Eria Bela Esali Jehova Khin?

He bhọ Esali Jehova nuwẹ lẹn lẹn? Eso bhi ẹwẹ mhan sabọ ha nyẹnlẹn sikẹ ẹ, enin bha ko wẹnna la enin bha ko yi isiku. Asabọ miẹn mhan ka ne ẹ zilo ọbhi Baibo. He bhọ mhan gene khin? Bezẹle nin mhan da man ẹbho ebi mhan rẹọ?

Eria khọnkhan mhan khin. Ije kikẹ mhan nan vae bi unyẹnmhin kikẹ mhan mhọn. Eso bhi ẹwẹ mhan ka ha ga oga ikikẹ, eso bha rẹka rẹọbhi Osẹnobulua. Mhan kuẹ kiẹn Esali Jehova, mhan re ẹghe ọbhi otọ rẹ guanọ ẹmhọn-ata nọn ribhi Baibo. (Acts 17:11) Mhan rẹọbhi ebi mhan luẹle, bhiriọ, mhan da tobọ mhan zẹ nin mhan rẹ ga Osẹnobulua nin Jehova.

Mhan miẹn elele bhi Baibo nin mhan luẹ. Bii ẹbho ne kẹle, mhan mhọn okpokpo kikẹ. Nin mhan rẹ dọnmhegbe rẹ rẹkhan uhi nọn ribhi ẹkẹ iBaibo, mhan ki daghe ghe iẹnlẹn nọnsẹ mhan ki mhẹn nẹn ọnọn ka ha ye khẹ. (Psalm 128:1, 2) Ọnan deba ebezẹle nin mhan da ta ẹmhọn-ata nin mhan luẹ bhi ẹkẹ iBaibo man agbọn.

Mhan nyẹnlẹn rẹkhan ebi mhan luẹ bhi ẹkẹ iBaibo. Enin emhin esili nin mhan luẹ bhi ẹkẹ iBaibo rẹkpa mhan rẹ ha nyẹnlẹn nọnsẹn. Ọyẹ rẹkpa mhan rẹ ha mun ekpẹn nin eria bi nin mhan rẹ ha yi ẹbho ne fuẹkẹle ne ta emhon-ata. Ọnin uhi nọn ribhi ẹkẹ iBaibo rẹkpa mhan rẹ kiẹn eria nan gba ẹkẹ ele bhi ẹbho, ne mhọn ọkugbe bhi ẹkẹ azagba-uwa bi ene nyẹnlẹn ienlẹn esili. Mhan kiẹn ibhio ne ga kugbe bhi otọ agbọn rebhe, mhan ideba otu ahinmhin-ibo, ranmhude mhan lẹnmhin ghe ‘Osẹnobulua izibo.’ Arẹ miẹn eria khọnkhan mhan khin, unyẹnmhin nọnsẹ mhan dikẹ.—Acts 4:13; 10:34, 35.

• Be Esali Jehova rẹ diabi eria nekẹle yẹ?

• Be bhọ emhin esili nin Esali Jehova luẹ bhi ẹkẹ iBaibo?