Ọle Da Rẹkpa Ẹbho Nesọle Rẹ Kie Ha Ga Jehova

EYẸ ọsi Manasẹ Josaya khin. Ikpe ehan Josaya ha ye ẹghe nin Manasẹ rẹ yu. Josaya lẹnmhin ghe ọkuẹsẹ aba ọle nọn khua nin Manasẹ yu, ọle fidenọ yẹ ha ga Jehova. Asabọmiẹn ẹghe-ẹghe Josaya rẹ ha yere ebi aba ọle nọn khua rẹ fidenọ yẹ, yẹ ha lu emhin esili. Ọkpakinọn, ẹghe nin aba Josaya natiọle Amọn rẹ kiẹn ojie, ọle da wo ha lu emhin ebe. Ọle da ha sua ẹbho ọbhọ nin ele rẹ ha ga ẹbọ, yẹ lu emhin ebe. Ikpe eva ọle rẹ gbẹloghe ọkuẹsẹ ọle yu. Bhiriọ, ọmọn nọnsọle natiọle Josaya da kiẹn ojie. Ikpe elẹnlẹn ọle ha ye ẹghe nin ọle rẹ kiẹn ojie.

Asabọmiẹn obọ Zẹfanaya, Jerimaya, Huda nin akhasẹ, bi Hikaya nin ojohẹn Josaya da luẹ ẹmhọn Jehova. Baibo da ta ene ẹmhọn nan rẹji Josaya. Ọ da yọle: “Beji ọle sẹyẹ ha yi obhokhan [ebe sẹbhi ikpe 16], ọle da munhẹn ha guanọ Osẹnobulua ọsi Devid nin aba ọle nin ẹdẹlẹ.” Beji ọle ha ribhi ikpe 20, ọle da rẹkpa ibhokhan Juda rẹ ha ga Jehova bhi uwedẹ nọn gbale. Jehova da noo Josaya rẹ kpe ọne otọ khia bhi emhin ebe bi ilọnmhọn ẹbọ nin ele rẹ ha lu. Izebhudu Josaya wo rẹman!

Josaya da yẹ diọbhi obọ ọsi nọt nin ulin-uwa igbe ọsi ibhokhan Izrẹl rẹ ha ye. Ẹbho ne bunbun ne nyẹnlẹn bhi enin i yi ibhokhan Izrẹl, ranmhude, ibhokhan Izrẹl ne rẹ ha nyẹnlẹn bhi enin, a muno ele ha khian imun bhi otọ Asiria. Ọrẹyiriọ, Josaya da sẹyẹ dunmhun ene ẹbọ bi ene ukhuo-izọese ne ha ribhi enin an.

Ebe sẹbhi ikpe 5 ki gbera, Josaya da je ikpia eso nin ele dọ hẹnhẹn uwa oga nọnsi Jehova. Beji ele rẹ ha hẹnhẹn ọne uwa oga, Hikaya nin Ojohẹn da miẹn ebe uhi nin Jehova na obọ Mozis gbe nin ibhokhan Izrẹl. Ọne ebe bhọ ki dọmanlẹn. Asabọmiẹn Mozis tobọle bhọ gbẹn ọlẹn! A da re ọne ebe uhi ji Josaya. Ọle da wo ha kaehọ beji ele rẹ ha tie ọle dagbare man ọlẹn. Ebi a tie man ọlẹn bhi ọne ebe uhi da wo rẹso ọle bhi ọkhọle! Ọle da dọ lẹn kere ghe, ene ẹbho gbobọrauhi nọnsi Jehova. Ọ da wo khia bhi ẹlo nọnsi Josaya ghe, ebi ene ẹbho lu khọ Jehova bhi ẹkẹ. Be Josaya ha ki lu yẹ nian?

Ẹjẹje, Josaya da je ikpia nesọle isẹn nin ele dọ fẹghe ebi Jehova ha ki khian ele yẹ. Ele da bu Huda nin akhasẹ. Ọle da taman ele ghe, ẹkẹ wo gene ha khọ Jehova, ranmhude nin ibhokhan Juda rẹ ha mhọn akan-ehọ da ọle. Ranmhude ọnan, ọle dẹ fuẹn Jerusalẹm bi Juda a. Ọkpakinọn, ọne akhasẹ da yẹ taman ele ghe, Jehova daghe ọkhọle nọn mhẹn ọsi Josaya bi uwedẹ nin ọle rẹ rẹkpa ene ẹbho rẹ ha ga ọle bhi uwedẹ nọn gbale. Bhiriọ, ọle i da fuẹn Jerusalẹm bi Juda a bhi ẹghe nọnsi Josaya.

Ọrẹyiriọ, Josaya da sẹyẹ ha wẹnna kaka nin ọle rẹ rẹkpa ẹbho nesọle rẹ ha ga Jehova. Ọle bi ẹbho nesọle da ve ghe, ele dẹ ha re obọ rẹkhan Uhi nọnsi Osẹnobulua. Ọle da yẹ ha wẹnna kaka nin ọle rẹ dunmhun ene ẹbọ sibhi ọne otọ re. Beji ene ẹbho ha da sabọ ha ga Jehova bhi uwedẹ non khiale, ọle da mhanmhan iluemhin ọsi Anagbera. Ọle bi ekhaẹmhọn nesọle da muno elanmhẹn ne bunbun re nan rẹ zọese ji Jehova. Ene so illo da ha so illo rẹ gẹn Jehova. Ọkpa bhi iluemhin ọsi Anagbera nọn ki sẹ titi nẹ khọnan, nin ẹbho nesi Osẹnobulua sẹ lu.

Josaya da wo ha re izebhudu bi urẹọbhọ man beji ọle rẹ ha dunmhun ẹbọ sibhi ọne otọ re. Ẹghe ọkpa ribhọ nin ọle rẹ tuẹ iguẹ ọsi eria a bhi ukhuo-izọese nin ẹbho da zọese ji ẹbọ. Ọle ki lu ọnin fo, ọle da dunmhun ọne ukhuo-izọese a. Ọne emhin nan nin ọle lu, da mun ọta akhasẹ sẹ nan khale bhi ikpe 300 ne gbera. (1 Ki. 13:2) Josaya bhọ da dunmhun ẹbọ bi ukhuo-izọese a, nin ene ẹbho ha noo bhi otọ Juda. Rẹ na bhi ẹghe nin Solomọn nin Ojie rẹ fikekegbe Osẹnobulua, ọle ẹbho rẹ ha ga ọne ẹbọ yẹ noo ọne ukhuo-izọese nan. Ọkpakinọn, ẹghe ọkpa ribhọ nin Josaya rẹ zẹ emhin nọn bha gba rẹ lu. Ọle da mun okhọnlẹn bu ojie ọsi Ijipt natiọle Niko. Niko da taman Josaya ghe, ọle ha mun okhọnlẹn bu ọle, uu Josaya ha miẹn bhọ. Niko da yẹ taman Josaya ghe, Jehova hi ọnọn je ọle, nin ọle ta ọnan man ọlẹn. Ọkpakinọn, nin Josaya rẹ dọ nọọn ene akhasẹ si Jehova gene noo Niko rẹ ta ene ẹmhọn nan, ọle da ji uhọnmhọn bhi uwedẹ ha khian ọne okhọnlẹn. Uwẹ sabọ ha riale ghe izebhudu Josaya wo rẹman nin ọle rẹ mun okhọn bu Niko bi eyokhọnlẹn nesọle ne manman wo. Ọkpakinọn, ọnan i yi emhin ẹwanlẹn hiehie. Ọle da re uhọnmhọn fia bhi ọne okhọnlẹn. Ikpe 39 ọle ha ye beji ọle yu.

Jehova be ye emhin esili rebhe nin Josaya lu a? Hiehie! Jerimaya nin akhasẹ da gbẹn ebe illo nọn rẹman ebi uu nọnsi Josaya ba ọle bhi egbe sẹ yẹ. Bhi ẹkẹ ikpe ne bunbun, ẹbho nesi Osẹnobulua da sẹyẹ ha so ọne illo akhiẹ nan. Bhi ẹghe nan ha rẹ riọ Josaya kpanọ bhi uu, ọle dẹ luẹ ẹmhọn emhin esili nin ọle lu nan gbẹn ọbhi Baibo, bi ọne illo nin Jerimaya nin akhasẹ gbẹn nin ọle rẹ tẹmhọn emhin esili nin ọle lu. Gene-gene, Jehova wo hoẹmhọn Josaya. Ọle bha ye urẹọbhọ bi izebhudu nin Josaya rẹman an.

Tie ọne okha bhi Baibo:

• 2 Kings 22:1–23:30

• 2 Chronicles 33:21–35:27

Inọnta:

Uwedẹ nela Josaya rẹ re izebhudu man?

StockStudio/Alamy Stock Photo

1. 4. Huda da kha akhasẹ ghe, ‘A dẹ re Josaya tọ bhi idin nọnsọlẹ bhi ọfure.’ Be ọne ọta akhasẹ nan ki rẹ munsẹ yẹ, beji a miẹn okhọnlẹn Josaya da yu? (2 Ki. 22:20; w00 9/15 30 ¶2-3)

   Ewanniẹn nọnsẹ

Ria Eria Nyan Emhin Nin Uwẹ Luẹle

• Ibhio mhan eso mhọn aba bi inẹn ne i ga Jehova. Be ele ha sabọ miẹn luẹ bhi obọ Josaya nin aba ọle bha ha ga Jehova?

  Ewanniẹn nọnsẹ

• Josaya da dọnmhegbe nin ọle rẹ lẹn otọ uhi nesi Jehova. (2 Chron. 34:21) Be mhan ha rẹ sabọ re egbe khọkhọ ọle yẹ? 2

  Ewanniẹn nọnsẹ

  

• Uwedẹ ebhebhe nela uwẹ ha rẹ sabọ re egbe khọkhọ Josaya bhi izebhudu nin ọle rẹman?

  Ewanniẹn nọnsẹ

Ria Ẹmhọn Jehova Bi Iho Nọnsọle

• Be ọne okha nan man mẹn le rẹji Jehova?

  Ewanniẹn nọnsẹ

• Be ọne okha nan rẹ diẹn mun iho nọnsi Jehova yẹ?

  Ewanniẹn nọnsẹ

• Be mẹn ha nọọn Josaya le sade a riọ ọle kpanọ bhi uu?

  Ewanniẹn nọnsẹ

Sẹyẹ Fẹ Ene Emhin Nan Ghe

Fẹ ebi uwẹ ha sabọ miẹn luẹ bhi ebi Josaya bi elasẹre eva ebhebhe ne kiẹn ojie ọsi Juda zẹ rẹ lu.

“Elasẹre—Be Bha Ho Nin Iẹnlẹn Nọnsẹbha Diayẹ?” (w23.09 8-13)

Ahu obọle Josaya be noo rẹ dunmhun ẹbọ sibhi agbaẹbho nọnsọle re? Uwẹ dẹ miẹn ọne ewanniẹn bhi ọne ividio nan.

Okha ọsi Josiah: Hoẹmhọn iJehova; He Emhin Ebe—Obọ II—Ukpọkhere (3:43)