Be Ene Fẹ Otu Ghe Rẹ Rẹkpa Mhan Yẹ?

Obọ ọkpa bhi Baibo nan ri urolo Griki gbẹn, wo manman tẹmhọn Banabas bi Pọlu. Enin ikpea nan ka wẹnna iwẹnna ọsi ene fẹ otu ghe. Ele ha fẹ agbotu ghe bhi ore nin ọhẹnhẹn. Bezẹle nele da lu ọnan? Ranmhude, ele mhọn ẹmhọn ọsi ibhio ele nele ko ga bhi ọkhọle. Pọlu tale ghe, ọle ho nọnle ‘fikie dọ fẹ ghe ebi ibhio ọle diayẹ.’ Arẹmiẹn eji enin ẹbho ye remhin, ọda yẹ ha hu ọle bhi udu nọnle rẹ dọ ri isudu nele. (Acts 15:36) Ọnin ọkhọle nin ene fẹ agbotu ghe mhọn ẹlẹnan.

Ele vae dọ ari isudu mhan. Igba eva bhi ukpe, ọfẹ otu ghe gbe uzana ọkpa bhi agbotu ikikẹ nọnsi 20. Mhan sabọ miẹn elele bhi obọ enin ikpea nan bi okhuo ele sade ele mhọn okhuo. Ele dọnmegbe nele rẹ lẹn ọrebhe. Ọhu ele bhi udu nele rẹ rẹkhan mhan yo iwẹnna itẹmhọn Osẹnobulua bi nin mhan rẹ ko dọ miẹn enin mhan man ele iBaibo. Ene fẹ otu ghe nan bi enin ewanlẹn bhi oga vae dọ ha fẹ mhan ghe bhi uwa. Ele ri ọta bhi Baibo rẹ ri isudu mhan sade mhan yo ikolo oga la usikoko.—Acts 15:35.

Ele mhọn oyẹẹ da ọrebhe. Ene fẹ agbotu ghe mhọn oyẹẹ ọsi ilọmhọn oga ọsi agbotu bhi ọkhọlẹ. Ele yẹ dọa nin ene ewanlẹn bi ene zẹ sike ewanlẹn ha do ikolo beji ele ada lẹn ebi agbotu rẹ khian yẹ. Bhiriọ, ele ki sabọ lẹn urẹkpa nele ha re nin enin agbotu. Ele rẹkpa ene lu iwẹnna ọkanẹfan rẹ tuẹn okhun bhi iwẹnna itẹmhọn Osẹnobulua. Ọyẹ yẹẹ ele rẹ lẹn ene la deba agbotu mhan bi ebi ele rẹ tuẹn okhun yẹ bhi agbotu. Enin ibhio mhan nin ikpea nan tobọ ele zi egbe dagbare dọa yi ‘enin mhan ko wẹnna ne rẹkpa mhan.’ (2 Corinthians 8:23) Ọkhẹke nin mhan re egbe khọkhọ urẹọbhọ nọnsele bi ebi ele rẹ ga Osẹnobulua yẹ.—Hebrews 13:7.

• Bezẹle nin ọfẹ otu ghe da dọa fẹ agbotu ghe?

• Elele nela uwẹ a miẹn bhọ sade ele vae dọ fẹ agbotu nọnsẹ ghe?