4 Urẹhunmhan

EBI A RE ỌLE TA

Uwẹ ha rẹhunmhan ọria, uwẹ ida yẹ ji emhin nin ọle lu uwẹ le ha re ẹkẹ khọ uwẹ. Uwẹ ki re ọne ẹmhọn sibhi ọkhọle re. Nin uwẹ rẹ rẹhunmhan ọria iyi nin uwẹ rẹ man ha lu ghe emhin soso bha sunu, la emhin nọn sunu bha sẹ emhin soso.

ADIA NỌN RIBHI BAIBO: “Bha wo ha re iziẹngbe rẹ ne egbe lu emhin, bha ha yẹ ha re ọkhọle rebhe rẹ rẹhunmhan ọdeọde aharẹmiẹn ọria lu bha khọlọ.”​—Colossians 3:​13.

“Uwẹ ha hoẹmhọn ọria, ọ iyi eji ọle ida mhẹn uwẹ da ha ghe. Uwẹ ki ha ghe ebi ọle rẹ dọnmhegbe yẹ nin ọle rẹ lu emhin esili.”​—Aaron.

EBEZẸLE NỌN DA KHẸKE

Ahamiẹn uwẹ re ẹmhọn gbanọ bhi ọkhọle, uwẹ ida yẹ ha ghọnghọn. Sẹyẹ, uwẹ dẹ sabọ si emianmhẹn ji egbe uwẹ, yẹ si ọnọghọ re bhi ibọdọ bi ireokhuo nọnsẹ.

Ẹghe ọkpa, ọdọ mẹn da lu emhin nọn manman khọ mẹn bhi ẹkẹ. Ọle rẹ bhii mẹn nin mẹn rẹhunmhan ọlẹn, mẹn bha ka. Akizẹbue, mẹn da sha rẹhunmhan ọlẹn. Ọkpakinọn, ọ da wo ba mẹn bhi egbe ghe mẹn bha kẹ rẹhunmhan ọlẹn. Emhin nin mẹn lu da wo riia emhin an bhi ikolu nin mẹn bi ọdọ mẹn ko ha mhọnlẹn.”​—Julia.

EBI UWẸ HA SABỌ LU

FẸ EGBE Ẹ GHE

Ẹdẹ nin okhuo ẹ la ọdọ ẹ ha kie lu emhin la ta ọta nọn rẹ ẹkẹ khọ uwẹ, nọọn egbe ẹ:

• ‘Ohu be kẹ re mẹn gbe?’

• ‘Ọne ẹmhọn gene sẹ ebi ọle ha dọ bhii mẹn ba, la mẹn dẹ sabọ re ẹlo gbera ọle?’

DEBA OKHUO Ẹ LA ỌDỌ Ẹ ZILO NYAN ENE INỌNTA NAN

• Be ọ bue sẹ yẹ mhan kuẹ mun ẹmhọn fia?

• Be imhan ha lu nin mhan da sabọ kẹ ha rẹhunmhan egbe?

EMHIN NE HA RẸKPA UWẸ

• Okhuo ẹ la ọdọ ẹ ha ta ọta la lu emhin nọn re ẹkẹ khọ uwẹ, hẹi wo ha riale ghe ranmhude ọle mhọn ọkhọle ebe da uwẹ, ọle zẹle nin ọle da ta ọta nin ọle ta la lu emhin nin ọle lu.

• Ha mhọn ọlẹn bhi ọkhọle ghe ọ iyi ẹmhọn ọlẹn. Yere ghe, “mhan rebhe yẹ wo dobọ igba ne bunbun.”​—James 3:2.

Ọ wo lẹkhẹ nin mhan rẹ rẹhunmhan egbe ahamiẹn ghe imhan veva ko rahiẹ egbe. Sokpan, ahamiẹn ghe otuọnkpa rahiẹ ọnọnkẹle, ọ ki wo ha nọghọ. Idegbere ha rẹkpa mhan rẹ mun ẹmhọn fia sade ọria nọn rahiẹ mhan dọ bhii mhan.”​—Kimberly.

ADIA NỌN RIBHI BAIBO: ‘Kẹ ha re ẹmhọn ọi nọnsẹn.’​—Matthew 5:​25.