Ebi Uwẹ Ha Rẹ Ha Luẹ IBaibo Nọnsẹn Yẹ Nin Uwẹ Da Manman Ha Miẹn Elele Bhọ

EBEZẸLE NỌN DA YI EMHIN NỌN KHẸKE: Mhan a ha re ẹghe ọbhi otọ rẹ tobọmhan luẹ iBaibo, mhan ki sabọ dọ manman lẹn Ọta nọnsi Osẹnobulua dinmhin. (Eph 3:18) Ọ ki yẹ rẹkpa mhan rẹ ha lu emhin nọnsẹn, arẹmiẹn ghe mhan ribhi ẹkẹ ọne agbọn nan nọn imhẹn. Deba ọnin, ọ ki yẹ rẹkpa mhan rẹ mun oga ẹmhọanta mhọn nọnsẹn. (Php 2:15, 16) Emhanmhan nin mhan rẹ tobọmhan ha luẹ iBaibo mhẹnmhin, ranmhude mhan dẹ sabọ tobọmhan zẹ emhin nọn rẹtẹ mhan nin mhan ha luẹ. Be imhan ha lu nin mhan da manman ha miẹn elele bhi Baibo nin mhan tobọmhan luẹ?

EBI A RẸ LU ỌLE YẸ:

• Ọ ha rẹ ha yi Baibo nan mun mhọn bhi obọ uwẹ noo, la ifoni uwẹ rẹ tie ọle, uwẹ dẹ sabọ re iyaman bhi ulọnlẹn kẹkẹ nin uwẹ da luẹ uhọnmhọn-emhin. Uwẹ sabọ yẹ gbẹn emhin nin uwẹ luẹle sikẹ ọne ulọnlẹn

• Beji uwẹ ha rẹ ha tie iBaibo, ha nọọn egbe ẹ inọnta bii: ‘Họbhọ a tẹmhọn ọlẹn? Be a tẹmhọn ọlẹn? Ẹghela ọne emhin nan rẹ sunu? Ejela ọ da sunu? Bezẹle nọn da re iriọ sunu? Be ọ rẹ sunu yẹ?’

• Guanọ otọ ọne ẹmhọn nọnsẹn. Noo emhin kẹkẹ nin agbotu zẹ ọle egbe dagbare nan rẹ guanọ otọ emhin. Uwẹ sabọ guanọ ebi a gbẹn ọbhi uhọnmhọn-ọta kẹkẹ bi ulọnlẹn kẹkẹ bhi Baibo

• Ria eria nyan emhin nin uwẹ tiele nin uwẹ da sabọ daghe ebi uwẹ ha rẹ re ọle khian yẹ bhi iẹnlẹn nọnsẹ

• Ha re obọ rẹkhan emhin nin uwẹ luẹle bhi iẹnlẹn ukpẹdẹ-ukpẹdẹ.—Lu 6:47, 48

GHE ỌNE IVIDIO NATIỌLE HA LUẸ IBAIBO NỌNSẸN NIN UWẸ DA SABỌ FI OBỌ MUN ẸMHỌANTA NỌNSẸN. BHA HA KI GHE ỌLE FO, WANNIẸN ENE INỌNTA NAN:

• Be ẹbho eso tale rẹji Baibo nin ọria tobọle luẹ?

• Bezẹle nọn da khẹke nin mhan ha nan erọnmhọn mhan kuẹ munhẹn ha luẹ iBaibo?

• Be ha rẹkpa mhan rẹ manman lẹn otọ iBaibo nin mhan tie?

• Be hi iyaman kẹkẹ nin mhan ha sabọ re ọbhi Baibo sade mhan tie ọle?

• Bezẹle nọn da manman khẹke nin mhan ha ria eria nyan emhin nin mhan tie bhi Baibo?

• Be imhan ha re emhin nin mhan luẹle lu?