Be Esali Jehova Rẹ Man Ọria Baibo Yẹ?
Esali Jehova wo noo uwedẹ kẹkẹ nọn ha sabọ rẹkpa uwẹ rẹ lẹn emhin ne ribhi Baibo. Iluẹmhin Baibo nọnsẹmhan dẹ sabọ rẹkpa uwẹ rẹ ha:
Mhọn eghọnghọn bhi iẹnlẹn
Yi ọmọẹ Osẹnobulua
Luẹ ẹmhọn ive ne ribhi Baibo rẹji ẹghe odalo
Bhi ọne apapale nan
Be sunu bhi iluẹmhin Baibo?
Ọria nọn man uwẹ Baibo dẹ rẹkpa uwẹ rẹ ha noo Baibo nọnsẹn. Beji uwẹ ha rẹ ha noo ebe natiọle Sọnyẹnmhẹn bhi Ighegheghe! rẹ luẹ Baibo khere-khere, uwẹ ki sabọ dọ luẹ emhin ne ribhi Baibo, bi ebi ọ ha rẹ sabọ rẹkpa uwẹ yẹ. Nin uwẹ rẹ luẹ ba ọnan, ghe ọne ividio nan.
Mẹn dẹ be haosa ọbhi ọne iluẹmhin?
Eye. Esali Jehova wo re obọ rẹkhan adia nin Jesu re nin edibo nesọle nọn yole: “Ọsọhẹ a rẹ re nin ibha, ọsọhẹ ibha ha yẹ rẹ ha re nin ẹbho.” (Matiu 10:8) Rẹ deba ọnin, ọsọhẹ emhin nin uwẹ ha noo bhi iluẹmhin Baibo khin, rẹ dọ sẹbhi Baibo nan ha mun nin uwẹ, bi ebe natiọle Sọnyẹnmhẹn bhi Ighegheghe! nin uwẹ ha noo bhi ọne iluẹmhin.
Eka ẹghe ọne iluẹmhin ha re?
Iluẹmhin 60, ele ribhi ọne ebe. Uwẹ ha tobuwẹ zẹ ebi uwẹ ha rẹ ha luẹ ọle yẹ nin uwẹ da sabọ kẹ luẹ ọle fo. Sokpan, ọ wo yẹẹ ẹbho ne bunbun ne luẹ Baibo rẹ ha luẹ iIuẹmhin ọkpa la ebe gbera iriọ bhi ẹkẹ uzana.
Be mẹn ha rẹ munhẹn yẹ?
1. Gbẹn vuọn ebe nọn ribhi wẹbsaiti nọnsẹmhan. Mhan dẹ noo emhin nin uwẹ gbẹn ọbhi ọne ebe rẹ taman Ọsali Jehova ọkpa nin ọle ne uwẹ talọ.
2. Ọne ọria nọn ha man uwẹ Baibo dẹ tie ẹ. Ọnọn man uwẹ emhin dẹ gbotọ emhin nọn khẹke nin uwẹ lẹn rẹji ọne iluẹmhin Baibo man uwẹ. Sẹyẹ ọle dẹ re ewanniẹn ọbhi inọnta nọn hi ki rẹ khin nin uwẹ mhọnlẹn.
3. Uwẹ bi ọnọn man uwẹ emhin dẹ ko mhanmhan ebi uwẹ ha rẹ ha lu ọne iluẹmhin Baibo yẹ. Ọne ọria dẹ sabọ ha vae bhi uwa nọnsẹ dọ ha man uwẹ Baibo, la ha noo foni, vidio kọl, la re ifoni rẹ gbẹn ebe ji uwẹ rẹ ha lu ọne iluẹmhin Baibo. Ọne iluẹmhin dẹ sabọ sẹbhi agogo ọkpa, sokpan asabọmiẹn ghe ọ i da sẹriọ, la ọ dẹ gbera iriọ, beji ọ rẹ yẹẹ uwẹ.
Mẹn dẹ sabọ lu ọle khere rẹ fẹ ọle ghe?
Ehe. Nin uwẹ rẹ lu iriọ, gbẹn vuọn ebe nọn ribhi wẹbsaiti nọnsẹmhan. Ahamien ọne ọria nọn ha man uwẹ Baibo da tie uwẹ, ji ọle lẹn ghe uwẹ guanọ nin uwẹ dọnmhọnlẹn fẹghe sọ dẹ ti uwẹ bhọ rẹ ha luẹ Baibo. Ọle ki noo brokiọ natiọle Sọnyẹnmhẹn bhi Ighegheghe! nọn mhọn iluẹmhin ea rẹ rẹkpa uwẹ rẹ fẹ ọle ghe si ọne iluẹmhin Baibo dẹ ti uwẹ bhọ.
Ahamiẹn mẹn ka nan dọ ha man mẹn Baibo, ọnọn man mẹn Baibo dẹ be ha sua mẹn ọbhọ rẹ kiẹn ọkpa bhi Esali Jehova?
Eye. Ọ wo yẹẹ Esali Jehova rẹ ha man ẹbho Baibo. Sokpan, ele i sua ọria soso ọbhọ rẹ vae bhi oga nọnsele. Ọrẹyiriọ, ele wo re ekpẹn taman ẹbho emhin ne ribhi Baibo, ranmhude ele lẹnmhin ghe ọrebhe mhọn ọne isẹhoa rẹ tobele zẹ emhin nin ele ha rẹọ i.—1 Pita 3:15.
Mẹn dẹ be sabọ noo Baibo nọnsẹmhẹn?
Ehe, uwẹ dẹ sabọ noo Baibo nọn hi ki rẹ khin nọn yẹẹ uwẹ. Arẹmiẹn ọ wo yẹẹ mhan rẹ ha noo Baibo natiole New World Translation of the Holy Scriptures, ranmhude uwedẹ nọn rẹ khia khia bhi ehọ, bi uwedẹ nọn gbale nan rẹ zedu ọle, mhan lẹnmhin ghe ọ wo yẹẹ ẹbho ne bunbun rẹ ha noo Baibo nin ele ka noo khẹ.
Mẹn dẹ be sabọ tie ẹbho nekẹle ne deba bhi ọne iluẹmhin?
Ehe. Uwẹ dẹ sabọ tie azagba-uwa nọnsẹ rebhe la imọẹ ẹ nin ele dọ deba bhi ọne iluẹmhin Baibo.
Ahamiẹn ghe mẹn ka deba esali Jehova luẹ Baibo khẹ bhi ẹghe nọn gbera kii? Mẹn dẹ be sabọ kie munhẹn?
Ehe. Bhi ọsi ẹmhọanta, asabọmiẹn uwẹ dẹ sọnyẹnmhẹn bhi ọne iman-emhin Baibo nan gbera ọnin khẹ, ranmhude a fi emhin eso denọ bhọ beji a ha da miẹn ghe, ọ ki sabọ rẹkpa ẹbho ẹlẹnan. Ọne iluẹmhin nan mhọn ividio kẹkẹ, sẹyẹ ọ dẹ rẹkpa uwẹ rẹ deba ọne man uwẹ emhin ha zilo. Ọne uwedẹ nan dikẹ bhi uwedẹ nin mhan ka rẹ man ẹbho Baibo khẹ.
Bha be mhọn iluẹmhin nọn i da ha mhọn ọria nọn ha man mẹn Baibo?
Ehe. Arẹmiẹn ẹbho ne bunbun sabọ manman luẹ emhin sade ele mhọn ọnọn man ele emhin, ọ wo yẹẹ ẹbho eso rẹ tobele ha luẹ emhin bhi ẹghe ọhẹnhẹn. Apapale nọn tẹmhọn ebi mhan rẹ man ẹbho Baibo yẹ, tẹmhọn emhin kẹkẹ ne ha sabọ rẹkpa uwẹ bhi iluẹmhin Baibo nọnsẹ. Ghe emhin eso nin uwẹ ha sabọ noo ne ha rẹkpa uwẹ:
Ividio Ne Tẹmhọn Emhin Ne Ribhi Baibo. Ene ividio ne bha tangbe nan gbotọ iman-emhin kpataki ne ribhi ẹkẹ Baibo fanọn an.
Inọnta Nin Baibo Re Ewanniẹn Ọi. Ene uhọnmhọn-ọta nan re ewanniẹn ọbhi inọnta ne bunbun rẹji emhin ne ribhi Baibo.
Ulọnlẹn Eso Bhi Baibo Nan Gbotọle Fanọn An. Fẹ ebi ulọnlẹn eso bhi Baibo, bi ikpọta eso nan noo bhi Baibo mundia nan.