Uwẹ Dẹ Sabọ Re Izebhudu Ha Ga Osẹnobulua!

1-3. Bezẹle nin mhan ha da sabọ yọle ghe ọta izebhudu Jesu tale bhi ẹghe nin ọle rẹ yọle, “Bha kpanọ, bha ji mhan ha khian”?

“BHA kpanọ, bha ji mhan ha khian.” Asabọmiẹn ọria bha sẹ ka ta ọta izebhudu nọn sẹ inian khẹ. Ọkpakinọn, uwẹ sabọ rẹ ha riale, be ọnan rẹ yi ọta izebhudu yẹ? Mhan dẹ lẹn ebi ọ rẹ yi ọta izebhudu yẹ sade mhan lẹn ọria nọn tale, bi ebezẹle nin ọle da tale.—Mat. 26:46.

² Jesu hi ọnọn ta ene ẹmhọn nan. Edibo nesọle ọle tale man. Ọ i yi ọne ẹghe nan hi ẹghe ọhẹnhẹn nin ọle sẹ rẹ ta ene ẹmhọn nan. (Jọni 14:31) Sokpan, ọsi ọne ẹghe nan wo dikẹ. Ogba ọsi Gẹtsimani ọle da ta ene ẹmhọn nan. Ebi wo manman lo bhi ọne ẹghe, sẹyẹ, uki wo ha bhala. Ọle lẹnmhin ghe usun ẹbho ne muno emhin okhọnlẹn mhọn vade dọ mun ọlẹn. Ọkakale nan bha sẹ ka miẹn egbe ọle khẹ, ọle Jesu ha ziẹngbe ọle nian. Sẹyẹ, ọle lẹnmhin ghe ọle ọkpa ha tobọle kuẹlo da ọne ọkakale.

³ Jesu bha ha guanọ ebi ọle ha rẹ re egbe nẹ yẹ bhi ọne ọkakale. Arẹmiẹn Jesu dẹ sabọ tie ene ẹhi nin ele dọ rẹkpa ọle, ọle bha lu iriọ. (Mat. 26:53) Ọkpakinọn, ọle da yọle: “Bha kpanọ, bha ji mhan ha khian.” Ijela Jesu khian? Eji a ha da re oya nanlẹn, yẹ gbe ọle a ọle khian riọ. Bezẹle nin ọle da muegbe rẹ loya nọn sẹ inian? Ranmhude, ọle hoẹmhọn aba ọle bi edibo nesọle.

4-5. Unan izebhudu nela Jesu rẹman? Bezẹle nọn da khẹke nin mhan ha mhọn izebhudu nọn sẹ iriọ?

⁴ Edandan i ribhọ ghe, Jesu hi ọria nọn sẹ re izebhudu man nẹ. Odibo nọnsọle uwẹ be khin? Ahamiẹn ọle uwẹ khin, uwẹ mhọn izebhudu. Ikpẹ nọn khẹke nin Kristiẹn ọsaje ha mhọn izebhudu khin. Ọ wo manman khẹke nin mhan ha re ọne ikpẹ nan man nian gbera ọnikhẹ, ranmhude agbọn nin ọkakale bi okhẹnan vuọn mhan da nyẹnlẹn.

⁵ Unan izebhudu nela Jesu rẹman? Izebhudu nin Jesu rẹman wo dikẹ bhi uwedẹ nin ẹbho rẹ ghe izebhudu. Ẹbho eso riale ghe, ọria nọn mhọn izebhudu hi, ọria nin ofẹn emhin soso i mun, ọria nọn ji uhọnmhọn ọbhi okhẹnan aharẹmiẹn ọle dẹ sabọ re egbe nẹ bhọ, la ọria nọn riale ghe emhin soso i da sabọ sunu ji ọle. Sẹyẹ, ẹbho riale ghe izebhudu hi, nin ọria rẹ ha dọnmhẹn-ike-dọnmhẹn-alo, nin ọle rẹ rẹman ghe ọle ziẹnmhin. (Ps. 11:5) Ọkpakinọn, ọria nọn mhọn izebhudu bii Jesu hi, ọria nọn mhọn ọne ahu rẹ lu ebe ti Osẹnobulua bhọ aharẹmiẹn ọ bha lẹkhẹ nanlẹn, la ofẹn mun ọlẹn.

Uwẹ Dẹ Sabọ Re Egbe Khọkhọ Jesu Bhi Uwedẹ Nin Ọle Rẹ Re Izebhudu Man!

6. Ahamiẹn mhan riale ghe mhan i da sabọ re izebhudu man, be ẹmhọn nin Jesu tale ha rẹ ko mhan udu re yẹ?

⁶ Asabọmiẹn uwẹ riale ghe, ọ dẹ nọghọ uwẹ rẹ re izebhudu man bii Jesu sade uwẹ kuẹlo da ọkakale. Ọ ha yi iriọ, yere ghe, Jesu lẹn uwẹ nọnsẹn. Jesu wo re egbe khọkhọ aba ọle. Ọle bha yọle nin mhan lu gbera eka nin ahu nọnsẹmhan gbele. (Ps. 103:14; Jọni 14:9) Bhi ọsi ijiẹmhin, beji Jesu ha ribhi ogba ọsi Gẹtsimani, ọle da taman etuegbe nesọle nin ele deba ọle ganẹdẹ, ọkpakinọn, ele da wẹ fia. Ọrẹyiriọ, ọle da fẹkẹ taman ele yọle: “Ẹmhọanta nọn ghe ibha rẹ wo muegbe nin ibha rẹ lu emhin nọn mhẹn, ọkpakinọn, efun nọnsẹbha wẹghẹ a.” (Mat. 26:41) Jesu lẹn ebi emhin dia ele yẹ, sẹyẹ, ọle lẹn ebi emhin dia uwẹ yẹ.

7-8. Be Jesu rẹ rẹman yẹ ghe ọle rẹọbhọ edibo nesọle dẹ sabọ re izebhudu man?

⁷ Jesu rẹọbhọ ghe edibo nesọle dẹ sabọ re izebhudu man. Ria ẹmhọn ebi ọkhọle nọnsele ha diayẹ bhi ẹghe nin Jesu rẹ taman ele yọle: “Bha ha mhọn izebhudu, ranmhude, mẹn khọn ọne agbọn nan miotọ.” (Jọni 16:33) Jesu rẹọbhọ ghe edibo nesọle dẹ sabọ re egbe khọkhọ ọle bhi uwedẹ nin ọle rẹ re izebhudu man. Bhi ọsi ẹmhọanta, iriọ ele gene lu. Jesu wo ta ene ẹmhọn, “ha mhọn izebhudu,” igba ne bunbun. Ọle tale man akhun ọkpa ọkuẹsẹ ọle taman ọlẹn ghe, a gbe olukhọ nọnsọle kua. (Mat. 9:2) Ọle tale man okhuo ọkpa beji ọle re egbe daan ọlẹn fo bhi emianmhẹn nin ọle a khọnmhọn. (Mat. 9:22) Ọle tale rẹ re izebhudu nin edibo nesọle ẹghe nin ofẹn rẹ ha mun ele ranmhude efi nọn a fi. (Mat. 14:27) Ọle yẹ na bhi okhun tale man Pọl nin odibo bhi ẹghe nin usun ẹbho rẹ ha ho nin ele gbe ọle a.—Iwẹn. 23:​9-11.

⁸ Ẹlẹnan nian, Jesu nin Ojie nọnsẹ, nọn manman mhọn izebhudu yẹ wo ha ta ene ẹmhọn nan man uwẹ. Ọle guanọ nin uwẹ “ha mhọn izebhudu”! Ọle rẹọbhọ ghe uwẹ dẹ sabọ ha mhọn ọlẹn. Jehova nin aba ọle ne emhin rebhe nin uwẹ, ne ha rẹkpa uwẹ rẹ sabọ lu iriọ.

Be Baibo Ha Rẹ Rẹkpa Mhan Yẹ Rẹ Sabọ Ha Mhọn Izebhudu?

9. Be Ọta nọnsi Osẹnobulua ha rẹ sabọ re izebhudu nin mhan yẹ?

⁹ Okha ọsi eria ne ha sabọ rẹkpa mhan rẹ ha mhọn izebhudu wo bunbun bhi Baibo. Mhan dẹ miẹn okha ọsi ikpia bi ikhuo ne gene nyẹnlẹn tie bhi Baibo. Ibhokhan eso bhi ẹwẹ ele khin, ọkakale kẹkẹ ele kuẹlo da bhi iẹnlẹn, sẹyẹ, eria bii mhan ele khin. (Jem. 5:17) Beji ọ bha rẹ gba nin mhan, iriọ ọ bha yẹ rẹ gba nin ele. Ele mhọn eji ele da wẹghẹ, sẹyẹ, ele dobọ. Bii mhan, ele wo kuẹlo da ọkakale kẹkẹ, yẹ de ọbhi okhẹnan. Ọrẹyiriọ, ele da khọn miotọ beji Jesu rẹ khọn miotọ. Ele da wo re izebhudu man. Okha nọnsele wo re izebhudu nin mhan ẹlẹnan.

10-11. Be ọne ebe nan ha rẹkpa uwẹ rẹ ha mhọn? Be a rẹ noo ọne ebe nan yẹ? (Sẹyẹ fẹ ọne ẹkpẹti ghe nọn yọle, “Ebi A Rẹ Noo Ọne Ebe Nan Yẹ Bhi Iluẹmhin Baibo Nin Ọria Tobọle Lu Bi Bhi Oga Azagba-uwa.”)

¹⁰ A gbẹn ọne ebe nan nọn rẹkpa uwẹ rẹ ha mhọn izebhudu. Bhi ene iluẹmhin 54 ne ribhọ, uwẹ dẹ daghe ebi Jehova rẹ rẹkpa eria nọn bha gba nan yẹ, rẹ sabọ re izebhudu man bhi eji ọ da khẹke. Bhiriọ, tie ene okha kẹkẹ ne ribhọ, uwẹ ha yẹ gua otọ ẹmhọn ọria nan tẹmhọn ọlẹn bhi okha nin uwẹ tie. Uwẹ ha lu iriọ, uwẹ ki dọ manman lẹn ene ikpia bi ikhuo nan gbokha nọnsele.

¹¹ Mhan bhii nin okha nọnsele rẹkpa uwẹ rẹ manman ha mhọn izebhudu, beji uwẹ rẹ ziẹngbe bhi ọne “ẹghe ọkike” nan. (2 Tim. 3:1) Ukpẹdẹ-ukpẹdẹ, bha ji mhan wo ha yere ive nin Jehova ve nọn yọle: “Mẹn ida zẹ ibha obọ ghẹdẹ, sẹyẹ, a bha miẹn ebe ha re imẹn fikekegbe ibha.” Beji Pọl tale, ene ẹmhọn nan dẹ rẹkpa mhan rẹ “sabọ gbe obọ bhi udu yọle: ‘Jehova hi ọnọn rẹkpa mẹn, ofẹn ida mun mẹn.’”—Hib 13:​5, 6.