“Ji Agbejele Nọnsẹ Vae”

Jehova da ve yọle: ‘A i yẹ da ha họn ukpuru eviẹ, ọbalọ i yẹ da ha ribhọ, emianmhẹn i yẹ da ha ribhọ, uu i yẹ da ha ribhọ.’ Sẹyẹ, ọle da ve ghe, ọle dẹ gbo amẹn eviẹ si mhan bhi ẹlo re, yẹ ne emhin ne i mhẹn ne ka rẹ ha sunu kie.

Jehova da ne Adam bi Ivi ọbhi ogba ọsi Idẹn, beji ele ha da ha nyẹnlẹn bhi ọfure yẹ ha ghọnghọn. Ọ da khẹke nin ele ha ga Aba ele nọn ribhi okhun, yẹ biẹ vuọn ọne otọ nan. Adam bi Ivi da mhọn akan-ehọ da Jehova. Ọrẹyiriọ, iho nọnsi Jehova bha fidenọ. Mhan wo dọ luẹ kere bhi ọne ebe nan ghe, Jehova wo mun ive nesọle sẹ. Beji Jehova ve nin Ebraham, Agbejele nọnsi Osẹnobulua dẹ rẹkpa ẹbho bhi ọne otọ nan rẹ ha mhọn emhin esili kẹkẹ.

Bhi ẹghe nọn bha yẹ ree gbe nian, Esu, ẹlinmhin-ebe nesọle, bi eria ne lu emhin ebe i da yẹ ha ribhọ. Eria ne da ha nyẹnlẹn ẹghenin ki ha ga Jehova. Mhan i yẹ da ha khọnmhọn, mhan i yẹ da ha yu. Ọsewewiẹ rebhe nin mhan ha rẹ riọre bhi owe, egbe ki wo daan mhan, sẹyẹ, mhan ki ha ghọnghọn ghe mhan ribhi agbọn. Ọne otọ nan ki kiẹn otọ ọfubhegbe. Ọrebhe ki miẹn ebale esili ha le, yẹ mhọn uwa nọn mhẹn. Ẹbho ki ha re ifuẹkẹ rẹ ne egbe lu emhin. Ele i yẹ da ha lu ibo ele khọlọ, la ha ne ele khọnlẹn. Elanmhẹn ne tuakọn i yẹ da ha mun ofẹn mhan, sẹyẹ, imhan bhọ i yẹ da ha mun ofẹn ele.

Mhan dẹ wo manman ha ghọnghọn bhi ọne ẹghe nin Jehova ha rẹ munhẹn ha riọ ẹbho ne yu kpanọ. Mhan ki ha gbobokhian nin ẹbho nan riọkpanọ bhi uu. Ẹbho bii Ebẹl, Noa, Ebraham, Sera, Mozis, Rut, Ẹsta, bi Devid. Ele dẹ deba mhan re ọne otọ nan kiẹn otọ ọfubhegbe. Iwẹnna ne bunbun ne da ha yẹẹ mhan rẹ lu dẹ wo ha ribhọ ẹghenin.

Jehova guanọ nin uwẹ ha ribhi enin. Bhi enin, uwẹ ki miẹn isẹhoa rẹ manman lẹn ọlẹn nọnsẹn. Bha ji mhan wo ha sikẹ Jehova ukpẹdẹ-ukpẹdẹ nian, yẹ wo ha lu iriọ rẹ dọ sẹbhi ighegheghe!