ILUẸMHIN 13
Timoti Guanọ Nọnle Rẹkpa Ẹbho
Usẹn-ọbhokhan nọn aghọnghọn nọnle rẹ arẹkpa ẹbho iTimoti akhin. Ọle yi agba-ẹbho kẹkẹ dọ arẹkpa ẹbho. Ranmhude ọnan, ọle da manman aghọnghọn bhi iẹnlẹn nọnsọle. Uwẹ be ho nuwẹ lẹn ebi ọle rẹ lu ọle yẹ?—
Inẹn iTimoti bi inẹn ọlẹn nọn khua man lẹn ẹmhọn iJehova
Otọ iListra iTimoti da wanre. Ẹghe nọnle rẹ ha yi ọbhokhan, inẹn ọlẹn nọn khua nin Lọisi bi inẹn ọlẹn nin Yunisi da ha manlẹn ẹmhọn iJehova. ITimoti ki ha wanre, ọda ha guanọ nọnle rẹkpa ẹbho lẹn ẹmhọn iJehova.
Ẹghe nọnle rẹ ha yi usẹn-ọbhokhan, iPọlu da yọle sọle dẹ sabọ arẹkhan ọle yi ẹbho kẹkẹ, nele ko dọ ha tẹmhọn Osẹnobulua. ITimoti da yọle: ‘Ehe!’ Ranmhude ọle guanọ nọnle rẹkpa ẹbho.
ITimoti da rẹkhan iPọlu akhin agba-ẹbho natiọle Tẹsalonika bhi otọ iMasẹdonia. Nele rẹ sẹbhi enin, ele da khian ree, ele kuẹ nan bhi okọ. Ẹghe nele ki rẹ sẹbhọ, ele da rẹkpa ẹbho ne bunbun rẹ luẹ ẹmhọn iJehova. Ọkpa kinọn, ẹbho eso da ha khọẹkẹ ele, eda yẹ ha ho ne kuan ele. Ranmhude ọnan, iPọlu bi Timoti da kpanọ dọ ha tẹmhọn Osẹnobulua bhi ẹbho ọbhebhe.
ITimoti manman ha mhọn eghọnghọn bhi iẹnlẹn
Uki eso ki gbera, iPọlu da taman iTimoti nọn kikie akhin Tẹsalonika nọn dọ fẹghe ebi agbotu ne ribhi enin khian yẹ. Izebhudu iTimoti ha mhọnlẹn nọn da gbudu fikie akhin ọnin agba-ẹbho nọn i mhẹn nin. Ọrẹ yiriọ iTimoti da ha khian, ranmhude ọle ho nọnle dọ fẹghe ebi ibhio ele nele ko ga ki khian yẹ. Ọle ki yo vae, ọda taman iPọlu ghe ibhio ele ne ribhi enin wo lu nọnsẹn.
ITimoti wẹnna rẹkhan iPọlu bhi ikpe ne bunbun. Ẹghe ọkpa iPọlu da gbẹn ghe, iTimoti, ọle hi ọria nọn mhẹn nẹ nọnle a je nọn dọ rẹkpa agbotu. ITimoti wo gene hoẹmhọn iJehova bi ẹbho.
Uwẹ hoẹmhọn ẹbho? Uwẹ ho nu rẹkpa ele rẹ lẹn ẹmhọn iJehova?— Uwẹ ha lu iriọ, uki manman ha mhọn eghọnghọn bhi iẹnlẹn nonsẹ bọsi Timoti.