Okhuo bi ọdọ ne mhọn okugbe diabe itue eva ne kuọbogbe ha gua arople
ỌSI OKHUO BI ỌDỌ
2 OKUGBE
EBI A RE ỌLE TA
Okhuo bi ọdọ ne mhọn okugbe ki ha wẹnna kugbe beji itue eva ne ko gua arople rẹ mhọn emhanmhan ọkpa nọn ha re ele sẹbhi eji ele khian. Ọnọghọ ha rẹ zegbere, ele ki ha mhọn ọlẹn bhi ọkhọle ghe ele veva ha ko khọn ọlẹn, ọ iyi otuọnkpa.
ADIA NỌN RIBHI BAIBO: “Ele iyẹ yi efun eva, sokpan ele kiẹn efun ọkpa.”—Matthew 19:6.
“Ilọnmhọn ibọdọ bi ireokhuo iyi ọsi otuọnkpa. Okhuo bi ọdọ dẹ ko ha wẹnna kugbe beji ọ ha da de odẹ re.”—Christopher
EBEZẸLE NỌN DA KHẸKE
Ọnọghọ ha zegbere, okhuo bi ọdọ ne imhọn okugbe ki ha ne egbe ele van. Ele ida denọ ẹlo ọbhi ebi ele ha rẹ re ọne ẹmhọn khian yẹ. Ele ki re ẹmhọn nọn bha sẹ emhin soso kiẹn udede ẹmhọn.
Okugbe wo manman lu uhọnmhọn-emhin bhi ibọdọ bi ireokhuo. Sade mẹn bi ọdọ mẹn bha ko ha wẹnna kugbe, mhan ki diabe itue eva ne gheghe nyẹnlẹn bhi ugha ọkpa. Mhan ida sabọ ha khu ọbhi emhanmhan ọkpa.—Alexandra
EBI UWẸ HA SABỌ LU
FẸ EGBE Ẹ GHE
Mẹn be ghe igho nin mẹn miẹn bii igho nọnsẹmhẹn ọkpa?
Eji ọdọ mẹn la okhuo mẹn iye imẹn da be miẹn ọfubhegbe?
Mẹn be si egbe kie bhi eji ibhio ọdọ mẹn la okhuo mẹn ye arẹmiẹn ghe ọle sikẹ ele?
DEBA OKHUO Ẹ LA ỌDỌ Ẹ ZILO NYAN ENE INỌNTA NAN
Emhin nela mhan da kuobọgbe bhi ibọdọ bi ireokhuo nọnsẹmhan?
Emhin nela ọ da khẹke nin mhan ha kuobọgbe gbera ọnikhẹ?
Be imhan ha lu nin mhan da sabọ ha kuobọgbe gbera ọnikhẹ?
EMHIN NE HA RẸKPA UWẸ
Ji a man yọle ghe uwẹ bi okhuo ẹ la ọdọ ẹ ribhi ibọ kẹkẹ bhi usun eva ne ko gbe igemu. Riale ebi uwẹ ha lu nin uwẹ bi ọle da sabọ ko ha ribhi usun ọkpa?
Nin uwẹ rẹ ha riale, ‘be imẹn ha rẹ mun ọkalo yẹ?’ ha ria ẹmhọn ebi bha veva ha rẹ mun ọkalo yẹ.
“Ọnọn ho ẹmhọn la ọnọn bha ho ẹmhọn bha lu uhọnmhọn-emhin. Nin okugbe bi ọfure ha ribhi ibọdọ bi ireokhuo nọnsẹ, ọle lu uhọnmhọn-emhin nẹ.”—Ethan
ADIA NỌN RIBHI BAIBO: “Ha gbẹlokotọ, ọ iyi bhi ọmhẹn nọnsi uwẹ ọkpa, sokpan, yẹ gbẹlokotọ bhi ọmhẹn ọsi eria nekẹle.”—Philippians 2:3, 4.