Jesu Da Fikie Ha Khian Okhun

Jesu da bu edibo nesọle re bhi Galili. Ọle da ta emhin kpataki nin ele ha lu man ele; ọle da yọle: ‘Bha ha khian, bha dọ re ẹbho kiẹn edibo bhi ọne otọ agbọn nan rebhe. Bha man ele ene emhin nin mẹn man bha le, bha ha yẹ re amẹn nin ele.’ Ọle da yẹ ve nin ele yọle: ‘Bha wo ha yere ghe, mẹn dẹ ne bha dia.’

Bhi ikpẹdẹ 40 nin Jesu gbe bhi ọne otọ nan beji ọle riọ kpanọ bhi uu fo, ọle da wo zegbere man edibo nesọle ne bunbun bhi Galili bi Jerusalẹm. Ọle da man ele emhin kpataki, yẹ lu emhin ọhan-ilo ne bunbun. Ọle ki lu ọnan fo, ọle da zegbere man etuegbe nọnsọle bhi Oke Ọsi Olivi. Ọnan hi ẹghe nọn kike nin ọle rẹ zegbere man etuegbe nesọle. Ọle da taman ele yọle: ‘Bha hẹi sibhi Jerusalẹm re. Bha wo ha khẹ ọne emhin nin ọne Aba ve ive ọle.’

Etuegbe nesọle bha lẹn otọ ebi ọle ha tẹmhọnlẹn. Bhiriọ, ele da nọọn ọlẹn yọle: ‘Uwẹ ki ho nin uwẹ kiẹn Ojie ọsi Izrẹl nian?’ Jesu da yọle: ‘Ọne ẹghe nin Jehova rẹyi nin mẹn ha rẹ kiẹn Ojie bha sẹ sẹ. Bhi ẹghe nọn bha yẹ ree gbe nian, ẹlinmhin nọn khiale dẹ re ahu nin bha, sẹyẹ, bha ki ha sọsali nin mẹn. Bha ha khian dọ wewe ẹmhọn mẹn bhi Jerusalẹm, Judia, Sameria, rẹ dọ sẹbhi eje ree nẹ bhi ọne otọ nan.’

Jesu ki ta ọnan fo, ọle da kpanọ ha khian okhun, sẹyẹ, adudu-amẹn da gue ọle. Edibo nesọle da ha ghe okhun, ọkpakinọn, ele bha yẹ daghe ọle.

Ene edibo da sibhi Oke Ọsi Olivi re ha khian Jerusalẹm. Ẹghe-ẹghe ele rẹ ha siegbe koko bhi ugha ọkpa nọn ribhi okhun uwa bhi Jerusalẹm, yẹ nan erọnmhọn. Ele da ha khẹ Jesu nin ọle taman ele ebi ele ha lu yẹ.