọkhọle a ne egbe talọ?

• Be ijiẹmhin ọsi Abraham bi Sarah rẹ rẹkpa Shaan bi Kiara yẹ?

• Be iShaan bi Kiara lu nin ele rẹ ziẹn ikolu nọnsele?

• Bezẹle nọn bha da khẹke nin okhuo bi ọdọ ha riale ghe emhin rebhe dẹ wo gba fo bhi iẹnlẹn ibọdọ bi ireokhuo nọnsele?