21 SAMUẸL
Obhokhan Okpia Nọn Re Izebhudu Wewe Uhọnmhunje Nọnsi Jehova
SAMUẸL yẹ wo diabe ọmokhuo nọnsi Jẹfta bi Samsin. Be ọle rẹ diabe ele yẹ? Uwedẹ nin ene biẹ ele rẹ lu emhin wo rẹso iẹnlẹn nọnsele. Samuẹl wo re iẹnlẹn nọnsọle rẹ ha ga Jehova beji ọmokhuo nọnsi Jẹfta ha lu. (1 Sam. 2:11) Samuẹl yẹ ha yi Nazarait bii Samsin. (Judg. 13:7) Ọ da yẹ khẹke nin Samuẹl ha mhọn izebhudu beji ọmọn nọnsi Jẹfta bi Samsin rẹ ha mhọn izebhudu.
Bhi ẹghe nin Samuẹl rẹ zẹ ukpẹ bhi iyẹn, inẹn ọlen nin Hana da mun ive nin ọle ve ji Jehova sẹ. Ọle da re Samuẹl ha khian uwa oga nọn ribhi Shailo, beji ọle ha da re iẹnlẹn nọnsọle rẹ ga Jehova. Asabọmiẹn ikpe ea Samuẹl ha ye bhi ọne ẹghe nan. Ọkpakinọn, ukpe-ukpe, ọle Hana rẹ ha rẹnẹ ji Samuẹl bhi uwa oga. Ọle ki yẹ ne ukpọn ọsọgbọn ji ọle. Ẹlai nin ojohẹn hi ọnọn ha gbẹloghe Samuẹl bhi ọne uwa oga. Asabọmiẹn ikhuo eso ne ha ribhi ọne uwa oga yẹ deba gbẹloghe Samuẹl.
Ọkpakinọn, ẹbho eso da ha lu emhin ebe bhi ọne uwa oga. Sokpan, Ẹlai nin ojohẹn bha lu emhin soso nin ọle rẹ re ọkpẹnlẹn ọbhi ene emhin ebe nin ele ha lu. Imikpia eva ọsi Ẹlai, nin elin nọnsele yi Họfnai bi Finẹhaz da wo ha lu emhin ebe. Ele da ha ne ikhuo eso ne ha ga bhi uwa oga nọnsi Jehova nowẹ. Ele da ha re obọ ikpẹghẹdẹ rẹ mun izọese nan ha lu bhi uwa oga nọnsi Jehova. Ahamiẹn ẹbho muno emhin re nin ele rẹ zọese ji Jehova, Họfnai bi Finẹhaz ki taman eguọmhandia ne wẹnna bhi uwa oga, nin ele ne ene mhẹn nẹ bhọ kie, ele ha re enekẹle zọese ji Jehova. Ẹlai lẹn ebi imikpia nesọle ha lu. Ọrẹyiriọ, ọle bha manman talọ ọbhi emhin ebe nin ele ha lu. Ranmhunde ọnan, ele bha zobọ bhọ. Arẹmiẹn ene emhin ebe nan wo ha sunu nẹga Samuẹl, Samuẹl da sẹyẹ wo ha lu ebe ti Jehova bhọ. Ranmhude ọnan, Jehova bi eria da ha re ẹlo esili rẹ ghe ọle. Ẹghe ki sẹ nin Jehova ha rẹ re emhin ọ i nọnsẹn bhi uwa oga nọn ribhi Shailo, ọle da zẹ Samuẹl nọn wewe uhọnmhunje nọnsọle.
Bhi ukpasọn ọkpa, Samuẹl da họn ghe ọria tie ọle. Jehova hi ọnọn ha tie ọle! Ọkpakinọn, Samuẹl da ha riale ghe Ẹlai hi ọnọn ha tie ọle. Bhiriọ, ọle da runẹ bu Ẹlai nin ojohẹn dọ nọọn ọlẹn si ọle tie ọle. Ẹlai da taman ọlẹn ọ i yi ọle tie ọle, ghe nin ọle fikie dọ nowẹ. Ọne emhin nan da gbo kie sunu igba-eva. Bhi ọsi ugba-ọzea, Ẹlai da lẹn ghe Jehova hi ọnọn ha tie Samuẹl. Bhiriọ, ọle da taman Samuẹl nin ọle fikie dọ nowẹ. Ẹlai da taman Samuẹl ghe ọle ha kie họn ghe ọne urulu tie ọle, nin ọle yọle: “Talọ Jehova, ọguọmhandia nọnsẹ kaehọ.” Samuẹl da lu beji Ẹlai taman ọlẹn.
Bhi ọsi ugba-ọzenẹn, Jehova da datie Samuẹl yọle: “Samuẹl, Samuẹl!” Ọne obhokhan da yọle: “Talọ, ọguọmhandia nọnsẹ kaehọ.” Bhiriọ, Jehova da nanlẹn talọ. Jehova da taman ọlẹn ghe ọle daghe emhin rebhe ne sunu bhi uwa oga nọnsọle nọn ribhi Shailo, ghe, ọle dẹ re emhin rebhe ọ i nọnsẹn. Sẹyẹ, ọle da yọle ghe ọle dẹ re oya nin Ẹlai le nin ọle bha rẹ sabọ taman imọn nesọle nin ele re obọ sibhi emhin ebe re. Jehova dẹ re oya nin Ẹlai, azagba-uwa nọnsọle, rẹ dọ sẹbhi imọn nin ọle biẹ. Enan hi emhin rebhe nin Samuẹl ha taman Ẹlai!
Samuẹl da kie dọ nowẹ. Ọkpakinọn, Baibo bha taman mhan si ọle kie miẹn owe bhi ẹlo. Ẹdẹ ki we, Samuẹl da kpanọ dọ tuje odẹ nan da nabhi ẹgodo nọn ribhi ẹkẹ uwa oga a. “Ofẹn da ha mun Samuẹl rẹ taman Ẹlai ẹmhọn imianlo nin ọle miẹn.” Ẹlai da tie Samuẹl yẹ nọọn ọlẹn ebi Jehova taman ọlẹn. Asabọmiẹn Ẹlai lẹn ghe ofẹn mun Samuẹl rẹ tale. Bhiriọ, ọle da yọle: “Wowo, hẹi re emhin soso he nin mẹn.”
Arẹmiẹn obhokhan Samuẹl khin, ofẹn bha ha mun ọlẹn rẹ taman Ẹlai nin ojohẹn emhin rebhe nin Jehova tale
Ọne ẹghe nan bha zẹwẹ lẹkhẹ nin Samuẹl. Asabọmiẹn Samuẹl ha ghe Ẹlai bii aba ọle nọn khua. Ọrẹyiriọ, mhan lẹnmhin ghe ọle wo ha mun ekpẹn nin Ẹlai ranmhude ọle hi ojohẹn ọsi Izrẹl! Arẹmiẹn Samuẹl wo ha mun ekpẹn nin Ẹlai, ọle da sẹyẹ taman ọlẹn emhin rebhe nin Jehova tale. Ẹlai da dọ lẹn ghe ẹbe bu ọle vade. Ọrẹyiriọ, ọle be dọ re adia nin imọn nesọle bhi ọne ẹghe nan? Emhin soso i ribhọ nọn rẹman ghe ọle lu iriọ.
Jehova da wo manman nan erọnmhọn nin Samuẹl ranmhude izebhudu nin ọle rẹman. Baibo da ji mhan lẹn ghe Jehova wo ne Samuẹl dia. Bhi ọne ẹghe nin, Jehova da re Samuẹl kiẹn akhasẹ nọnsọle. Sẹyẹ, Jehova da mun ọta rebhe nin Samuẹl ta sẹ. Emhin rebhe nin Samuẹl tale rẹji Ẹlai bi imọn nesọle da wo munsẹ. Ikpe ne bunbun ki gbera, Jehova da ha noo Samuẹl rẹ dia ibhokhan Izrẹl. Samuẹl da ha yi akhasẹ ọsi Jehova bi ọbhuohiẹn bhi otọ Izrẹl rẹ na bhi ikpe ne bunbun. Ọle da wo re egbe obhokhan rẹ luẹ ebi a rẹ re izebhudu man yẹ. Ọle da wo ha re izebhudu man yẹ ga Jehova rẹ dọ sẹbhi ukpẹdẹ nin ọle yu.
Tie ọne okha bhi Baibo:
1 Samuel 1:9-11, 24-28; 2:12-36; 3:1-21; 25:1
Inọnta:
Uwedẹ nela Samuẹl rẹ re izebhudu man?
Manman Guanọ Otọle
1. Be agbaẹbho ọsi Shailo nin uwa oga nọnsi Jehova ha ye diayẹ? (w92 11/1 8-9) 1
Todd Bolen/BiblePlaces.com
Ifoto 1: Eji Shailo ha ye bhi ẹghe ẹdẹlẹ
2. Be iẹnlẹn dia Samuẹl yẹ bhi ẹkẹ uwa oga? (ia 60-62 ¶9-13) 2
Ifoto 2
3. Baibo yọle ghe Samuẹl “bha sẹ lẹn Jehova.” Be ọne ota nan mundia nan? (1 Sam. 3:7; w02 12/15 8 ¶5-6)
4. Be akhasẹ nan khale rẹji azagba-uwa ọsi Ẹlai rẹ munsẹ yẹ? (it “Ẹlai, I” ¶5-7)
Ria Eria Nyan Emhin Nin Uwẹ Luẹle
Be elasẹre ha rẹ sabọ ha . . .
hẹnmhọn yẹ beji Samuẹl lu? (1 Sam. 3:5)
mun ekpẹn nin ẹbho yẹ beji Samuẹl lu? (1 Sam. 3:6-10)
yi eria nan mun udu nyan yẹ bii Samuẹl? (1 Sam. 3:15) 3
Ifoto 3
Ẹghela ọ rẹ khẹke nin elasẹre rẹ talọ dagbare? Be ijiẹmhin ọsi Samuẹl ha rẹ rẹkpa ele yẹ?
Uwedẹ ebhebhe nela uwẹ ha rẹ sabọ re egbe khọkhọ Samuẹl bhi izebhudu nin ọle rẹman?
Ria Ẹmhọn Jehova Bi Iho Nọnsọle
Be ọne okha nan man mẹn le rẹji Jehova?
Be ọne okha nan rẹ diẹn mun iho nọnsi Jehova yẹ?
Be mẹn ha nọọn Samuẹl le sade a riọ ọle kpanọ bhi uu?
Sẹyẹ Fẹ Ene Emhin Nan Ghe
Ẹghela ọ rẹ khẹke nin elasẹre bi ene wanre rẹ re izebhudu lu emhin nọn gbale?
Arẹmiẹn ẹbho ne nẹga Samuẹl bha ha lu emhin ne ti Osẹnobulua bhọ, Samuẹl da sẹyẹ ha lu emhin nọn mhẹn.