Rẹkhan Ukpoẹ Nin Jesu Zẹle

Ọkhẹke nin mhan ha re egbe khọkhọ ijiẹmhin nọnsi iJesu, manman nọn sade imhan miẹn edọnmhẹn la imhan ribhi ọkakale. (1Pe 2:21-23) Arẹmiẹn ẹbho ha zuọzuọ iJesu, yẹ re oya nanlẹn le, ọle bha lu ele haosa. (Mr 15:29-32) Be rẹkpa ọle rẹ sabọ ziẹngbe? Ọle muegbe nin ọle rẹ lu iho nọnsi Jehova. (Joh 6:38) Deba ọnin, emhin esili ne ha khẹ ọle bhi odalo, ele iJesu mun ọbhi ọkhọle.—Heb 12:2.

Be imhan ha lu sade mhan miẹn edọnmhẹn bhi egbe ramhunde urẹọbhọ nọnsẹmhan? Ene gene rẹkhan iJesu, ele ire emhin ebe re haosa emhin ebe. (Ro 12:14, 17) Mhan ha khọn edọnmhẹn beji Jesu rẹ khọn edọnmhẹn, mhan ki ha ghọnghọn, ranmhude, ebi mhan lu yẹẹ Osẹnobulua.—Mt 5:10-12; 1Pe 4:12-14.

GHE ỌNE IVIDIO NATIỌLE ELIN NỌNSI JEHOVA KOKHUN NẸ. BHA HA KI GHE ỌNE IVIDIO FO, RE EWANNIẸN ỌBHI ENE INỌNTA NAN:

• Ẹghe nin obhio mhan nin okhuo iPötzingera rẹ ha ribhi ighan, be ọle rẹ re ẹwanlẹn noo ẹghe nọnsọle yẹ?

• Edọnmhẹn nela obhio man nin Pötzinger bi okhuo ọle miẹn bhi egbe ẹghe nin ele rẹ ha ribhi ighan kẹkẹ?

• Be rẹkpa ele rẹ ziẹngbe ene edọnmhẹn?