“Ebi Osẹnobulua Diẹn Kugbe. . . ”

Bhi uhi nin Jehova nanbhi obọ iMoses gbe nin ibhokhan Izrẹl, Ọle da yọle ghe ọkuẹsẹ okpea khu okhuo ọle fia, ọne okpea ki re ebe nan rẹ khu okhuo bhi isi odọ nin ọne okhuo. Ọnan ki re ẹghe nin ọne okpea rẹ ria ebi ọle ho nin ọle lu nọnsẹn, yẹ sabọ nin ene ewanlẹn zilo ọbhọ fo. Ọkpakinọn, bhi ẹghe nọnsi Jesu, ene mun ọkalo bhi oga da wo rẹ ọle kiẹn emhin nọn lẹkhẹ nan rẹ khu okhuo fia bhi isi ọdọ. Okpea dẹ wo sabọ ranmhude emhin nọn ki rẹ khin khu okhuo ọle fia. (nwtsty study note ọsi Mr 10:4, 11) Jesu da ji mhan lẹn ghe, Jehova mun iẹnlẹn ọsi ibọdọ bi ireokhuo gbọ. (Mr 10:2-12) Okpea bi okhuo ne kiẹn ọdọ bi amhẹn ki ha yi “efun ọkpa” rẹ ha khian. Baibo yọle ghe ahamiẹn ghe otuọnkpa bhi ẹwẹ ele gboghẹ, ọle ọkpa ele ha da sabọ sọ ebe a.—Mt 19:9.

Uwedẹ nin ene iPharisee rẹ ha ghe ibọdọ bi ireokhuo, ọle hi uwedẹ nin ẹbho ne bunbun rẹ ghe ọle ẹlẹnan. Ele ha zẹwẹ ha mhọn ọnọghọ bhi iẹnlẹn uwa, ebi ele ha rẹ waa egbe a yẹ ele wo ria ẹmhọn ọlẹn. Eria ne ga Osẹnobulua idiriọ lu emhin. Ele wo muegbe nin ele rẹ lu emhin rebhe nin ele vele ẹghe nin ele rẹ lọnmhọn egbe. Ele ha yẹ miẹn ọnọghọ bhi iẹnlẹn ibọdọ bi ireokhuo nọnsele, ele ki dọnmhegbe nin ele rẹ re adia nọn ribhi Baibo khọn ọnọghọ nin ele mhọn. Ghe ọne ividio natiọle Ahoẹmhọn-egbe bi Ekpẹn Ku Azagba-uwa Gbe. Bha ha ki ghe ọle fo, bha re ewanniẹn ọbhi ene inọnta nan:

• 

  Be uwẹ ha rẹ rẹkhan adia nọn ribhi Proverbs 15:1 yẹ bhi ibọdọ bi ireokhuo nọnsẹ? Bezẹle nin ọnan da yi emhin kpataki?

• Uwẹ ha rẹkhan adia nọn ribhi Proverbs 19:11, be ọ da rẹ rẹkpa uwẹ yẹ?

• Ahamiẹn ghe egbe ibọdọ bi ireokhuo nọnsi uwẹ lọ uwẹ, inọnta nela ọkhẹke nin uwẹ zilo nyan?

• Sade uwẹ lu rẹkhan ọta nọn ribhi Matthew 7:12, be ọ ha rẹ rẹkpa uwẹ rẹ kiẹn ọdọ la amhẹn nọn mhẹn yẹ?