ILUẸMHIN 54
Họla Hi “Ọguọmhandia Nọn Wanlan Nan Gbaẹkẹ Ọle”?
Jesu hi ọnọn sun agbotu. (Ephesians 5:23) Okhun bhi ẹlinmhin ọle ye. Enin ọle na sun edibo nesọle ne ribhi ọne otọ nan. “Ọguọmhandia nọn wanlan nan gbaẹkẹ ọle” ọle noo rẹ sun ele. (Tie Matthew 24:45.) Arẹmiẹn Jesu re ahu nin ọne “ọguọmhandia” rẹ ha re ẹbho nesọle khian, odotọ iJesu, ọle ọne “ọguọmhandia” sẹyẹ ye. Ọne ọguọmhandia yẹ gbẹloghe enanzẹle rebhe. Họla ọne ọguọmhandia? Be ọne ọguọmhandia rẹ gbẹloghe mhan yẹ?
1. Họla hi “ọne ọguọmhandia nọn wanlan nan gbaẹkẹ ọle”?
Rẹ na bhi otọ ha vade, Jehova mhọn eria nin ọle zẹle nin ọle rẹ re ẹbho nesọle khian. Ọ sabọ ha yi otuọnkpa la eria eso. (Malachi 2:7; Hebrews 1:1) Ẹghe nin Jesu rẹ yu fo, ene etuegbe bi ene ewanlẹn ne ribhi Jerusalem, ele ki ha re edibo nesi Jesu khian. (Acts 15:2) Bhi ẹghe nọnsẹmhan yẹ, usun ewanlẹn eso, ele re agbotu khian. Ọne usun nan a tiọle Otu Nọn Sun Oga ọsi Esali Jehova. Ọne usun nan re ebale oriọn nin mhan. Ele yẹ sun iwẹnna itẹmhọn Osẹnobulua bhi otọ agbọn rebhe. Ọne usun hi “ọguọmhandia nọn wanlan nan gbaẹkẹ ọle” nin Jesu re mundia. (Matthew 24:45a) Usun ọsi enanzẹle, ọle ene ewanlẹn rebhe ne ribhi Otu Nọn Sun Oga ye. Ele mhọn ọne iruduba ghe, ele ha yu, ele dẹ bu iJesu bhi okhun, nin ele dọ deba ọle ha gbẹloghe.
2. Be ọne ọguọmhandia rẹ re ebale oriọn nin mhan yẹ?
Jesu yọle ghe, ọne ọguọmhandia nan gbaẹkẹ ọle dẹ ha “re ebale nin mhan bhi ẹghe nọn khẹke.” (Matthew 24:45b) Beji ebale nin mhan le rẹ re ahu nin mhan, yẹ mun mhan ziẹn, iriọ ebale oriọn rẹ rẹkpa mhan rẹ sun rẹkhan iJehova, yẹ lu iwẹnna nin Jesu mun nin mhan. (1 Timothy 4:6) Mhan miẹn ọne ebale nan le bhi ikolo oga, usikoko nesẹmhan, ebe nesẹmhan, bi vidio nesẹmhan. Ọne ebale nan rẹkpa mhan rẹ lẹn iho nọnsi Jehova. Ọle yẹ rẹkpa mhan rẹ ziẹn ikolu nin mhan bi Jehova ko mhọnlẹn.
MANMAN LẸN OTỌLE NỌNSẸN
Luẹ ebezẹle nọn da khẹke nin mhan ha mhọn Otu Nọn Sun Oga, nin Baibo yẹ tiọle “ọguọmhandia nọn wanlan nan gbaẹkẹ ọle.”
Otu Nọn Sun Oga re ebale oriọn, adia, bi urẹkpa nin Esali Jehova bhi otọ agbọn rebhe
3. Ẹbho nesi Jehova lu emhin rẹkhan emhanmhan
Otu Nọn Sun Oga, ọle Jesu noo rẹ sun iwẹnna ọsi Esali Jehova ẹlẹnan. Emhanmhan nọn dia inian, ọle Jesu yẹ rẹ sun iKristiẹn bhi ore nin ọhẹnhẹn. Ghe ọne IVIDIO.
Tie 1 Corinthians 14:33, 40, bha ha zilo nyan ọne inọnta nan:
Be ẹmhọn ne ribhi ọne ulọnlẹn nan rẹ reman yẹ ghe, Jehova guanọ nin ẹbho nesọle ha lu emhin rẹkhan emhanmhan?
4. Ọguọmhandia nan gbaẹkẹ ọle, ọle sun iwẹnna itẹmhọn Osẹnobulua
Iwẹnna kpataki, ọle iwẹnna itẹmhọn Osẹnobulua wo ha khin rẹji Kristiẹn bhi ore nin ọhẹnhẹn. Tie Acts 8:14, 25, bha ha zilo nyan ene inọnta nan:
He bhọ ha re iwẹnna itẹmhọn Osẹnobulua khian bhi ore nin ọhẹnhẹn?
Be iPeter bi John rẹ re obọ rẹkhan adia nin etuegbe ne ribhi Jerusalem re nin ele yẹ?
Iwẹnna itẹmhọn Osẹnobulua, ọle hi iwẹnna ọkalo nin Otu Nọn Sun Oga rẹ khian ẹlẹnan. Ghe ọne IVIDIO.
Jesu rẹkpa mhan rẹ lẹn ebi iwẹnna itẹmhọn Osẹnobulua lu uhọnmhọn- emhin sẹ yẹ. Tie Mark 13:10, bha ha zilo nyan ene inọnta nan:
Bezẹle nin iwẹnna itẹmhọn Osẹnobulua da yi iwẹnna nọn manman lu uhọnmhọn-emhin bhi ẹlo ọsi Otu Nọn Sun Oga?
Bezẹle nọn da khẹke nin mhan ha mhọn “ọguọmhandia nan gbaẹkẹ ọle,” nọn ha dia ọne iwẹnna bhi otọ agbọn rebhe?
5. Ọne ọguọmhandia nan gbaẹkẹ ọle, ọle re adia nin mhan
Otu Nọn Sun Oga, ọle re adia nin Esali Jehova bhi otọ agbọn rebhe. Be rẹkpa ele rẹ lẹn adia nọn khẹke nin ele re nin mhan? Ji mhan fẹ ebi otu nọn sun oga bhi ore nin ọhẹnhẹn rẹ ha lẹn adia nọn khẹke nin ele re nin Kristiẹn yẹ. Tie Acts 15:1, 2, bha ha zilo nyan ene inọnta nan:
Be si ẹmhọn re bhi ẹwẹ iKristiẹn bhi ore nin ọhẹnhẹn?
Hela a je iPaul, Barnabas bi ẹbho ebhebhe bu, nin ele talọ bhi ọne ẹmhọn?
Tie Acts 15:12-18, 23-29, bha ha zilo nyan ọne inọnta nan:
Be bhọ otu nọn sun oga bhi ore nin ọhẹnhẹn lu, nin ele rẹ lẹn iho nọnsi Osẹnobulua bhi ọne ẹmhọn nọn ha ribhi otọ?—Fẹ ulọnlẹn 12, 15, bi 28 ghe.
Tie Acts 15:30, 31 bi 16:4, 5, bha ha zilo nyan ene inọnta nan:
Be ene iKristiẹn bhi ore nin ọhẹnhẹn lu yẹ, beji ele họn ọne adia nin otu nọn sun oga re re bhi ọne ẹmhọn?
Be iJehova rẹ nan erọnmhọn nin ele yẹ, ranmhude uwedẹ nin ele rẹ hẹnmhọn nin otu nọn sun oga?
Tie 2 Timothy 3:16 bi James 1:5, bha ha zilo nyan ọne inọnta nan:
Obọ ọbhọ la Otu Nọn Sun Oga da guanọ urẹkpa sade ele zilo nyan adia nin ele ha re nin agbotu?
ẸBHO ESO SABỌ YỌLE: “Eria khọnkhan uwẹ gheghe rẹkhan sade uwẹ re obọ rẹkhan emhin nin Otu Nọn Sun Oga tale.”
Be re uwẹ rẹọbhọ ghe, Jesu re Otu Nọn Sun Oga khian?
EBI MHAN LUẸLE
Otu Nọn Sun Oga, ọle hi “ọne ọguọmhandia nọn wanlan nan gbaẹkẹ ọle,” nin Jesu re mundia nọn ha re ẹbho nesọle khian. Ọne otu nan re ebale oriọn bi adia nin Esali Jehova bhi otọ agbọn nan rebhe.
Uwẹ Be Yẹ Yere?
Họla re “ọne ọguọmhandia nọn wanlan nan gbaẹkẹ ọle” ọbhi ihe nin ọle ye?
Be Otu Nọn Sun Oga rẹ gbẹloghe mhan yẹ?
Uwẹ be rẹọbhọ ghe, Otu Nọn Sun Oga, ọle hi “ọne ọguọmhandia nọn wanlan nan gbaẹkẹ ọle”?
FẸ ENE EMHIN NAN GHE
Luẹ ebi a rẹ gha Otu Nọn Sun Oga ọbhi usun kẹkẹ yẹ beji ele ha da sabọ ha lu iwẹnna nọnsele.
“Be Hi Iwẹnna ọsi Otu Nọn Sun Oga ọsi Esali Jehova?” (Ebe nọn ribhi jw.org)
Luẹ ebi Otu Nọn Sun Oga rẹ wẹnna kaka yẹ beji a ha da miẹn ghe, a bha miẹn iku re bhi anyọn bhi ebale oriọn nin ele rẹ nin mhan le.
Ebi Mhan Lu, Beji A Ha Da Miẹn Ghe Ẹmhọn Nọn Gbale Ribhi Ebe Nesẹmhan (17:18)
Ẹlo nela ene ewanlẹn ne ribhi Otu Nọn Sun Oga rẹ ghe iwẹnna nin Jesu mun nin ele?
Be ikolo oga nin mhan yo, bi usikoko ne nẹ nesẹmhan rẹ rẹman yẹ ghe, Jehova gene re Otu Nọn Sun Oga khian?