Isikulu Nela Alu Nin Ekanẹfan?

Alẹn Esali Jehova ọbhi iluẹmhin nọnsi Baibo. Isikulu kpataki ribhọ nan mun gbọ nọn rẹkpa ekanẹfan rẹ luẹ ebarẹ sabọ tẹmhọn Osẹnobulua nọnsẹn yẹ.​—⁠2 Timothy 4:⁠5.

Isikulu Ọsi Ekanẹfan. Ukpe ọhẹnhẹn a gbera fo, isikulu ọsi ikpẹdẹ ehan ribhọ nan da man ele iBaibo. Kindọn Họọ nọn sikẹ ele nẹn ele ha da yo ọnin isikulu. Ebezẹle nele da yo ọnin isikulu, ọle hi, nọn rẹkpa ele rẹ sikẹ Jehova, nọn rẹkpa ele rẹ ha man ẹbho iBaibo nọnsẹn bi nọn yẹ rẹkpa ele mun urẹọbhọ nọnsele mudia.

Isikulu Ọsi Ene Tẹmhọn Agbejele. Ọnin isikulu nan ri uki eva do nan, rẹkpa enin Ekanẹfan ne muegbe rẹ sibhi uwa re akhian eji ada guanọ iyobọ. Ele ri egbe khọkhọ iJesu nin ọkanẹfan nọn nẹ bhi uki otọ nan. Ele yọle ‘Ghe mhẹn, jie mhẹn akhian!’ (Isaiah 6:8; John 7:29) Nele rẹ sibhi uwa re ha nyẹnlẹn bhi eji ebhebhe, ele muegbe nele rẹ nyẹnlẹn bhi uwedẹ nanrẹ nyẹnlẹn bhi enin. Ebi ele rẹ nyẹnlẹn bhi enin yẹ bi ebale nele le sabọ dikẹ bhi enin ele ka lẹn khẹ. Ẹghe eso, eki luẹ urolo ọbhebhe. Ọnin isikulu nan sabọ rẹkpa ikpea, ikhuo, ọdọ bi amhẹn, ne ribhi ukpe 23 rẹ sẹbhi 65 rẹ luẹ ebe ha rẹkpa ele rẹ mun iwẹnna nele lu nin Jehova bi agbotu nọnsọle sẹ nọnsẹn.

Isikulu Giliẹdi. Bhi urolo iHibru, Giliẹdi ọle hi ‘oke ọsali.’ Renin ukpe 1943 ade, eria ne gbera 8,000 sẹ yo dagbare bhi ọnin isikulu. Ajie ele akhin ẹbho ebhebhe dọ ha tẹmhọn Osẹnobulua. (Acts 13:47) Ẹghe nin ene yi ọnin isikulu nan rẹ ka sẹbhi ẹbho natiọle Pẹru, agbotu soso bha ha ribhi enin. Ejayenan nian ele ki gbera 1,000. Ẹghe nin, ene yo ọnin isikulu fo, natiọle misiọnari rẹ sẹbhi Japan, Esali Jehova nọn ha ribhi agbaẹbho nin bha si igbe. Ejayenan nian, ele ki gbera 200,000. Baibo awo luẹ bhi ọnin isikulu nan nan ri uki isẹn yo. Ene lu iwẹnna ọkanẹfan kpataki, ene wẹnna bhi Bẹtẹ bi ene fẹ agbotu ghe a tie vae bhi ọnin isikulu nan, ne dọ luẹ ebi ele arẹ ha sabọ bọn agbotu mudia yẹ.

• Bezẹle nan da mun Isikulu Ọsi Ọkanẹfan gbọ?

• He bhọ aje yo Isikulu Ọsi Ene Itẹmhọn Agbejele?