Be bhọ Ọkanẹfan?

“Ekanẹfan” mudia nin ene tuje odẹ nin ene kẹle rẹkhan. Jesu, ọkanẹfan nọn, ranmhude ajie ọle vae bhi ọnin otọ nan nọn dọ tẹmhọn Osẹnobulua bi nọn dọ tuje uwedẹ a nin eria rẹ miẹn umiẹnfan. (Matthew 20:28) Ẹlẹnan, edibo nesi Jesu ri egbe khọkhọ ọle nele rẹ ri ẹghe bhi otọ rẹ ‘man ẹbho iBaibo.’ (Matthew 28:​19, 20) Eso dọ ha lu iwẹnna nin mhan tiọle ọkanẹfan.

Ọkanẹfan ọle hi ọnọn tẹmhọn Osẹnobulua ẹghe rebhe. Esali ọsi Jehova rebhe tẹmhọn Osẹnobulua. Ọkpa kinọn, eso natiole okanẹfan ri uriagogo 70 rẹ tẹmhọn Osẹnobulua bhi uki. Nele rẹ sabọ lu ọnan, ele ida wẹnna bhi ẹghe rebhe. Eso ribhọ nan hanọn nan tie ọkanẹfan kpataki, ele ri uriagogo 130 rẹ tẹmhọn Osẹnobulua bhi uki. Eji ada guanọn urẹkpa bhi itẹmhọn Agbejele ọle aji ele yo. Ele nyẹlẹnmhin beji obọ nọnsele sẹle. Ele rẹọbhọ ghe, Osẹnobulua, ọle la ri obọ kpa ele. (Matthew 6:​31-33; 1 Timothy 6:​6-8) Ene bha sabọ lu enan, sabọ a lu iwẹnna ọkanẹfan ọsi ẹghe eso, ne re uriagogo 30 la 50 rẹ a tẹmhọn Osẹnobulua bhi uki.

Ahoẹmhọn-egbe ọsi Osẹnobulua bi eria ọle ri ọria lu iwẹnna ọkanẹfan. Bọsi Jesu, mhan daghe ẹbho mhọn ọkhọle nele rẹ lẹn Osẹnobulua ẹlẹnan. (Mark 6:34) Bhiriọ, mhan mhọn ilẹnmhin nọn ha sabọ rẹkpa ele yẹ ri ikhuaẹloghe nele. Ihoẹmhọn eria zẹle nin enin ekanẹfan nan da ri ẹghe bi ahu nọnsele rẹ rẹkpa eria rẹ lẹn ẹmhọn Osẹnobulua. (Matthew 22:39; 1 Thessalonians 2:⁠8) Ranmhude ọnin, urẹọbhọ nọnsele deziẹn, ele sikẹ Osẹnobulua nọnsẹn bi ele ghọnghọn ẹghe rebhe.​—⁠Acts 20:⁠35.

• Họbhọ ọkanẹfan?

• Bezẹle nin eria da lu iwẹnna ọkanẹfan?